پەريزات قايراتتىڭ ىسىنە بلوگەرلەردىڭ قاتىسى بار ما?

فوتو: جەكە قورىنان

اقشا جىمقىردى دەگەن كۇدىككە ىلىنگەن قايىرىمدىلىق قورىنىڭ باسشىسى پەريزات قايراتتىڭ ىسىنە بلوگەرلەردىڭ قاتىسى بار ما? بۇل سۇراققا قارجى مونيتورينگى اگەنتتىگى جاۋاپ بەردى, — دەپ حابارلايدى qandastar.kz  Massaget.kz تىلشىسىنە سىلتەمە جاساپ.

بۇعان دەيىن بۇقارالىق اقپارات قۇرالدارى مەن الەۋمەتتىك جەلىلەردە سۋ تاسقىنى كەزىندە جينالعان قاراجاتتى جىمقىرۋ ىسىنە ميلليونداعان وقىرمانى بار بلوگەرلەردىڭ دە قاتىسى بار بولۋى مۇمكىن دەگەن اقپارات تارادى. ويتكەنى بلوگەرلەر, تانىمال ادامدار ۆيدەولار ءتۇسىرىپ, قازاقستاندىقتاردى پەريزات قايرات باستاعان قورعا ءوز ۇلەسىن قوسۋعا شاقىرعان ەدى.

قما-نىڭ رەسمي جاۋابىندا ەرىكتىلەر قوزعالىسىنىڭ بەلسەندىسى پەريزات قايراتقا قاتىستى ءىس بويىنشا سوتالدى تەرگەۋ جالعاسىپ جاتقانى ايتىلدى.

«قارجى مونيتورينگى ورگاندارىنىڭ وندىرىسىندە بلوگەرلەر نەمەسە سۋ تاسقىنى كەزىندە قاراجات جيناعان باسقا ۇيىمداستىرۋشىلارعا قاتىستى سوتالدى تەرگەۋلەر جوق», — دەپ ناقتىلادى اگەنتتىك.

ايتا كەتەيىك, پەريزات قايرات — Biz Birgemiz Qazaqstan قايىرىمدىلىق قورىنىڭ ءتورايىمى, قازاقستانداعى بەلسەندى ەرىكتىلەر قوزعالىسىنىڭ جەتەكشىسى رەتىندە تانىمال. ول سۋ تاسقىنىنان زارداپ شەككەندەرگە كومەك كورسەتۋ, گازا سەكتورىنداعى گۋمانيتارلىق ميسسيالار جانە باسقا دا قايىرىمدىلىق شارالارىمەن اينالىسىپ, قوعامدا بەدەلگە يە بولدى.

14 قاراشادا قارجىلىق مونيتورينگ اگەنتتىگى پەريزات قايرات 1,5 ميللياردتى جىمقىردى دەگەن كۇدىككە ىلىنگەنىن حابارلادى.

سونىمەن قاتار ول 2023 جىلعى قاراشادا پالەستينا تۇرعىندارىنا گۋمانيتارلىق كومەك كورسەتۋ ءۇشىن قاراجات جيناپ, ونىڭ 200 ميلليونىن قالتاسىنا باسقان دەگەن كۇدىككە ءىلىندى. قما دەرەگىنشە, 2023 جىلعى جەلتوقساندا وسى اقشا ەسەبىنەن پەريزات قايرات Sensata Plaza ەليتالىق كەشەنىنەن 49 ميلليون تەڭگەگە ءۇش بولمەلى پاتەر جانە 30 ميلليون تەڭگەگە Mercedes-Benz EQE 500 4 Matic جاڭا كولىگىن ساتىپ العان.

16 قاراشادا استانا قالاسىنىڭ تەرگەۋ سوتى پەريزات قايرات 2 ايعا قاماۋعا الىنعانىن حابارلادى.