جاڭالىقتار
«پارلامەنتتىڭ ەكىنشى سەسسياسىندا قازاقستاندا 102 زاڭ قابىلداندى»: توقاەۆ قازاقستان حالقىنا جولداۋىن تانىستىرۋدا
فوتو: اشىق دەرەككوز
پرەزيدەنت قاسىم-جومارت توقاەۆ 2 قىركۇيەكتە ەلىمىزدىڭ ساياسي جانە الەۋمەتتىك-ەكونوميكالىق دامۋ پەرسپەكتيۆالارىنا قاتىستى جولداۋ جاساپ جاتىر. ول وتكەن ساياسي ماۋسىمعا قورىتىندى جاساي وتىرىپ, 102 زاڭ قابىلدانعانىن ءسوز ەتتى. بۇل تۋرالى qandastar.kz اقپارات اگەنتتىگى حابارلايدى.
مەملەكەت باسشىسىنىڭ سوزىنشە, وتكەن سەسسيادا جەمىستى جۇمىس جۇرگىزىلدى. اتاپ ايتقاندا, پارلامەنتتىڭ ەكىنشى سەسسياسىندا 102 زاڭ قابىلداندى. قوعامدىق باقىلاۋعا, ادام ساۋداسىنا قارسى كۇرەس, سونداي-اق عىلىم جانە تەحنولوگيا ساياساتىن, جىلۋ ەنەرگەتيكاسىن, باسقا دا ماسەلەلەردى رەتتەيتىن زاڭدار كۇشىنە ەندى.
“الەۋمەتتىك سالاعا, اسىرەسە, بالالاردى قورعاۋ ىسىنە ايرىقشا كوڭىل ءبولىندى. ۇلتتىق قوردان بالالاردىڭ ەسەپشوتىنا قارجى اۋدارۋعا قاتىستى زاڭ قابىلداندى. بالالاردى قۇمار ويىنعا تارتقاندار اكىمشىلىك زاڭ بويىنشا جازاعا تارتىلادى. كامەلەتكە تولماعان بالالارعا زورلىق-زومبىلىق كورسەتكەنى ءۇشىن بەرىلەتىن جازا قاتايدى. بالالاردىڭ قاۋىپسىزدىگىن قامتاماسىز ەتۋگە, ايەلدەر مەن بالالارعا قاتىستى قىلمىستىڭ الدىن الۋعا ارنالعان زاڭ قابىلداندى”, – دەدى توقاەۆ.
پرەزيدەنت نەسيە قوعامدىق دەرتكە اينالعانىن ايتا ءوتتى. ول بۇل تۋرالى دا ارنايى زاڭدار قابىلدانعانىن ءتۇسىندىردى.
“حالىقتىڭ ءال-اۋقاتىن جاقسارتۋعا سەپتىگى تيەتىن باسقا دا كوپتەگەن شارا قولعا الىندى. سىزدەر بۇل جۇمىسپەن تىكەلەي اينالىسىپ, حالىقپەن ءاردايىم تىعىز بايلانىستا بولدىڭىزدار. مۇنىڭ ءبارى «حالىق ۇنىنە قۇلاق اساتىن مەملەكەت» قاعيداسىن ورنىقتىرۋعا ىقپال ەتەتىنى ءسوزسىز”, – دەدى ول.
