پەريزات قايرات سوتىندا كۋاگەر قوردىڭ نەلىكتەن PlayStation-كلۋب مەكەنجايىندا تىركەلگەنىن ءتۇسىندىردى

فوتو: ءبىرىنشىسى كتك ارناسىنان / پەريزات قايرات. ەكىنشىسى سەرگەي ماتيۋشەنكونىڭ جەلىدەگى پاراقشاسىنان

استاناداعى قىلمىستىق ىستەر جونىندەگى اۋدانارالىق سوتتا Biz Birgemiz Qazaqstan قايىرىمدىلىق قورىنىڭ باسشىسى پەريزات قايراتقا قاتىستى اتىشۋلى ءىس بويىنشا سوت وتىرىسى جالعاسىپ جاتىر. 14 شىلدەدە كۋاگەر سەرگەي ماتيۋشەنكونىڭ جاۋاپتارى تىڭدالدى, دەپ جازدى qandastar.kz

ول قوردىڭ تىركەلۋ بارىسى مەن ونىڭ «امانات» پارتياسىنىڭ «جاس وتان» جاستار قاناتىمەن بايلانىسى تۋرالى ايتىپ بەردى. بۇل تۋرالى Stan.kz اقپارات اگەنتتىگى حابارلايدى.

ماتيۋشەنكو پەريزاتپەن «جاس وتان» ۇيىمى اياسىنداعى قىزمەت بارىسىندا تانىسقانىن, ال قور قۇرۋ يدەياسى سول كەزدەگى پارتيا توراعاسىنىڭ ورىنباسارى باۋىرجان بايبەكتىڭ باستاماسىمەن ەرىكتىلەر قوزعالىسىن ۇيىمداستىرۋ تۋرالى جينالىستا كوتەرىلگەنىن جەتكىزدى. الايدا ول بۇل ەرىكتىلەر قوزعالىسىن بولەك زاڭدى تۇلعا رەتىندە تىركەۋ تۋرالى ءسوز بولماعانىن ايتتى.

ماتيۋشەنكونىڭ ايتۋىنشا, پەريزات قايرات ودان قوردى تىركەۋگە كومەك سۇراعان. ول اعاسىنىڭ PlayStation كلۋبىنىڭ مەكەنجايىن ۋاقىتشا زاڭدى مەكەنجاي رەتىندە ۇسىنعانىن راستادى. كەيىنىرەك پارتيانىڭ ورتالىق اپپاراتى ورنالاسقان قوناەۆ كوشەسى, 12/2 مەكەنجايىنا قايتا تىركەۋ جوسپارلانعان ەدى, بىراق بۇل جوسپار ىسكە اسپاعان دەيدى ول.

بۇعان دەيىن پروكۋراتۋرا قوردىڭ زاڭدى مەكەنجايىندا ويىن كلۋبى ورنالاسقانىن حابارلاعان ەدى. ماتيۋشەنكو ءوز سوزىندە قوردىڭ قارجىلىق-شارۋاشىلىق قىزمەتىنە ەش قاتىسى بولماعانىن جانە ونى كىم جۇرگىزگەنىن بىلمەيتىنىن مالىمدەدى.

سوتتاعى ماڭىزدى كەزەڭ جالعان قۇجاتتار ماسەلەسى بولدى. پروكۋراتۋرانىڭ مالىمەتىنشە, 2021 جىلعى 14 قىركۇيەكتە پەريزات قايرات ون ادام, ونىڭ ىشىندە ماتيۋشەنكو بار, قور قۇرۋعا كەلىسىم بەرىپ, جينالىس وتكىزدى دەپ جالعان حاتتاما جاساعان. تەرگەۋ بۇل حاتتاماداعى قولتاڭبالاردىڭ جالعان ەكەنىن دالەلدەپ جاتىر. ماتيۋشەنكو دا بۇل دەرەكتى راستادى.

«مەن ەكىنشى حاتتامانى كوزىممەن كوردىم. ول مەنىڭ قولتاڭبام ەمەس», – دەدى ول.

سونداي-اق ول حالىققا قىزمەت كورسەتۋ ورتالىعىندا قۇجاتتاردى تاپسىرۋعا بارماعانىن ايتتى. سوت وتىرىسىندا پەريزات قايرات كوز جاسىن تىيا الماي, كۋاگەرمەن ديالوگقا ءتۇستى.

پەريزات قايرات «وكىنىشتى, وسىندا جولىعامىز دەپ ويلامادىم. سەن ەكىنشى حاتتامانى قول قويماعانىڭدى راستايسىڭ با?» دەپ سۇرادى.

سەرگەي ماتيۋشەنكو: ء«يا, راستايمىن. مەن قول قويعان جوقپىن».

پەريزات قايرات: «سەن وتىرىك ايتىپ تۇرعان جوقسىڭ با?»

