Jańalyqtar
«Parlamenttiń ekinshi sessııasynda Qazaqstanda 102 zań qabyldandy»: Toqaev Qazaqstan halqyna joldaýyn tanystyrýda
Foto: ashyq derekkóz
Prezıdent Qasym-Jomart Toqaev 2 qyrkúıekte elimizdiń saıası jáne áleýmettik-ekonomıkalyq damý perspektıvalaryna qatysty joldaý jasap jatyr. Ol ótken saıası maýsymǵa qorytyndy jasaı otyryp, 102 zań qabyldanǵanyn sóz etti. Bul týraly qandastar.kz aqparat agenttigi habarlaıdy.
Memleket basshysynyń sózinshe, ótken sessııada jemisti jumys júrgizildi. Atap aıtqanda, parlamenttiń ekinshi sessııasynda 102 zań qabyldandy. Qoǵamdyq baqylaýǵa, adam saýdasyna qarsy kúres, sondaı-aq ǵylym jáne tehnologııa saıasatyn, jylý energetıkasyn, basqa da máselelerdi retteıtin zańdar kúshine endi.
“Áleýmettik salaǵa, ásirese, balalardy qorǵaý isine aıryqsha kóńil bólindi. Ulttyq qordan balalardyń esepshotyna qarjy aýdarýǵa qatysty zań qabyldandy. Balalardy qumar oıynǵa tartqandar ákimshilik zań boıynsha jazaǵa tartylady. Kámeletke tolmaǵan balalarǵa zorlyq-zombylyq kórsetkeni úshin beriletin jaza qataıdy. Balalardyń qaýipsizdigin qamtamasyz etýge, áıelder men balalarǵa qatysty qylmystyń aldyn alýǵa arnalǵan zań qabyldandy”, – dedi Toqaev.
Prezıdent nesıe qoǵamdyq dertke aınalǵanyn aıta ótti. Ol bul týraly da arnaıy zańdar qabyldanǵanyn túsindirdi.
“Halyqtyń ál-aýqatyn jaqsartýǵa septigi tıetin basqa da kóptegen shara qolǵa alyndy. Sizder bul jumyspen tikeleı aınalysyp, halyqpen árdaıym tyǵyz baılanysta boldyńyzdar. Munyń bári «Halyq únine qulaq asatyn memleket» qaǵıdasyn ornyqtyrýǵa yqpal etetini sózsiz”, – dedi ol.
