Perızat Qaırattyń psevdo-qaıyrymdylyq shemasy qalaı jumys istegen?

Foto: ashyq derekkóz

Perızat Qaıratqa qatysty taǵy bir qylmystyq epızod anyqtaldy. Qarjy monıtorıng agenttiginiń málimetinshe, múgedek balalarǵa arnalǵan ońaltý ortalyǵyn turǵyzýǵa jınalǵan qarajatty talan-tarajǵa salý kúdigi boıynsha jańa tergeý bastalǵan. Belgili bolǵandaı, Perızat Qaırat 2021 jyldyń qarashasynda Aqmola oblysyndaǵy «Batyr» qoǵamdyq birlestigine ońaltý ortalyǵyn turǵyzý úshin qaıyrymdylyq aýkıonyn ótkizgen, dep jazdy qandastar.kz

Qaırat jarııalaǵan jalǵan málimetke sáıkes, aýkıonnan 48 mıllıon teńge jınalyp, 100 mıllıon teńgelik ǵımarat syıǵa tartylǵandaı bolypty. Alaıda tergeý nusqasy boıynsha shyn máninde 22 mıllıon teńge ǵana jınalǵan, jáne sol qarajatty kúdikti óz qajetine jumsap jibergen. Budan bólek, Qaırat «Batyr» qoǵamdyq birlestigine 30 mıllıon teńgelik jer telimin alyp berdim dep málimdegenimen, bul ýchastokty birlestik 2019 jyly-aq óz betimen satyp alǵany anyqtaldy. Ońaltý ortalyǵynyń qurylysy sol kúıi bastalmaǵan, «ortalyqqa berildi» degen ǵımarat ta joq bolyp shyqty. Eske sala ketsek, buǵan deıin Perızat Qaıratqa kóktemgi tasqynnan zardap shekken azamattarǵa kómektesý úshin jınalǵan 1,5 mıllıard teńgeni jymqyrdy degen aıyp taǵylǵan. Aldyn ala derek boıynsha qaıyrymdylyqtan túsken aqsha zańsyz shemalar arqyly kúdiktiniń jeke múddesine baǵyttalǵan.