جاڭالىقتار
پاۆلوداردا قىز ۇزاتۋ تويىندا 27 ادام ۋلانىپ قالعان
پاۆلوداردا وتكەن قىز ۇزاتۋ تويىندا قوناقتار جاپپاي ۋلانىپ, 27 ادام اۋرۋحاناعا ءتۇستى, دەپ حابارلايدى Qandastar.kz اقپارات پورتالى.
توي 7 ماۋسىم كۇنى قالاداعى مەيرامحانالاردىڭ بىرىندە وتكەن. ۇزاتۋ تويىندا شامامەن 150 قوناق بولعان.
وبلىستىق جەدەل مەديتسينالىق جاردەم ستانتسياسىنىڭ حابارلاۋىنشا, زارداپ شەككەن قوناقتاردان العاشقى قوڭىراۋلار 8 ماۋسىمدا تۇسە باستاعان.
«33 ادام جۇگىندى, ولاردىڭ ىشىندە جۇكتى ايەل مەن بالا بار. 26 ەرەسەك ادام ينفەكتسيالىق اۋرۋحاناعا, بالا وبلىستىق بالالار اۋرۋحاناسىنا جاتقىزىلدى. بارلىعىنا ورتاشا اۋىرلىقتاعى تاماقتان ۋلانۋ دياگنوزى قويىلدى. 9 ماۋسىم كۇنى سول ءىس-شاراعا قاتىسقان تاعى ءبىر ادام جۇگىندى», – دەدى دارىگەرلەر.
پاۆلودار وبلىستىق دەنساۋلىق ساقتاۋ باسقارماسىنىڭ مالىمەتىنشە, باكتەريالدى ىشەك ينفەكتسياسىنىڭ بەلگىلەرىمەن بارلىعى 29 ادام جۇگىنگەن.
«ولاردىڭ 15-ءى اۋرۋحاناعا جاتقىزىلدى, قالعاندارى امبۋلاتوريالىق ەم الىپ جاتىر. پاتسيەنتتەردىڭ جاعدايى ورتاشا اۋىر دەپ باعالانۋدا, بەلگىلەرى: ينتوكسيكاتسيا, ءىش ءوتۋ جانە دەنە قىزۋىنىڭ كوتەرىلۋى. بارلىق ناۋقاسقا قاجەتتى ەم تاعايىندالعان», – دەپ مالىمدەدى ۆەدومستۆو.
توي وتكەن مەيرامحانادا سانيتارلىق-ەپيدەميولوگيالىق قىزمەتتىڭ ماماندارى جۇمىس جۇرگىزۋدە. تاعام ونىمدەرىنەن سىناما الىنعان, بىراق زەرتحانالىق ساراپتامانىڭ ناتيجەلەرى ءالى جاريالانعان جوق. العاشقى زەرتحانالىق ساراپتاما ناتيجەلەرى الداعى اپتادا بەلگىلى بولادى دەپ كۇتىلۋدە.
