ءبىلىم
پەداگوگيكا سالاسىندا 9 مىڭ بوس جۇمىس ورنى تىركەلگەن
فوتو: تەنگرينيۋس
قازاقستاندا سۇرانىسقا يە 5 ماماندىق ءتىزىمى شىقتى, – دەپ حابارلايدى qandastar.kz atamekenbusiness تەلەگرام ارناسىنا سىلتەمە جاساپ.
1) ينجەنەريا
19 مىڭ بوس ورىن
كەز كەلگەن ەلدەگى تاپشى ماماندىقتاردىڭ ءبىرى. بىلىكتى ءارى ءبىلىمدى مامانداردىڭ كومەگىمەن قۇرىلىس يندۋسترياسى جانە ءونىمنىڭ اۆتوماتتاندىرىلعان دەڭگەيى ارتادى. قانداي جاعداي بولماسىن, ەلدە داعدارىس بولا قالعان كۇننىڭ وزىندە ينجەنەرلەردىڭ سۇرانىستا بولاتىنى انىق. ءححى عاسىرداعى ينجەنەرلەرگە قويىلاتىن قوس بىردەي تالاپ بار: ءبىرى – اعىلشىن ءتىلىن جەتىك مەڭگەرۋ, ەكىنشىسى – جاڭا تەحنولوگيا ءتىلىن جەتىك ءتۇسىنۋ.
2) IT سالاسى
16 مىڭ بوس ورىن
الەمدە قازىر IT سالاسى بويىنشا ءۇندىستان الدىڭعى ورىندا تۇر. كومپيۋتەردى قۇراستىرۋ مەن سايت جاساۋ كەز كەلگەن تەحنيكا ءتىلىن مەڭگەرگەن مامانعا تاڭسىق ەمەس. الايدا ونىڭ كۇردەلى فۋنكتسيالارىن اتقارۋ, دامىتۋ, ەرەكشەلەۋ سەكىلدى تەكتەرىن مەڭگەرۋ باسقا اڭگىمە. ءبىزدىڭ ءبىلىمدى جاستار ماتەماتيكا سالاسىندا ەڭ ۇزدىكتەر قاتارىندا. ەندەشە, بۇگىن جانە ەرتەڭ جويىلىپ كەتپەيتىن ماماندىق وسى IT سالاسى.
3) ۆەب-ديزاينەر
12 مىڭ بوس ورىن
بۇل بولاشاقتىڭ ماماندىعى. سەبەبى, سايت كەز-كەلگەن كومپانيانىڭ ايناسى, تۇتىنۋشى مەن قولدانۋشى اراسىنداعى كوپىر. جاقسى جاسالىنعان سايت كومپانيالارعا كوپ مۇمكىندىك بەرەدى. سوندىقتان ونى تارتىمدى جانە زامان تالابىنا ساي جاسايتىن مامان جوعارى جالاقى مەن سۇرانىسقا يە بولارى ءسوزسىز.
4) پەداگوگ
مۇعالىم – ەلەكتروندى ەڭبەك بيرجاسىندا 9,2 مىڭ بوس ورىن;
ماتەماتيكا مۇعالىمى (الگەبرا جانە گەومەتريا) – 3,5 مىڭ بوس ورىن;
باستاۋىش سىنىپ مۇعالىمى – 3,3 مىڭ بوس ورىن.
قازاقستاننىڭ ەڭبەك نارىعىندا 5-7 جىلدا سۇرانىسقا يە بولاتىن ماماندىقتار تىزىمىنە– پەداگوگيكا سالاسى ەنىپ وتىر. سەبەبى, ەلىمىزدە قازىردىڭ وزىندە بىرنەشە وبلىس «قىزىل ايماققا» ەنگەن. ياعني, وڭىرلەردە مۇعالىم تاپشىلىعى بايقالادى. بىراق, ماماندىق تاڭداعاندا قىزىعۋشىلىق پەن قابىلەت بولماسا, «ماڭگىلىك ماماندىق» رەتىندە مۇعالىمدىكتى تاڭداپ, ءوزىڭدى قيناۋعا بولمايدى.
5) ەسەپشى
7 مىڭ بوس ورىن
قازىرگى ۋاقىتتا بۋحگالتەريا مەن اۋديت بويىنشا كوپتەگەن كومپانيالار اۋتسورسينگتىك كومپانيالارعا جۇگىنىپ جۇرگەنىمەن, ەسەپشى ماماندىعى ەشقاشان سۇرانىستان تۇسكەن ەمەس. اسىرەسە, دامىعان جانە دامۋشى ەلدەردە ءوز ستاتۋسىن جوعالتپايدى. ەلىمىزدە 7 مىڭ بوس ورىن تۇر.
