پاۆلودار سوتى ايەلىن اياۋسىز ۇرعان ەر ادامدى اقتاپ الدى

پاۆلوداردا سوت ايەلىن اياۋسىز سوققىعا جىعىپ, ءوز كىناسىن مويىنداعان ەر ادامدى اقتاپ شىقتى. دەپ جازدى Qandastar.kz.

Stan.kz اقپارات اگەنتتىگى حابارلاۋىنشا, 2024 جىلدىڭ جەلتوقسانىندا ونى كۇيەۋى ۇرىپ-سوعىپ, ولتىرەمىن دەپ قورقىتقان. كۇيەۋىنەن ءجابىر كورگەن ولەسيانىڭ ايتۋىنشا, بىرنەشە كۇننەن كەيىن ول قاشىپ شىعىپ, پوليتسياعا ارىز بەرگەن.

ء«ىس جارتى جىلعا جۋىق سوزىلدى, ال سوت پروتسەسۋالدىق بۇزۋشىلىقتارعا بايلانىستى ايىپتالۋشىنى اقتاپ شىقتى. بىراق بۇل مەنىڭ كىنام ەمەس. ادام ولتىرگەن جاعدايدا دا, ءدال وسىنداي پروتسەسسۋالدىق سەبەپتەرمەن اقتاپ جىبەرۋى مۇمكىن عوي», – دەدى ول.

ولەسيا پاۆلودار وبلىسىنداعى سوت جۇيەسىنە كوڭىلى تولمايتىنىن ايتىپ, مۇنداي شەشىمدەردىڭ سالدارىنان ايەلدەردىڭ قورعانسىز قالاتىنىن اتاپ ءوتتى. قازىر ول ءوز قاۋىپسىزدىگى ءۇشىن قورقادى.

“پاۆلودار وبلىسىنىڭ سوتتارى دالەلدەر, سوت-مەديتسينالىق ساراپتاما قورىتىندىسى, سۋرەت پەن ۆيدەوجازبالار بولا تۇرا, وسىنداي ۇكىم شىعارىپ وتىر. ەگەر ماعان ءبىر نارسە بولىپ قالسا, وعان كىم جاۋاپ بەرەدى? تەرگەۋشى مە? سۋديا ما? پروكۋرور ما?” – دەپ اشىنادى ايەل.

جابىرلەنۋشى سوت پروتسەسىندەگى قاتەلىكتەر سالدارىنان كىنالىلەردىڭ اقتالۋى – ۇلكەن پروبلەما ەكەنىن ايتتى.

“قازاقستانداعى بارلىق ايەلدەرگە جانىم اشيدى. ويتكەنى مەنىڭ جاعدايىما تۇسكەن ايەلدەر قورعان تابا المايدى. سەبەبى ءدال وسىنداي ايىپتالۋشىلار بىزدە اقتالىپ شىعادى”, – دەدى ول.

ال پاۆلودار قالاسىنىڭ پروكۋراتۋراسى بۇل اقتاۋ ۇكىمىنە اپەللياتسيالىق شاعىم دايىندالعانىن مالىمدەدى. ۆەدومستۆو ۇكىمدى جويىپ, ايىپتالۋشىنى كىنالى دەپ تانۋ ءۇشىن شارالار قابىلداناتىنىن جەتكىزدى.