پەريزات قايرات باسقارعان قايىرىمدىلىق قور جابىلادى: ءىس قالاي وربىمەك?

فوتو:

بىلتىرعى ەلىمىزدەگى سۋ تاسقىنى كەزىندە قينالعان جۇرتقا قول ۇشىن سوزىپ, حالىقپەن ءبىر كىسىدەي جۇمىلعان پەريزات قايراتتىڭ «ارتى» تازا بولماي شىقتى. تاسقىن كەزىندە حالىقتىڭ كيىم-كەشەك, تاماق-سۋىنا دەپ اقشا جينايمىز دەپ اشىلعان BizBirgemizQazaqstan2030 قايىرىمدىلىق قورى جابىلىپ قالدى. ول حالىقتان جينالعان ميللياردتاعان قارجىنى جىمقىردى دەگەن كۇدىككە ءىلىنىپ, قازىرگى ۋاقىتتا تەرگەۋدە وتىر, دەپ حابارلايدى qandastar.kz

پەريزات قايرات نە ءۇشىن ۇستالدى?

قايىرىمدىلىق قورعا 2021 جىلدان بەرى جەتەكشىلىك ەتىپ كەلگەن پەريزات قايرات حالىقتان جينالعان 1,5 ملرد تەڭگەنى جىمقىردى دەگەن ايىپپەن قاماۋعا الىنعان بولاتىن. قارجى مونيتورينگى اگەنتتىگىنىڭ حابارلاۋىنشا, ول سۋ تاسقىنىنا, پالەستيناداعى سوعىستان زارداپ شەككەن حالىققا, مۇگەدەك بالالاردى وڭالتۋعا جينالعان قاراجاتتى زاڭسىز يەمدەنگەن.

بۇل قاراجاتقا قاراجاتقا ايىپتالۋشى ءسان-سالتاناتپەن ءومىر ءسۇرىپ, ليۋكس ساناتتاعى ۇيلەر مەن كولىكتەر ساتىپ العان. سونىمەن بىرگە ۇنەمى الەمدىك قىمبات برەندتەردىڭ كيىم-كەشەگى مەن بۇيىمدارىن پايدالانعان. اتاپ ايتقاندا, 88 ملن تەڭگەلىك «Mercedes-Benz S450», 80 ملن تەڭگەلىك «Lexus LX-600″ ماركالى كولىكتەرىن مىنگەن. Cartier, Graff, Rolex, Bulgari, Gucci, Louis Vuitton, Versace, Chopard, Hermes, Dolce & Gabbana, Prada سەكىلدى الەمدىك برەندتەردىڭ كيىمى مەن بۇيىمدارىن پايدالاۆنىپ كەلگەن.

بۇل قورعا سۋ تاسقىنى كەزىندە بىرنەشە بانك پەن باسقا دەمەۋشىلەر قوماقتى قاراجات قۇيعان. قوردىڭ قۇرىلتايشىلارى قاتارىندا ماتيۋشەنكو سەرگەي ۆلاديميروۆيچ, ماعزۇم ارسلانبەك تالعات ۇلى, تۇرعانباي شاديار دوكتور ۇلى, امانباي ارۋجان ورازبايقىزى, بولىسوۆ توقتار كوممۋناروۆيچ, حيسماتۋللين دامير ساكەنوۆيچ, سەريكجانوۆا ايگەرىم تەلجانوۆا, سەيىتقامال گۇلناز نۇرلانقىزى, حافيزا ايان باۋىرجان ۇلى سىندى ادامدار دا بولعان.

قايىرىمدىلىققا جينالعان قوماقتى قارجىنى ۇرلادى دەگەن ايىپپەن قامالعان «BizBirgemiz Qazaqstan» قايىرىمدىلىق قورىنىڭ جەتەكشىسى پەريزات قايراتتىڭ ءىسىن تەرگەۋ اياقتالۋعا جاقىن. بۇل تۋرالى قارجىلىق مونيتورينگ اگەنتتىگى توراعاسىنىڭ ورىنباسارى جەڭىس ەلەمەسوۆ ءمالىم ەتتى.

تەرگەۋ قاشان اياقتالادى

«قازىرگى ۋاقىتتا تەرگەۋ امالدارىن اياقتاپ قالدىق. جۋىق ارادا تەرگەۋدىڭ بىتكەنىن حابارلاپ, ءىس ماتەريالدارىمەن تانىسۋ كەزەڭىنە وتەمىز. تانىسۋ قانشا ۋاقىتقا سوزىلاتىنىن ناقتى ايتا المايتىن», – دەدى ءماجىلىس كۋلۋارىندا جۋرناليستەردىڭ سۇراعىنا بەرگەن جاۋابىندا.

