Perızat Qaırat Baýyrjan Baıbekti de jaýapqa tartýdy talap etti

Astanada Bizbergemiz Qazaqstan 2030 qoǵamdyq birlestiginiń negizin qalaýshysy Perızat Qaırat ózine taǵylǵan aıyptarmen kelispeı, sotta Baýyrjan Baıbekti kýá retinde shaqyrýdy talap etti, dep habarlaıdy Qandastar.kz saıty Skifnews.kz aqparat portalyna silteme jasap.

Onyń aıtýynsha, qaıyrymdylyq qory bastapqyda partııanyń bastamasymen qurylǵan, al ol bul proeste tek oryndaýshy rólinde bolǵan.

«Aıyptaý aktisiniń birinshi abzaynan bastap meni anammen birge qor qurdy, quryltaıshylardyń qolyn qoldan jasady dep aıyptaıdy. Biraq bul qor partııa janynda, Baıbektiń basshylyǵymen qurylǵan. Quryltaıshylardyń bári – partııanyń qazirgi nemese burynǵy qyzmetkerleri. Sondyqtan bul máseleniń basyn ashý úshin Baýyrjan Baıbektiń ózinen jaýap alynýy kerek», – dedi Perızat Qaırat sot otyrysynda.

Sotta prokýror qaıyrymdylyq qoryn zańsyz jolmen tirkeý, quryltaıshylardyń qoldaryn qoldan jasaý, jalǵan ımıdj qurý, sondaı-aq jınalǵan qarajatty jeke maqsatqa paıdalaný boıynsha naqty aıyptar oqyǵan edi. Alaıda Qaırat bul aıyptaýlarmen tolyq kelispeıtinin málimdep, óz áreketin «partııalyq tapsyrmamen» baılanystyryp otyr.

Sot proesiniń ashyq bóligine qatysqan baqylaýshylar bul málimdemeni kútpegen jáne qoǵamdyq rezonans týdyrýy múmkin dep baǵalaýda.

Aıyptalýshynyń aıtýynsha, qordy tirkeýge tikeleı qatysqan tulǵalar – sol kezdegi partııanyń qyzmetkerleri bolǵan. Bul jaǵdaı tergeýdiń jańa baǵytyn qajet etýi múmkin. Alaıda prokýror men sýdıa tarapynan bul talapqa ázirge resmı pikir bildirilmegen.

Perızat Qaırat pen anasy Ǵaını Alashbaeva qaıyrymdylyq aqshasyn maqsatsyz jumsady, 3 mlrd teńgege jýyq qarjyny jymqyrdy degen kúdikpen sotqa tartylyp otyr. Qarajat múgedek balalarǵa, sý tasqyny men Taıaý Shyǵys qaqtyǵystarynan zardap shekkenderge kómektesý úshin jınalǵan.