پەريزات قايرات ءىسى سوتقا جولداندى

فوتو:BAQ.KZ

ۆولونتەر پەريزات قايرات پەن ونىڭ اناسىنا قاتىستى ءىس سوتقا جولداندى. بۇل تۋرالى باس پروكۋراتۋرا مالىمدەدى, دەپ حابارلايدى  qandastar.kz     BAQ.KZ تىلشىسىنە سىلتەمە جاساپ.

باس پروكۋراتۋرا پەريزات قايراتقا جانە گايني الاشباەۆاعا قاتىستى قىلمىستىق ءىستى ءمانى بويىنشا قاراۋ ءۇشىن استانا قالاسىنىڭ قىلمىستىق ىستەر جونىندەگى اۋدانارالىق سوتىنا جىبەردى.

بۇل ادامدار قازاقستان رەسپۋبليكاسىنىڭ ازاماتتارى مەن ۇيىمدارىنان مۇگەدەك بالالارعا, سونداي-اق قازاقستاندا سۋ تاسقىنىنان جانە تاياۋ شىعىستاعى قاقتىعىستان زارداپ شەككەن ادامدارعا قايىرىمدىلىق كورسەتۋ جەلەۋىمەن جينالعان 3 ميللياردتان استام تەڭگەنى جىمقىرۋدى دەپ ايىپتالىپ وتىر.

قما وكىلى اتاعانداي, قىلمىستىق ءىس بويىنشا كۇدىكتى رەتىندە ەكى ادام, ياعني پەريزات قايرات پەن ونىڭ اناسى تانىلىپ وتىر. 2025 جىلدىڭ 4 ساۋىرىندە  پەريزات قايراتتىڭ اناسى گايني الاشباەۆا ءۇي قاماققا الىنعان بولاتىن.

تەرگەۋ بارىسىندا انىقتالعانداي, 2021 جىلدان 2024 جىلعا دەيىن پەريزات قايرات ءتۇرلى قايىرىمدىلىق اكتسيالارى ارقىلى جالپى سوماسى 3,5 ميلليارد تەڭگە كولەمىندە قاراجات جيناپ, ونى ءوز پايداسىنا جاراتقان. مۇنداي قاراجاتتار نەگىزىنەن بالالارعا, سۋ تاسقىنىنان زارداپ شەككەندەرگە جانە پالەستينا حالقىنا كومەك كورسەتۋ ءۇشىن جينالعان دەپ كورسەتىلگەن.

الايدا, تەرگەۋ بارىسىندا بۇل قاراجاتتاردىڭ كوپ بولىگى ونىڭ جەكە قاجەتتىلىكتەرىنە, سونىڭ ىشىندە ءساندى كيىمدەر, اشەكەيلەر, كولىكتەر مەن جىلجىمايتىن م ۇلىك ساتىپ الۋعا جۇمسالعانى انىقتالدى.

سونىمەن قاتار, ول وسى قاراجاتتاردى زاڭداستىرۋ ءۇشىن جالعان كەلىسىمشارتتار جاساپ, جەكە كاسىپكەرلەرمەن كەلىسىمدەر جاساعان.

بۇعان دەيىن قايىرىمدىلىق قورىنىڭ قۇرىلتايشىسى كۇدىككە ىلىنگەنىن, پەريزات قايرات دەگەن كىم ەكەنى تۋرالى, ونىڭ تاعى ءبىر زاڭسىز ارەكەتى انىقتالعانىن جازعان بولاتىنبىز.