ونىڭ ايتۋىنشا, ءىس ماتەريالدارى ون تومنان اسقان. سوت قاشان وتەتىنى تاراپتاردىڭ ءىس ماتەريالدارىمەن تولىق تانىسىپ شىعۋىنا بايلانىستى بولماق. تەرگەۋ شامامەن ناۋرىز ايىنىڭ باسىندا اياقتالۋى مۇمكىن.

جاڭا ەپيزود انىقتالعان

جەڭىس ەلەمەسوۆ پەريزات قايرات قازىرگى تاڭدا الاياقتىق جانە قىلمىستىق جولمەن الىنعان اقشانى زاڭداستىرۋ باپتارى بويىنشا ايىپتالىپ وتىرعانىن اتاپ ءوتتى.

«كۇدىكتى بۇعان دەيىن سۋ تاسقىنىنا, پالەستيناعا كومەك رەتىندە جينالعان قاراجاتتى جىمقىرۋ ەپيزودتارى بويىنشا تەرگەلىپ كەلگەن. جۋىردا مۇگەدەك بالالاردى وڭالتۋعا ارنالعان ورتالىق اشۋعا دەپ اۋكتسيون وتكىزىپ, 22 ميلليون تەڭگە جيناپ, ونى دا ءوز ماقساتىنا جۇمساعانى انىقتالدى», – دەيدى ول.

ەلەمەسوۆ پەريزات قايراتتان بولەك, ونىڭ اناسى دا كۇدىككە ىلىنگەنىن, الايدا ول قامالماعانىن جەتكىزدى.

«BizBirgemiz Qazaqstan» قايىرىمدىلىق قورىنىڭ جەتەكشىسى پەريزات قايرات 2024 جىلعى سۋ تاسقىنى كەزىندە زارداپ شەككەن حالىققا جينالعان 1,5 ملرد تەڭگەگە جۋىق قاراجاتتى ۇرلادى دەگەن كۇدىككە ىلىنگەن. قارجىلىق مونيتورينگ اگەنتتىگى كۇدىكتى جىمقىرعان قارجىنى ءزاۋلىم ۇيلەر مەن پاتەرلەر, قىمبات كولىكتەر, اسىل بۇيىمدار مەن برەندتىك كيىمدەر ساتىپ الۋعا, شەتەلدە قىدىرۋعا جاراتقانىن ايتادى.

Bizbirgemizqazaqstan قايىرىمدىلىق قورىنىڭ جەتەكشىسى پەريزات قايرات قىمبات جىلجىمالى جانە جىلجىمايتىن مۇلكىنەن بولەك, كيىم-كەشەگىنەن ايىرىلۋى مۇمكىن. ويتكەنى ولار تاركىلەنگەن. بۇل تۋرالى قارجى مونيتورينگى اگەنتتىگىنىڭ ءباسپاسوز قىزمەتى حابارلادى.

«قما قوعامدىق قايىرىمدىلىق قورىنىڭ تەڭ قۇرىلتايشىسى جانە باسشىسى پەريزات قايراتقا قاتىستى تەرگەۋدى جالعاستىرۋدا», – دەلىنگەن ءباسپاسوز قىزمەتى حابارلادى.

قما پەريزات قايراتتىڭ ۇيىنە ءتىنتۋ جۇرگىزگەن. ناتيجەسىندە قايىرىمدىلىققا جينالعان قاراجاتقا ساتىپ الىنعان قىمبات دۇنيە-مۇلكىن انىقتاعان. ولاردىڭ اراسىندا قىمبات تەحنيكا مەن Cartier, Graff, Rolex, Bulgari, Gucci, Louis Vuitton, Versace, Chopard, Hermes, Dolce & Gabbana, Prada جانە ت. ب. تانىمال الەمدىك برەندتەردىڭ كيىمى مەن بۇيىمدارى بولعان. بۇل قىمبات زاتتاردىڭ بارلىعى تاركىلەنگەن.

اگەنتتىك پەريزات قايراتتىڭ جىمقىرعان اشاسىنىڭ سوماسى وسكەنىن حابارلايدى. العاشقىدا 1,5 ملرد تەڭگەنى جىمقىرعانى حابارلانعان. ال ەندىگى سوما 1,7 ملرد تەڭگەگە وسكەن. پەريزات قايرات كوكتەمگى سۋ تاسقىنىنان زارداپ شەككەن ازاماتتارعا جينالعان كومەكپەن قاتار, پالەستينا تۇرعىندارىنا گۋمانيتارلىق كومەككە دەپ جيناعان قازاقستاندىقتاردىڭ قاراجاتىن جىمقىردى دەگەن كۇدىككە ىلىككەن.

