پەريزات قايرات باۋىرجان بايبەكتى دە جاۋاپقا تارتۋدى تالاپ ەتتى

استانادا Bizbergemiz Qazaqstan 2030 قوعامدىق بىرلەستىگىنىڭ نەگىزىن قالاۋشىسى پەريزات قايرات وزىنە تاعىلعان ايىپتارمەن كەلىسپەي, سوتتا باۋىرجان بايبەكتى كۋا رەتىندە شاقىرۋدى تالاپ ەتتى, دەپ حابارلايدى Qandastar.kz سايتى Skifnews.kz اقپارات پورتالىنا سىلتەمە جاساپ.

ونىڭ ايتۋىنشا, قايىرىمدىلىق قورى باستاپقىدا پارتيانىڭ باستاماسىمەن قۇرىلعان, ال ول بۇل پروتسەستە تەك ورىنداۋشى رولىندە بولعان.

«ايىپتاۋ اكتىسىنىڭ ءبىرىنشى ابزاتسىنان باستاپ مەنى اناممەن بىرگە قور قۇردى, قۇرىلتايشىلاردىڭ قولىن قولدان جاسادى دەپ ايىپتايدى. بىراق بۇل قور پارتيا جانىندا, بايبەكتىڭ باسشىلىعىمەن قۇرىلعان. قۇرىلتايشىلاردىڭ ءبارى – پارتيانىڭ قازىرگى نەمەسە بۇرىنعى قىزمەتكەرلەرى. سوندىقتان بۇل ماسەلەنىڭ باسىن اشۋ ءۇشىن باۋىرجان بايبەكتىڭ وزىنەن جاۋاپ الىنۋى كەرەك», – دەدى پەريزات قايرات سوت وتىرىسىندا.

سوتتا پروكۋرور قايىرىمدىلىق قورىن زاڭسىز جولمەن تىركەۋ, قۇرىلتايشىلاردىڭ قولدارىن قولدان جاساۋ, جالعان يميدج قۇرۋ, سونداي-اق جينالعان قاراجاتتى جەكە ماقساتقا پايدالانۋ بويىنشا ناقتى ايىپتار وقىعان ەدى. الايدا قايرات بۇل ايىپتاۋلارمەن تولىق كەلىسپەيتىنىن مالىمدەپ, ءوز ارەكەتىن «پارتيالىق تاپسىرمامەن» بايلانىستىرىپ وتىر.

سوت پروتسەسىنىڭ اشىق بولىگىنە قاتىسقان باقىلاۋشىلار بۇل مالىمدەمەنى كۇتپەگەن جانە قوعامدىق رەزونانس تۋدىرۋى مۇمكىن دەپ باعالاۋدا.

ايىپتالۋشىنىڭ ايتۋىنشا, قوردى تىركەۋگە تىكەلەي قاتىسقان تۇلعالار – سول كەزدەگى پارتيانىڭ قىزمەتكەرلەرى بولعان. بۇل جاعداي تەرگەۋدىڭ جاڭا باعىتىن قاجەت ەتۋى مۇمكىن. الايدا پروكۋرور مەن سۋديا تاراپىنان بۇل تالاپقا ازىرگە رەسمي پىكىر بىلدىرىلمەگەن.

پەريزات قايرات پەن اناسى عايني الاشباەۆا قايىرىمدىلىق اقشاسىن ماقساتسىز جۇمسادى, 3 ملرد تەڭگەگە جۋىق قارجىنى جىمقىردى دەگەن كۇدىكپەن سوتقا تارتىلىپ وتىر. قاراجات مۇگەدەك بالالارعا, سۋ تاسقىنى مەن تاياۋ شىعىس قاقتىعىستارىنان زارداپ شەككەندەرگە كومەكتەسۋ ءۇشىن جينالعان.