Perızat Qaırattyń isinde Asarume qaıyrymdylyq qory jábirlenýshi dep tanyldy

Foto: ashyq derekkóz

Qaıyrymdylyq qorynan aqsha jymqyrdy dep aıyptalǵan Perızat Qaırattyń isinde Asarume qaıyrymdylyq qory jábirlenýshi dep tanyldy. Bul týraly qandastar.kz  Stan.kz aqparat agenttigine silteme jasap habarlaıdy.

Biz Birgemiz Qazaqstan 2030 basshysy Perızat Qaırattyń qarjy jymqyrý isi boıynsha qosymsha derek paıda boldy. Asarume qaıyrymdylyq qory jelide málimdeme jasap, iste jábirlenýshi bolyp tanylǵanyn jazdy.

“Biz sengimiz kelmeıtin faktiler shyndyqqa aınalyp, bul jaǵdaı eldegi qaıyrymdylyq salasyna úlken soqqy boldy. Bul oqıǵa ıgi istermen aınalysatyn ár adamǵa áserin tıgizip, qaıyrymdylyqqa degen senimge kúmán uıalatty.

Biz Birgemiz Qazaqstan 2030 jasaǵan alaıaqtyq áreketter bizdiń qorymyzǵa da áser etti. Tergeý nátıjesinde «Asar Úme» resmı túrde jábirlenýshi tarap dep tanyldy”, – dep málimdedi qor.

Alaıda qor ókilderi istiń mán-jaıyn tolyq jarııalaýdan bas tartty.

Aıta keteıik, buǵan deıin Perızat Qaıratqa múgedek balalarǵa arnalǵan ortalyq salýǵa jınalǵan 22 mıllıon teńgeni jymqyrdy degen aıyp taǵylǵan edi.

Eske salaıyq, “Biz Birgemiz” qorynyń basshysy Perızat Qaırat sý tasqynynan zardap shekkenderge jınalǵan 1,5 mıllıard teńgeni jymqyrdy degen kúdikke ilingen edi. 

Qarjy monıtorıngi agenttiginiń málimetinshe, qaıyrymdylyqqa bólingen qarjynyń negizgi bóligi qymbat sán buıymdary men jyljymaıtyn múlikti satyp alý maqsatyna paıdalanylǵan. Bıyl kóktemde ol elordadaǵy avtosalonnan 88 mıllıon teńgege «Mercedes-Benz S450», 80 mıllıon teńgege «Lexus LX-600» jáne 39 mıllıon teńgege «Haval» avtokólikterin satyp alǵan.

Osydan keıin Biz Birgemiz Qazaqstan 2030 májbúrli túrde taratylatyny belgili boldy.