پاۆلودارلىق بالاباقشا سابيلەرگە التى ءتىل ۇيرەتپەك

پاۆلودار قالاسىندا №56 بالاباقشا ىسكە قوسىلعاننان كەيىن مۇندا قازاق, ورىس جانە اعىلشىن تىلدەرىنەن بولەك, قىتاي, كارىس, تۇرىك نەمەس جاپون تىلدەرى وقىتىلۋى مۇمكىن, دەپ حابارلايدى https://pavlodarnews.kz سايتىنا قازاقپارات سىلتەمە جاساپ.
ءمالىم بولعانداي, بالالارعا بىرنەشە ءتىلدى وقىتۋ اتا-انالاردىڭ ءوتىنىشى بويىنشا قولعا الىنباق. بۇرىنعى «ستيكس» مەكتەبىنىڭ ورنىنا اشىلاتىن №56 بالالار باقشاسىنىڭ جوندەۋ جۇمىستارىمەن تانىسقان پاۆلودار اكىمى ءانۋار كۇمپەكەەۆ اتقارىلىپ جاتقان جۇمىستارعا قاناعاتتاندى. «مۇندا قازاق, ورىس جانە اعىلشىن تىلدەرىن وقىتۋمەن شەكتەلمەيمىز. قازىرگى كەزدە ازيا تىلدەرى زور بولاشاققا يە. بالالار باقشاسىندا قىتاي, كارىس, ءتىپتى جاپون تىلدەرىن وقىتۋىمىز مۇمكىن. ارينە, بۇعان اتا-انالار نيەت ءبىلدىرىپ جاتسا», — دەيدى ءانۋار كۇمپەكەەۆ. №56 بالاباقشا باسشىسىنىڭ مىندەتىن اتقارۋشى عافۋرا ماحمەتوۆانىڭ ايتۋىنشا, پايدالانۋعا بەرىلگەن كەزدە باقشادا 10 توپقا بولىنگەن 230 بالا تاربيەلەنەدى. «بالاباقشا بەس كۇندىك 12 ساعاتتىق رەجىممەن جۇمىس ىستەيدى. بىراق دەمالىس كۇندەرى قوسىمشا ساباقتار بەرىلۋى مۇمكىن. ولارعا مەكتەپ الدىنداعى ازىرلىك, ءتىل ساباقتارى سەكىلدى اتا-انالار سۇرانىسى بويىنشا ساباقتار بەرىلەدى. بىزدە بالەت, تەاتر ستۋديالارى جانە بالالار فيتنەس-زالى جۇمىس ىستەيتىن بولادى. وعان قوسا, باقشادا تۇز شاحتاسى, ماسساج جانە فيزيوتەراپيا كابينەتتەرىن جابدىقتاۋ كوزدەلۋدە», — دەيدى عافۋرا ماحمەتوۆا. عافۋرا ماحمەتوۆا ايتقانداي, جوندەۋ جۇمىستارى 12 ناۋرىزدا باستالىپ, جوسپارعا سايكەس 20 ماۋسىمدا اياقتالادى. جوبا قۇنى — 337 ميلليون تەڭگە.

ماقالانىڭ تولىق نۇسقاسى:
https://www.inform.kz/kz/pavlodarlyk-balabaksha-sabilerge-alty-til-uyretpek_a3524594