سەرگەي ماتيۋشەنكو: «جوق, وتىرىك ەمەس».

پەريزات قايرات: «سەن تۇسىنەسىڭ بە, مەنىڭ تاعدىرىم شەشىلىپ جاتىر».

سەرگەي ماتيۋشەنكو: «پەريزات, مەن ءوز كوزىممەن كوردىم, ول مەنىڭ قولتاڭبام ەمەس».

ايىپتالۋشى كۋاگەردىڭ ءسوزىن بىرنەشە رەت ءبولىپ, ناقتىلاۋشى سۇراقتار قويدى. سول ساتتە سۋديا كاريموۆ تاراپتاردى تارتىپكە شاقىرىپ, ايىپتالۋشىعا ەسكەرتۋ جاسادى.

«ايىپتالۋشى, سىزگە تۇسكە دەيىن ەكى رەت ءتۇسىندىردىم. سۇراقتارىڭىزدى قويىڭىز, جاۋاپتارىن تىڭداڭىز, سوسىن كەلەسى سۇراققا كوشىڭىز. قازىر ءسىز وزىڭىزگە ىڭعايلى جاۋاپ العىڭىز كەلەتىندەي اسەر قالدىرىپ وتىرسىز. سوت وتىرىسىنىڭ ءوز ءتارتىبى بار. كۋاگەر شىن سويلەپ جاتىر ما, جوق پا ونى سوت انىقتايدى. مۇندا ەموتسياعا بەرىلىپ, داۋىستى كوتەرۋدىڭ قاجەتى جوق», – دەدى سۋديا.

پەريزات قايرات بۇل سوزگە قارسى شىعىپ, «داۋىسىمدى كوتەرگەن جوقپىن» دەپ جاۋاپ بەردى.

ماتيۋشەنكو پەريزات قايراتتىڭ بۇعان دەيىن كوپشىلىك الدىنداعى ءجۇرىس-تۇرىسىنا دا توقتالدى. ونىڭ ايتۋىنشا, پەريزات الەۋمەتتىك جەلىدە قوردىڭ جۇمىسى جايلى بەلسەندى جازىپ وتىرعان. سونداي-اق ول پەريزاتتىڭ Toyota Camry 70 كولىگىمەن جۇرگەنىن, ال 2024 جىلعى سۋ تاسقىنىنان كەيىن جانە شىۇ ءسامميتى كەزىندە اق ءتۇستى Mercedes-Benz كولىگىمەن جۇرگەنىن ايتقان.

قور ارقىلى جينالعان قارجىنىڭ ماقساتى تۋرالى ول پەريزاتتىڭ جاريالانىمدارىنا سۇيەنە وتىرىپ, قارجى قازاقستانداعى سۋ تاسقىنىنان زارداپ شەككەندەرگە, پالەستينا حالقىنا, تۇركياداعى جەر سىلكىنىسىنەن زارداپ شەككەندەرگە كومەك رەتىندە جينالعانىن جەتكىزدى.

ەسكە سالايىق, 14 شىلدەدە پەريزات قايرات پەن ونىڭ اناسى عايني الاشباەۆاعا قاتىستى العاشقى سوت وتىرىسى ءوتتى. پەريزات قايرات الاياقتىق پەن اقشا جىمقىرۋ ايىپتارىن مويىنداماي, تەرگەۋ مەن ايىپتاۋدى پروكۋرورلاردىڭ قيالىنا تەڭەدى. پەريزات قايرات بايبەكتىڭ اتى-ءجونىن اتادى جانە قوردىڭ قۇرىلتايشىلارىن سوتتا تىڭداۋدى سۇرادى. سوتتا كۋاگەر رەتىندە ءسوز سويلەگەن ءمولدىر ءسۇيىنشىالى ءوزىنىڭ پەريزاتپەن بايلانىسى ءۇشىن باق-تان «بەتكە شاپالاق» العانىن ايتتى. ول سونداي-اق پەريزات قايرات ۇيىمداستىرعان اۋكتسيوندا گولوۆكيننىڭ قولعابىن 10 ميلليون تەڭگەگە ساتىپ الىپ, دتسپ-مەن اۋىراتىن بالالارعا ارنالعان وڭالتۋ ورتالىعىنىڭ قۇرىلىسىنا اقشا اۋدارعانىن ايتتى. مولدىر ءسۇيىنشىالى پەريزاتتىڭ ءبىر مۇقتاج ايەلگە پاتەر سىيلاعانىن, الايدا كەيىن ول ءۇيدىڭ ناقتى ومىردە جوق ەكەنى انىقتالعانىن جەتكىزدى. ايتپاقشى, پەريزات قايراتتىڭ كەمبريدجدە وقىماعانى جانە جوعارى ءبىلىمى بولماعانى دا سوتتا بەلگىلى بولدى.