ءبىلىم
پاۆلوداردا بۋحگالتەر بىرنەشە بالاباقشادان 50 ملن تەڭگەدەن استام قاراجات ۇرلاعان
فوتو: اشىق دەرەككوز
پاۆلوداردا بيۋدجەت قاراجاتىن جىمقىرعانى ءۇشىن بۋحگالتەر مەن شارۋاشىلىق مەڭگەرۋشىسى سوتتالدى, دەپ حابارلادى turkystan.kz Azattyq Ryhy-نا سىلتەمە جاساپ.
پاۆلوداردا №2 سوت قىزمەت بابىن پايدالانا وتىرىپ, الدىن الا ءسوز بايلاسۋ ارقىلى ادامدار توبى جاساعان بيۋدجەت قاراجاتىن جىمقىرۋ فاكتىسى بويىنشا قىلمىستىق ءىستى قارادى. بۋحگالتەر مەن شارۋاشىلىق مەڭگەرۋشىسى جالپى سوماسى 53 ميلليون تەڭگەدەن استام مەملەكەتتىك قاراجاتتى ۇرلاعانى ءۇشىن كىنالى دەپ تانىلدى.
2022 جىلدىڭ قاڭتارىنان 2024 جىلدىڭ ناۋرىزىنا دەيىن پاۆلودار قالاسىنىڭ №4 بالاباقشاسىنىڭ بۋحگالتەرى ب.ا. ب.ج. ءسوز بايلاسىپ, ەسەپ ايىرىسۋ-تولەم ۆەدوموستارىن زاڭسىز قۇراستىرىپ, ءوز شوتتارىنا قاراجات اۋدارعان.
«سونداي-اق, اققۋلى اۋدانىنىڭ «قىزعالداق» بوبەكجاي-باقشاسىندا ەسەپشى بولا وتىرىپ, پاۆلودار قالاسىندا قاشىقتان جۇمىس ىستەپ, 2023 جىلعى جەلتوقسان مەن 2024 جىلعى مامىر ارالىعىندا جالپى سوماسى 7 ميلليون تەڭگەدەن استام بيۋدجەت قاراجاتىن ۇرلادى», – دەلىنگەن سوت حابارلاماسىندا.
پروكۋرور ايىپتالۋشىلارعا جەتى جىلعا باس بوستاندىعىنان ايىرۋ جازاسىن سۇرادى. جابىرلەنۋشىلەردىڭ وكىلدەرى تالاپتاردى تولىق قاناعاتتاندىرۋدى تالاپ ەتىپ, جازانى سوتتىڭ قاراۋىنا قالدىردى.
«سوت جەڭىلدەتەتىن جاعدايلاردى ەسكەرە وتىرىپ, كىنانى تولىق مويىنداۋ, شىن جۇرەكتەن وكىنۋ, وڭ سيپاتتاما, كەلتىرىلگەن زالالدى ءىشىنارا وتەۋ, ب.ا.-نىڭ اسىراۋىندا بەس جاسار بالانىڭ بولۋى, ب.ا. جانە ب.ج. 7 جىل مەرزىمگە باس بوستاندىعىنان ايىرۋ تۇرىندەگى جازا, ب.ا. مەملەكەتتىك ۇيىمداردا بۋحگالتەرلىك قىزمەتپەن اينالىسۋ قۇقىعىنان ايىرۋ مەرزىمىمەن 5 جىل ىشىندە ب.ج. ماتەريالدىق جاۋاپكەرشىلىككە بايلانىستى مەملەكەتتىك ۇيىمداردا 5 جىل مەرزىمگە قىزمەت اتقارۋ قۇقىعىنان ايىرىلدى», – دەپ حابارلادى سوتتا.
ۇكىم زاڭدى كۇشىنە ەنگەن جوق.
