پەريزات قايراتتىڭ ىسىنەن كەيىن بقو پروكۋراتۋراسى تەكسەرۋ جۇرگىزبەك

فوتو:istockphoto.com

باتىس قازاقستان وبلىسىنىڭ پروكۋراتۋراسى «اقجايىق» جەكە قورىنان سۋ تاسقىنىنىڭ سالدارىن جويۋ ءۇشىن جينالعان قارجىنىڭ قالاي جۇمسالعانىن تەكسەرۋدى كوزدەپ وتىر, – دەپ حابارلايدى qandastar.kz «ۋرالسكايا نەدەليا» سايتىنا سىلتەمە جاساپ.

باتىس قازاقستان وبلىسى باس پروكۋرورىنىڭ ءبىرىنشى ورىنباسارى داۋرەن ومارعاليەۆتىڭ ايتۋىنشا, وبلىستا تابيعي اپاتتان زارداپ شەككەن ادامدار مەن كاسىپكەرلەرگە 81 ملرد تەڭگە بەرىلگەن. ونىڭ ىشىندە 13 ملرد  تەڭگە – بيۋدجەت ەسەبىنەن, قالعان 68 ملرد  تەڭگەنى  كاسىپكەرلەر بەرگەن.

«پەريزات قايرات ءىسىن ءبارى ەستىگەن شىعار. قازىر قارجى مونيتورينگى اگەنتتىگى ونىڭ قىلمىستىق ارەكەتىن تەرگەپ جاتىر, سونىمەن قاتار انتيكور دەمەۋشىلەردىڭ قارجىسىن جىمقىرۋ بويىنشا سوتقا دەيىنگى تەرگەۋ جۇرگىزىپ جاتىر. جابىرلەنۋشىلەرگە كومەك كورسەتۋگە باعىتتالعان قاراجاتتى ۇرلاۋ فاكتىلەرى بويىنشا قوزعالعان قىلمىستىق ىستەردىڭ كوپتىگىن, سونداي-اق ءبىزدىڭ قارجىلاندىرۋىمىز «اقجايىق» جەكە قورى ارقىلى جۇزەگە اسىرىلاتىنىن ەسكەرە وتىرىپ, ونىڭ قىزمەتى قالاي جۇرگىزىلگەنى بويىنشا تەكسەرۋدى باستاۋدى ۇسىنامىز», – دەدى پروكۋرور.