جاڭالىقتار
پاۆلودار تۇرعىنى بۇرىنعى ايەلىن كولىگىمەن قاساقانا قاعىپ, مۇگەدەك قىلعان
پاۆلوداردا ايەلىن كولىكپەن قاساقانا قاعىپ, دەنساۋلىعىنا اۋىر زيان كەلتىردى دەگەن ايىپپەن 41 جاستاعى ەر ادام سوت الدىنا كەلدى. ايىپتالۋشى كىناسىن مويىندادى, دەپ حابارلايدى Qandastar.kz اقپارات پورتالى Pavlodarnews.kz-كە سىلتەمە جاساپ.
باسىلىمنىڭ حابارلاۋىنشا, وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا 41 جاستاعى ەر ادامعا قاتىستى قىلمىستىق كودەكستىڭ 24-بابى 3-ءبولىمى, 99-بابى 1-ءبولىمى بويىنشا قىلىمىستىق ءىس قارالدى.
وعان بيىل قاڭتاردا بۇرىنعى ازاماتتىق نەكەدە تۇرعان ايەلىنە قاساقانا اۋىر دەنە جاراقاتىن كەلتىردى دەگەن ايىپ تاعىلدى.
ءىس ماتەريالدارىنا سۇيەنسەك, ەكەۋى تاماق ساتاتىن پاۆيلونعا جول تارتقان بويدا جانجالداسقان. ايەل كولىكتىڭ سالونىنان شىعىپ, پاۆيلونعا قاراي جۇگىرگەن كەزدە ايىپتالۋشى كولىكتى وعان قاراي باعىتتاپ, قاققان. وقيعادان كەيىن جابىرلەنۋشىنىڭ ءبىر اياعىنا امپۋتاتسيا جاسالدى. ول بىرنەشە اي توسەككە تاڭىلىپ, اۋرۋحانادا جاتىپ شىقتى.
بارلىق ايعاق پەن دالەلدەمەنى زەرتتەۋ بارىسىندا سوتتالۋشىنىڭ كىناسى, ياعني, كىسى ولتىرۋگە وقتالۋ دەرەگى دالەلدەندى.
«قورعاۋشى تاراپ سوتقا اۆتوكولىكتىڭ اقاۋى بولعانىنا سەندىرۋگە تىرىستى. بىراق ارنايى مامان ماشينانىڭ تەحنيكالىق تۇرعىدا جارامدى كۇيدە ەكەنىن راستادى. گاز پەدالى جانە تەجەگىشتەن اقاۋ انىقتالعان جوق», — دەدى سۋديا قۇداباي سولتانوۆ.
ساراپشى پاۆيلوننان تۇسىرىلگەن بەينەجازبانىڭ كادرلارىندا اۆتوكولىكتىڭ ايەلگە قاراي باعىتتالعانى ايقىن كورىنەتىنىن جەتكىزدى. ياعني, ايىپتالۋشى ايەلدى پاۆيلون قابىرعاسىنا قاراي يتەرىپ, وسىلايشا جول قوزعالىسى ەرەجەلەرىن ورەسكەل بۇزعانىن راستالدى. سونداي-اق ول سوققىدان كەيىن ايەلدىڭ جاعدايىنا ءمان بەرمەي, ءبىرىنشى كەزەكتە كولىككە الاڭداۋشىلىق بىلدىرگەنى دە سوتتا ەسكەرىلدى.
جابىرلەنۋشىنىڭ ماتەريالدىق جانە مورالدىك زياندى وتەۋ تۋرالى تالابى ءىشىنارا قاناعاتتاندىرىلدى. ايەلدىڭ پايداسىنا 1 212 160 تەڭگە ماتەريالدىق وتەماقى, 15 ملن تەڭگە كولەمىندە مورالدىق شىعىن ءوندىرىپ الىنۋى كەرەك.
«سوت ەر ادامدى 24-بابىنىڭ 3-ءبولىمى, 99-بابىنىڭ 1-بولىمىندە كوزدەلگەن قىلمىستاردى جاساعانى ءۇشىن كىنالى دەپ تانۋ جانە وعان ورتاشا قاۋىپسىزدىك قىلمىستىق اتقارۋ جۇيەسىنىڭ مەكەمەلەرىندە جازاسىن وتەي وتىرىپ, 8 جىل مەرزىمگە باس بوستاندىعىنان ايىرۋ جازاسىن تاعايىنداۋ تۋرالى ۇكىم شىعاردى», — دەدى سۋديا.
ۇكىم زاڭدى كۇشىنە ەنگەن جوق.
