پاۆلوداردا الا قوڭىز قاپتاپ كەتتى

پاۆلوداردا الا قوڭىز قاپتاپ كەتتى. زيانكەستەر جاسىل جەلەكتى وتاپ, باۋ-باقشانى تۇگەل كەمىرىپ جاتىر, دەپ حابارلايدى Qandastar.kz اقپارات پورتالى turkystan.kz-كە سىلتەمە جاساپ. 

تۇرعىندار بيىل وبلىستا ءتۇرلى جاندىكتەر كوبەيىپ كەتكەنىنە الاڭداۋلى. اسىرەسە, باۋ-باقشالاردا ءتۇرلى قوڭىزدار تاراپ, وسىمدىكتەردىڭ ساباعىمەن قوسا, تامىرىن دا جەپ جاتىر. سونىڭ ءبىرى — ساياجاي يەلەرى بۇرىن-سوڭدى كورمەگەن قارا الا قوڭىزدار.

— مۇنداي الا قوڭىزداردى بۇرىن كەزدەستىرمەپپىز. كوبىنە كولورادو قوڭىزى كارتوبىمىزعا تۇسەتىن. ول ءوزى باياۋ جاندىك. ال مىناۋ وتە جىلدام جۇرەدى, جولىنداعىنىڭ ءبارىن جەپ جاتىر. جاپىراق جەمىرى سياقتى, تامىرلانعان وسىمدىكتەردىڭ بارلىعىن جايپايدى, — دەپ مۇڭىن شاقتى پاۆلودار قالاسىنىڭ تۇرعىنى ۆيكتوريا الەكسەەۆا.

قازىرگى ۋاقىتتا وبلىس ورتالىعىنداعى ساياجاي يەلەرىنە قالا اكىمدىگى جاندىكتەرگە قارسى حيميالىق وڭدەۋ كونتسەنتراتىن تاراتىپ جاتىر. ءبىر ءليترى بىرنەشە ساياجاي تەلىمىن وڭدەۋگە جەتكىلىكتى. الايدا تۇرعىندار پرەپارات ماسەلەسىن شەشپەي وتىرعانىن ايتادى.

اگروونەركاسىپتىك كەشەندەگى مەملەكەتتىك ينسپەكتسيا كوميتەتىنىڭ پاۆلودار وبلىستىق اۋماقتىق ينسپەكتسياسىنىڭ باسشىسى ارمان شۇيكەنوۆتىڭ سوزىنشە, الا قوڭىزدار كارانتينگە جاتپايدى.

— وبلىس بويىنشا مونيتورينگ جانە زەرتتەۋ جۇمىستارىمەن رەسپۋبليكالىق فيتوسانيتارلىق دياگنوستيكا جانە بولجاۋ ادىستەمەلىك ورتالىعىنىڭ پاۆلودارداعى فيليالى اينالىسادى. زيانكەستەردى انىقتاعاننان كەيىن ولار زياندى جاندىكتەرمەن كۇرەسۋ بويىنشا تۇرعىندارعا ۇسىنىستار بەرەدى. قر اۋىل شارۋاشىلىعى ءمينيسترىنىڭ 2020 جىلعى №100 بۇيرىعىنا سايكەس, تەك شەگىرتكەگە قارسى كۇرەسكە مەملەكەتتىك بيۋدجەتتەن قاراجات بولىنەدى. ودان وزگە زيانكەستەرگە قارسى حيميالىق وڭدەۋ جۇمىستارىن مەنشىك يەلەرى جانە تاۋار وندىرۋشىلەر ءوز قاراجاتى ەسەبىنەن جۇرگىزۋى ءتيىس, — دەيدى ينسپەكتسيا باسشىسى.