«تاركىلەنگەن م ۇلىك زاتتاي دالەلدەمەلەر رەتىندە تانىلىپ, ءىس ماتەريالدارىنا قوسىلدى. تاركىلەنگەن زاتتارعا قاتىستى شەشىمدى سوت شىعارادى. تەرگەۋ جالعاسۋدا», – دەپ حابارلايدى اگەنتتىك.

ەندى جوعارى اۋديتورلىق پالاتا بيۋدجەتتەن تىس قورلاردىڭ دا اشىقتىعىنا تەكسەرىس جۇرگىزۋى مۇمكىن. ونىڭ ىشىندە قايىرىمدىلىق قورلارى دا بار. بۇل جايىندا پالاتا توراعاسى ءاليحان سمايىلوۆ ءمالىم ەتتى.

سمايىلوۆتىڭ ايتۋىنشا, بۇگىندە جوعارى اۋديتورلىق پالاتانىڭ (جاپ) بيۋدجەتتەن تىس  قورلاردى تەكسەرۋگە قۇزىرەتى جوق. الداعى ۋاقىتتا پالاتا ونداي قورلارعا دا اۋديت جۇرگىزۋدى كوزدەپ وتىر.

«وزدەرىڭىز بىلەتىندەي, پالاتا تەك مەملەكەتتىك بيۋدجەت قاراجاتىن جانە مەملەكەتتىك جانە كۆازيمەملەكەتتىك ۇيىمداردا بار اكتيۆتەردى پايدالانۋ ءاۋديتىن جۇرگىزەدى. دەگەنمەن قاراستىرىلىپ جاتقان بيۋدجەت كودەكسى جوباسى اياسىندا ءبىز جاپ-قا مەملەكەتپەن بايلانىستى بيۋدجەتتەن تىس قورلاردى تەكسەرۋ قۇقىعىن بەرۋ تۋرالى ۇسىنىس ەنگىزدىك. مۇنداي قورلار مەملەكەت قۇرعان, مەملەكەت قاتىسقان نەمەسە ولارعا مەملەكەتتىك فۋنكتسيالار جۇكتەلگەن جاعدايلاردا اۋديت جۇرگىزۋ مۇمكىندىگىن قاراستىرۋ ماڭىزدى. بۇل ۇسىنىس قابىلدانسا, جاپ-تىڭ بيۋدجەتتەن تىس قورلارداعى قاراجاتتىڭ دۇرىس جانە ءتيىمدى پايدالانىلۋىن تەكسەرۋ وكىلەتتىگى پايدا بولادى», – دەدى ءاليحان سمايىلوۆ.

پالاتا توراعاسى جۋرناليستەردىڭ «قازاقستان حالقىنا» قورى تەكسەرىلە مە» دەگەن ساۋالىنا دا جاۋاپ بەردى.

«قازاقستان حالقىنا» قورى بيۋدجەت قاراجاتىنان قۇرىلماعان. وسىعان بايلانىستى جاپ-تىڭ مۇنداي قورلاردى تەكسەرۋگە قۇزىرەتى جوق,– دەدى پالاتا توراعاسى.

دەسە دە, سمايىلوۆ پالاتادا مۇنداي قايىرىمدىلىق قورلارىن تەكسەرۋ قۇزىرەتى بولماسا دا, ولاردىڭ اشىقتىعىن قامتاماسىز ەتۋ كەرەك ەكەنىن ايتادى. ءتىپتى ءوزىنىڭ ۇسىنىسىن جەتكىزدى.

«مەنىڭ ويىمشا, قاراجاتتىڭ اشىقتىعى ءۇشىن مۇنداي قوعامدىق ۇيىمدار تاۋەلسىز اۋديتورلىق كومپانيالاردى تارۋى كەرەك. وسىلايشا, دەمەۋشىلەر مەن قايىرىمدىلىق كومەك كورسەتۋشىلەرگە قاراجاتتىڭ قالاي جانە قايدا جۇمسالعانى تۋرالى ەسەپ بەرۋى ءتيىس. بۇل ماسەلە, ەڭ الدىمەن, وسىنداي قايىرىمدىلىق قورلاردىڭ ۇيىمداستىرۋشىلارىنىڭ جاۋاپكەرشىلىگىندە. قوعامدىق سەنىمدى ساقتاۋ جانە قاراجاتتىڭ ءتيىمدى پايدالانىلۋىن قامتاماسىز ەتۋ ءۇشىن بۇل تاجىريبە تۇراقتى تۇردە جۇزەگە اسىرىلۋى قاجەت», – دەپ تولىقتىردى سمايىلوۆ.

