«Penthaýstyń jalpy aýdany – 164 sharshy metr»: Bolat Nazarbaevtyń Nıý-Iorktegi páteri 2 mıllıon dollarǵa satylymǵa qoıyldy

Foto: t.me/off_shores/” Salıqaly urpaq” qoǵamdyq qory

Bul páter –  marqum Bolat Nazarbaevtyń osy ýaqytqa deıin jurtqa belgili Amerıkadaǵy sońǵy jyljymaıtyn múlki.

Byltyr qarashada dúnıeden ótken eks-prezıdenttiń inisi Bolat Nazarbaetyń Nıý-Iorktegi páteri 1,995 mıllıon dollarǵa satylymǵa shyǵaryldy, dep habarlaıdy qandastar.kz Skifnews.kz aqparat portalyna silteme jasap. 

Nıý-Iorktegi jergilikti jyljymaıtyn múlik agregatorlarynyń málimetinshe, Bolat Nazarbaevtyń páteri Wall Street 55 meken jaıynda ornalasqan. Bul páter –  marqum Bolat Nazarbaevtyń osy ýaqytqa deıin jurtqa belgili Amerıkadaǵy sońǵy jyljymaıtyn múlki.

Wall Street 55 meken jaıynda bir kezderi Nıý-Iork qor bırjasy, keden jáne Citibank keńseleri ornalasqan edi. Nysan ıeleri ǵımaratty kondomınıýmǵa aınaldyrmas buryn, onda sándi qonaqúı bolǵan. 2006 jyly sońǵy jóndeýden keıin ǵımarattaǵy páterlerdi alǵashqy bolyp akter Mıkkı Rýrk pen sýpermodel Naomı Kempbell satyp aldy. 2007 jyly Bolat Nazarbaev sol ǵımarattan páter satyp alyp, tanymal tulǵalarmen kórshi turdy.

“Penthaýstyń jalpy aýdany – 164 sharshy metr. Onyń ishinde eki jatyn bólmesi, as jáne qonaq bólmesi, úsh jýynatyn bólmesi men keń terrasasy bar. 2,7 mıllıon dollarǵa satylyp alynǵan penthaýs alǵashynda Bolat Nazarbaevtyń ógeı balasy, Maıra Qurmanǵalıevadan týǵan Danııardyń atyna jazyldy. Sondaı-aq onyń atynda dál osy ǵımarattan taǵy bir páter bar. №702 páterdi Danııar 2011 jyly 940 myń dollarǵa satpaqshy bolǵan. Biraq Bolat Nazarbaev Maıramen aradaǵy janjaldan keıin bul múlikti qaıtaryp alǵan”, – dep jazdy “Vyhod k morıý” Telegram arnasy.

Maıra Qurmanǵalıeva sot arqyly burynǵy kúıeýinen baılyǵynyń jartysyn, onyń ishinde AQSh-taǵy jyljymaıtyn múlkin talap etken. Nátıjesinde 2011 jyly Qurmanǵalıeva alaıaqtyq jasap, adam urlady dep aıyptalyp, Qazaqstanda izdeýge jarııalandy.

Bolat Nazarbaev ógeı uly men burynǵy áıelin ózinen ondaǵan mıllıon dollar aqsha urlady dep aıyptap, Nıý-Iorktegi sotqa júgindi. Bolat pen Maıra arasyndaǵy sot proesi birneshe jylǵa sozyldy. Nátıjesinde Bolat Nazarbaevtyń Nıý-Djersıdegi quny 20 mıllıon dollar turatyn záýlim úıine Maıra Qurmanǵalıeva men onyń uly ıe boldy. Esesine, olar Maıamı men Nıý-Iorktegi páterlerdi talap etpeıtinderin jetkizdi. Aqyry Bolat Nazarbaev Florıdadaǵy jyljymaıtyn múlikti 1,4 mıllıon dollarǵa satqan.

Telegram arnanyń málimetinshe, 2 mıllıonǵa satylymǵa qoıylǵan penthaýsty Bolat Nazarbaev 2016 jyly óziniń kómekshisi Batyrjan Ahmetovtyń atyna jazǵan. Batyrjan Ahmetov sol kezde Nazarbaevtyń jeke kollektorlyq agenttigi men basqa da birqatar shaǵyn fırmalardy basqarǵan edi. Nıý-Iork jyljymaıtyn múlik tizilimine sensek, penthaýs áli kúnge deıin Baýyrjan Ahmetovtyń atynda. Sonymen qatar jyljymaıtyn múlik agregatorlarynyń dereginshe, penthaýs ótken jyldyń jazynan bastap, ıaǵnı Bolat Nazarbaevtyń kóz tirisinde satylymǵa qoıylǵan.

2022 jylǵy qańtardaǵy oqıǵadan keıin Bolat Nazarbaev pen onyń muragerleri jyldar boıy jınaǵan múlkiniń bir bóliginen aıyryldy. Bazarlar, kásiporyndar men seriktestikterdegi úlesi men júzdegen gektar jer tárkilendi. Bolat Nazarbaev reıderlik basyp alýǵa qatysy bar degen aıyptaýlardyń astynda qaldy. Tárkilengen múliktiń bir bóligi memleketke qaıtaryldy.