پاۆلودار وبلىسىندا پوليتسەي اتىلىپ قالدى: ءبىر توپ ارىپتەسى قىزمەتتەن كەتتى

فوتو: اشىق دەرەككوز

پاۆلودار وبلىسى پروكۋراتۋراسىنىڭ مالىمەتىنشە, وڭىردە ءوزىن اتىپ ولتىرگەن پوليتسەيدىڭ ولىمىنەن كەيىن ارىپتەستەرى قىزمەتىنەن بوساتىلدى, دەپ حابارلايدى Politico.kz.

ۆەدومستۆو اقپاراتىنا قاراعاندا, پاۆلودار وبلىسىندا 22 جاستاعى پوليتسەيدىڭ ءوز-وزىنە قول جۇمساۋ فاكتىسى بويىنشا تەرگەۋ جالعاسىپ جاتىر. بيىل ماۋسىم ايىندا ەرتىس اۋداندىق پوليتسيا ءبولىمىنىڭ كىشى سەرجانتى وزىنە وق اتقان.

سوتقا دەيىنگى تەرگەپ-تەكسەرۋ قىلمىستىق كودەكستىڭ 105-بابىنىڭ 1-بولىگى («ادامدى قورقىتۋ, قاتىگەزدىكپەن قاراۋ نەمەسە جۇيەلى تۇردە قورلاۋ ارقىلى ءوزىن-ءوزى ولتىرۋگە يتەرمەلەۋ نەمەسە ءوزىن-ءوزى ولتىرۋگە وقتالۋ») بويىنشا جۇرگىزىلىپ جاتىر.  قاداعالاۋ ورگانى قىزمەتتىك تەكسەرۋ ناتيجەلەرىن دە حابارلادى.

پاۆلودار وبلىسى پوليتسيا دەپارتامەنتىنىڭ ىشكى قاۋىپسىزدىك باسقارماسى اتالعان فاكتى بويىنشا قىزمەتتىك تەكسەرىس جۇرگىزدى, ناتيجەسىندە ەرتىس اۋداندىق پوليتسيا ءبولىمى مەن پوليتسيا ءبولىمىنىڭ بىرقاتار قىزمەتكەرى قاتاڭ تارتىپتىك جاۋاپكەرشىلىككە تارتىلدى, ونىڭ ىشىندە كەيبىرەۋلەرى جۇمىستان بوساتىلدى, – دەدى پاۆلودار وبلىسى پروكۋرورىنىڭ ورىنباسارى ەربول ىسقاقوۆ.

تەرگەۋ مۇددەسىندەگى باسقا اقپارات جاريا ەتىلمەيدى.

ەسكە سالايىق, بۇعان دەيىن الەۋمەتتىك جەلىلەردە كىشى سەرجانتتىڭ ۇيىندە بولعان كەزىندە وزىنە-ءوزى قول جۇمساۋ تۋرالى حات قالدىرىپ, قىزمەتتىك قارۋىمەن باسىنان اتىپ ولگەنى حابارلانعان ەدى.

اۋىر وق جاراقاتىن العان پوليتسەي 29 ماۋسىمعا قاراعان ءتۇنى ەرتىس كەنتىنەن پاۆلودار قالالىق No1 اۋرۋحاناسىنىڭ جانساقتاۋ بولىمىنە جەتكىزىلدى. جاس جىگىت كوماعا تۇسكەن. كەلەسى كۇنى كەشكە قايتىس بولدى.