Perızat isinde negizgi fıgýranttar tasady qaldy – Arýjan Saın

Kollaj: sn.kz

Perızatty 10 jylǵa, anasyn 7 jylǵa sottaǵan asa iri alaıaqtyq oqıǵasyna qatysty Arýjan Saın pikir bildirdi.  Onyń pikirinshe, úsh jyl ishinde 3,5 mıllıard teńge jınaǵan qordyń áreketi eshqandaı logıkaǵa syımaıdy, dep habarlaıdy qandastar.kz

«Úsh jylda 3,5 mıllıard teńge jınaý qııal ǵajaıyppen para-par jaǵdaı. El ishine asa tanymal emes, jelókpe, jańadan paıda bolǵan eriktilerdiń ákimshilik resýrstyń qoldaýynsyz mundaı kólemde qarjy jınaýy múlde múmkin emes.

Meniń anyq kóz jetkizgenim qordyń artynda Nur Otan (qazirgi Amanat) partııasy turdy. Aımaqtarda partııanyń otyrystarynda qordy qoldaý qajettigi ashyq aıtylǵanyn sot kezinde de estidik.

Osyndaı úndeýlerden keıin kásipkerler muny mindet dep qabyldaǵany sózsiz», – deıdi Saın Informburo-ǵa bergen suhbatynda.

Sózinshe, qor pandemııa kezinde keń tanylǵan «Biz Birgemiz» uranyn qoldanǵan soń, halyq ony bılikpen baılanysty dep oılap, shúbásiz sengen.

Skifnews.kz   jazǵandaı, qoǵam belsendisi 9 synyptyq bilimi bar Perızattyń jalǵyz ózi osynshama kúrdeli operaııany uıymdastyrýy ekitalaı deıdi.

Onyń paıymdaýynsha, bul jerde odan áldeqaıda yqpaldy adamdardyń kóleńkesi kórinedi.

«Jas qyzdyń anasymen birge isti bolyp otyrǵanyna qarap, bulardyń artynda ózge de qoldaýshylar bar dep bilemin. Eger Perızat osy júıeniń qalaı jumys istegenin, aqsha qaıda, kimge ketkenin, kimmen qalaı bóliskenin ashyq aıtsa, tergeýdiń ary qaraı jyljýyna múmkindik týar edi. Budan paıda kórgen negizgi benefıarlardy anyqtaýǵa bolady. Meni alańdatatyny naqty uıymdastyrýshylardyń tasada qalyp qoıýy», – dedi Arýjan Saın.