Pavlodar turǵyny burynǵy áıelin kóligimen qasaqana qaǵyp, múgedek qylǵan

Pavlodarda áıelin kólikpen qasaqana qaǵyp, densaýlyǵyna aýyr zııan keltirdi degen aıyppen 41 jastaǵy er adam sot aldyna keldi. Aıyptalýshy kinásin moıyndady, dep habarlaıdy Qandastar.kz aqparat portaly Pavlodarnews.kz-ke silteme jasap.

Basylymnyń habarlaýynsha, oblystyq Qylmystyq ister jónindegi mamandandyrylǵan aýdanaralyq sotynda 41 jastaǵy er adamǵa qatysty Qylmystyq kodekstiń 24-baby 3-bólimi, 99-baby 1-bólimi boıynsha qylymystyq is qaraldy.

Oǵan bıyl qańtarda burynǵy azamattyq nekede turǵan áıeline qasaqana aýyr dene jaraqatyn keltirdi degen aıyp taǵyldy.

Is materıaldaryna súıensek, ekeýi tamaq satatyn pavılonǵa jol tartqan boıda janjaldasqan. Áıel kóliktiń salonynan shyǵyp, pavılonǵa qaraı júgirgen kezde aıyptalýshy kólikti oǵan qaraı baǵyttap, qaqqan. Oqıǵadan keıin jábirlenýshiniń bir aıaǵyna ampýtaııa jasaldy. Ol birneshe aı tósekke tańylyp, aýrýhanada jatyp shyqty.

Barlyq aıǵaq pen dáleldemeni zertteý barysynda sottalýshynyń kinási, ıaǵnı, kisi óltirýge oqtalý deregi dáleldendi.

«Qorǵaýshy tarap sotqa avtokóliktiń aqaýy bolǵanyna sendirýge tyrysty. Biraq arnaıy maman mashınanyń tehnıkalyq turǵyda jaramdy kúıde ekenin rastady. Gaz pedali jáne tejegishten aqaý anyqtalǵan joq», — dedi sýdıa Qudabaı Soltanov.

Sarapshy pavılonnan túsirilgen beınejazbanyń kadrlarynda avtokóliktiń áıelge qaraı baǵyttalǵany aıqyn kórinetinin jetkizdi. Iaǵnı, aıyptalýshy áıeldi pavılon qabyrǵasyna qaraı ıterip, osylaısha jol qozǵalysy erejelerin óreskel buzǵanyn rastaldy. Sondaı-aq ol soqqydan keıin áıeldiń jaǵdaıyna mán bermeı, birinshi kezekte kólikke alańdaýshylyq bildirgeni de sotta eskerildi.

Jábirlenýshiniń materıaldyq jáne moraldik zııandy óteý týraly talaby ishinara qanaǵattandyryldy. Áıeldiń paıdasyna 1 212 160 teńge materıaldyq ótemaqy, 15 mln teńge kóleminde moraldyq shyǵyn óndirip alynýy kerek.

«Sot er adamdy 24-babynyń 3-bólimi, 99-babynyń 1-bóliminde kózdelgen qylmystardy jasaǵany úshin kináli dep taný jáne oǵan ortasha qaýipsizdik qylmystyq atqarý júıesiniń mekemelerinde jazasyn óteı otyryp, 8 jyl merzimge bas bostandyǵynan aıyrý jazasyn taǵaıyndaý týraly úkim shyǵardy», — dedi sýdıa.

Úkim zańdy kúshine engen joq.