جاڭالىقتار
پاۆلودار وبلىسىندا جەتىمدەرگە تيەسىلى پاتەردە اكىمنىڭ ورىنباسارى تۇرعان
فوتو: pexel
پاۆلودار وبلىسىندا باسشىلىق ەرتىس اۋدانى اكىمىنىڭ جاڭادان تاعايىندالعان ورىنباسارىنا جەتىم بالاعا تيەسىلى پاتەردى بەرۋ تۋرالى شەشىمدى قابىلداعان, دەپ حابارلايدى qandastar.kz
روزا اقانوۆا 2025 جىلدىڭ اقپان ايىندا ەرتىس اۋدانى اكىمىنىڭ ورىنباسارى بولىپ تاعايىندالدى. بۇعان دەيىن ول ۇزاق ۋاقىت پاۆلودار وبلىسىنىڭ ءبىلىم باسقارماسى باسشىسىنىڭ ورىنباسارى بولىپ قىزمەت اتقارعان.
جاڭا لاۋازىمدى ەسكەرە وتىرىپ, ول كوشىپ, باسپانا تابۋ كەرەك بولدى.
“حالىقتىڭ الەۋمەتتىك وسال توبىنا جاتپايتىن تۇلعالارعا زاڭسىز تۇرعىن ءۇي بەرۋ فاكتىلەرى انىقتالدى. ماسەلەن ەرتىس اۋىلى, مۇتكەنوۆ كوشەسى, 32-ءۇي, 10-پاتەر مەكەنجايى بويىنشا حالىقتىڭ الەۋمەتتىك وسال توپتارىن قامتاماسىز ەتۋگە ارنالعان پاتەردە اۋدان اكىمىنىڭ ورىنباسارى روزا قابيبولقىزى اقانوۆا تۇرادى”, – دەدى پروكۋرور ادەپ جونىندەگى كەڭەستە.
Skifnews.kzاقپارات پورتالى جازعانداي, پروكۋراتۋرا بۇعان دەيىن دە باسپانانىڭ تيەسىلى ادامدارعا بەرىلمەگەنىن انىقتادى. سونداي-اق بوس تۇرعان 14 پاتەر بار, بىراق بەلگىلى سەبەپتەرمەن شەنەۋنىكتەر ونى حالىقتىڭ الەۋمەتتىك وسال توپتارىنا بەرۋ بويىنشا جۇمىس جۇرگىزبەي جاتىر.
باسقارما باسشىسى ادەپ كەڭەسىندە ەشتەڭەنى جوققا شىعارعان جوق. ول شەشىمدى ءوز بەتىنشە قابىلداعانىن ايتىپ, پاتەر كىلتىن اۋدان اكىمىنىڭ ورىنباسارىنا ءوزى تابىستادى.
“وندا جەتىم بالالار جالداۋ شارتىمەن تۇرادى. باسپانوۆا دەگەن ادام بار. بىراق ونىڭ بۇل ۇيدە تۇرماعانىنا ءبىر جىلدان اسىپ كەتكەنىن بايقايمىز. سويتسەم, بارلىق كوممۋنالدىق ەسەپ, پاتەر اقىسى بوسقا تولەنىپ جاتىر ەكەن. ءارى اۋداندا تۇرعىن ءۇي بولماعاندىقتان, كىلتتى ۋاقىتشا اقانوۆا روزا قابيبولقىزىنا بەرۋدى ءجون كوردىم”, – دەدى ەرتىس اۋداندىق ەكونوميكا ءبولىمىنىڭ ناقتى سەكتورىنىڭ باسشىسى قايروللا ەلەۋكەنوۆ.
ادەپ جونىندەگى كەڭەس مۇشەلەرى زاڭعا سايكەس ارەكەت ەتۋ كەرەگىن, الايدا اكىم ورىنباسارىنىڭ پاتەردە كوپ تۇرمايتىنىن ەسكەرىپ, وسىعان بايلانىستى لاۋازىمدى تۇلعاعا قىزمەتتىك تالاپتاردى تولىق ورىنداماعانى تۋرالى ەسكەرتۋ تۇرىندەگى تارتىپتىك جازا قولدانۋدى ۇسىندى.