سەنات سپيكەرى ماۋلەن اشىمباەۆ تا قازاقستاندىقتاردىڭ قايىرىمدىلىققا اۋدارعان قارجىسىن جىمقىردى دەگەن كۇدىكپەن ۇستالعان Biz birgemiz قورىنىڭ باسشىسى پەريزات قايراتقا قاتىستى ءوز پىكىرىن ءبىلدىردى. جۋرناليستەر سەنات توراعاسىنان كەزىندە پەريزات قايراتتىڭ باستاماسىمەن وڭالتۋ ورتالىعىنىڭ قۇرىلىسىنا قولداۋ بىلدىرگەنىن ەسكە سالىپ, ونىمەن قانشالىقتى جاقىن تانىس ەكەنىن سۇرادى.

«مەن پەريزات قايراتپەن جاقىن تانىس ەمەسپىن. ءارتۇرلى قوعامدىق ءىس-شارالارعا قاتىسىپ, كوپتەگەن اداممەن كەزدەسەتىنىمدى بىلەسىزدەر. ءار اپتادا بىرنەشە رەسمي جانە قوعامدىق شارالار وتكىزىلەدى. بۇرىنعى جىلدارى وسىنداي شارالاردىڭ بىرىندە كەزدەسكەن بولۋىمىز مۇمكىن, بىراق ونىڭ وزىمەن جاقىن ارالاساتىن دەڭگەيدە بولعان ەمەسپىن. ماسەلەنىڭ ءمان-جايى تەرگەۋ ناتيجەسىندە انىقتالادى. بارلىق كۇدىككە ىلىنگەن تۇلعالارعا قاتىستى ناقتى شەشىمدەردى تەك تەرگەۋ ورگاندارى قابىلدايدى, ال كىنالىلەر زاڭ بويىنشا جاۋاپقا تارتىلادى», – دەپ ءتۇسىندىردى اشىمباەۆ.

ال پەريزات قايرات باسقارعان BizBirgemizQazaqstan2030 قايىرىمدىلىق قورى جابىلادى.

استانا قالاسىنىڭ مامانداندىرىلعان اۋدانارالىق ەكونوميكالىق سوتى ادىلەت دەپارتامەنتىنىڭ «Biz birgemiz Qazaqstan 2030» قوعامدىق بىرلەستىگىن تاراتۋ تۋرالى تالابىن قارادى.

س ماتەريالدارىنا سايكەس, وسى زاڭدى تۇلعانى باستاپقى مەملەكەتتىك تىركەۋ 2021 جىلعى 11 قازاندا وتكىزىلدى. بىرلەستىكتىڭ قۇرىلتايشىلارى 10 ادام, ولاردىڭ ەسىمدەرى قايرات پەريزاتتى قوسا العاندا, قۇرىلتاي جينالىستارىنىڭ حاتتامالارىندا كورسەتىلگەن.

قىلمىستىق ءىستى تەرگەۋ بارىسىندا قولجازبا ساراپتاماسى جۇرگىزىلىپ, قورىتىندىسىنا سايكەس, 10 قۇرىلتايشىنىڭ 9-نىڭ اتىنان قۇرىلتاي قۇجاتتارىنا قايرات پەريزات قول قويعان. زاڭدى تۇلعا ازاماتتىق كودەكستىڭ 49-بابىنا سايكەس, زاڭدى تۇلعا ونى قۇرۋ كەزىندە جىبەرىلگەن, جويىلمايتىن سيپاتتاعى زاڭ بۇزۋشىلىقتارعا بايلانىستى جارامسىز دەپ تانىلعان جاعدايدا, سوت شەشىمى بويىنشا تاراتىلۋى مۇمكىن.

— قر جوعارعى سوتىنىڭ «سوتتاردىڭ سالىق زاڭناماسىن قولدانۋدىڭ كەيبىر ماسەلەلەرى تۋرالى» نورماتيۆتىك قاۋلىسىنىڭ 12-تارماعىنا سايكەس — زاڭدى تۇلعانى قۇرۋعا (قايتا تىركەۋگە) قاتىسى جوق زاڭدى تۇلعانى باسشىسىن جانە (نەمەسە) قۇرىلتايشىسىن (قاتىسۋشىسىن) كورسەتە وتىرىپ تىركەۋ (قايتا تىركەۋ) زاڭدى تۇلعانى تاراتۋ (جارامسىز دەپ تانۋ) ءۇشىن نەگىز بولادى, دەلىنگەن سوت حابارلاماسىندا.