پاۆلوداردا وقۋشىلار مىنگەن اۆتوبۋس اپاتقا ۇشىرادى

18 ساۋىردە استانا-ەرەيمەنتاۋ-شىدەرتى تاس جولىندا سالونىندا 16 ءجاسوسپىرىم مەن ولاردىڭ جاتتىقتىرۋشىسى بار شاعىن اۆتوبۋس جول اپاتىنا ۇشىرادى. جاتتىقتىرۋشى وقيعا ورنىندا قازا تاپتى, دەپ حابارلايدى qandastar.kz

اقمولا وبلىستىڭ پوليتسيا دەپارتامەنتىنىڭ مالىمەتىنشە, اۆتوبۋس Mercedes كولىگىنە سوقتىعىسقان.

«كولىك جۇرگىزۋشىسى جۇك كولىگىن باسىپ وزۋ كەزىندە ونىڭ اۋدارىلىپ كەتۋىنە سەبەپ بولعان. شاعىن اۆتوبۋستا 14 پەن 16 جاس ارالىعىنداعى 16 بالا مەن ءبىر جاتتىقتىرۋشى بولعان. اپات سالدارىنان جاتتىقتىرۋشى وقيعا ورنىندا كوز جۇمدى», – دەلىنگەن حابارلامادا.

جاسوسپىرىمدەر پاۆلوداردان استاناعا سپورتتىق جارىسقا بارا جاتقان. بالالار مەديتسينالىق مەكەمەگە جەتكىزىلىپ, دارىگەرلەردىڭ باقىلاۋىنا الىندى.

قىلمىستىق ءىس قوزعالىپ, تەرگەۋ امالدارى ءجۇرىپ جاتىر.

وبلىستىق پوليتسيا دەپارتامەنتىنىڭ حابارلاۋىنشا, ساپاردى ۇيىمداستىرعان جەكەمەنشىك سپورت مەكتەبىنىڭ باسشىلىعى پوليتسياعا حابار بەرمەگەن, سوندىقتان پاترۋلدىك قىزمەت كورسەتىلمەگەن. بۇل وقيعاعا بايلانىستى تەرگەۋ باستالدى.