قارجى جانە تولەمدەر
پەريزات وقيعاسىنا ۇقساس جاعداي: تاعى ءبىر بلوگەر ۇستالدى
فوتو: اشىق دەرەككوز
قازاقستاندا تاعى ءبىر بلوگەر ۇستالدى, دەپ حابارلايدى qandastar.kz Dalanews.kz-كە سىلتەمە جاساپ.
«اق جايىق» باسىلىمى مالىمەتىنشە, اتىراۋدا الاياقتىق جاسادى دەگەن كۇدىكپەن بلوگەر ۇستالعان. ول جالعان ۇتىس ويىندارى مەن قايىرىمدىلىق جاساۋ جەلەۋىمەن وقىرمانداردان اقشا جيناپ وتىرعان.
پوليتسيا مالىمەتىنشە, ايەل الەۋمەتتىك جەلىلەردە تۇرمىستىق تەحنيكا, تاتتىلەر جانە زەرگەرلىك بۇيىمدار سەكىلدى باعالى سىيلىقتارى بار لوتەرەيالار تۋرالى حابارلاندىرۋلار جاريالاعان. سونىمەن قاتار, ول كوپبالالى وتباسىعا ءۇي سالۋ ءۇشىن قاراجات جيناۋ باستاماسىن كوتەرگەن. قاتىسۋ شارتتارى بويىنشا كورسەتىلگەن شوتقا بەلگىلى ءبىر سومانى اۋدارۋ كەرەك بولعان.
الدىن الا دەرەكتەر بويىنشا ونىڭ «بەلسەندىلىگى» 2023 جىلدىڭ قىركۇيەگىندە باستالعان. قازىرگى ۋاقىتتا 50-دەن اسا جابىرلەنۋشى انىقتالعان. كەيبىر جاعدايلاردا زالال سوماسى 400 مىڭ تەڭگەدەن اسقان.
«بۇل دەرەك بويىنشا قر قىلمىستىق كودەكسىنىڭ 190-بابىنىڭ 1-بولىگى («الاياقتىق») بويىنشا قىلمىستىق ءىس قوزعالدى. كۇدىكتى قاماۋعا الىندى, سوتالدى تەرگەۋ جۇرگىزىلىپ جاتىر», — دەپ جازىلعان باسىلىم مالىمەتىندە.
پەريزات قايراتقا قاتىستى ءىس
پەريزات قايرات — Biz Birgemiz Qazaqstan قايىرىمدىلىق قورىنىڭ ءتورايىمى, قازاقستانداعى بەلسەندى ەرىكتىلەر قوزعالىسىنىڭ جەتەكشىسى رەتىندە تانىمال. ول سۋ تاسقىنىنان زارداپ شەككەندەرگە كومەك كورسەتۋ, گازا سەكتورىنداعى گۋمانيتارلىق ميسسيالار جانە باسقا دا قايىرىمدىلىق شارالارىمەن اينالىسىپ, قوعامدا بەدەلگە يە بولدى.
الايدا 2024 جىلى 14 قاراشادا قارجىلىق مونيتورينگ اگەنتتىگى پەريزات قايرات 1,5 ميللياردتى جىمقىردى دەگەن كۇدىككە ىلىنگەنىن حابارلادى.
سونىمەن قاتار, ول 2023 جىلعى قاراشادا پالەستينا تۇرعىندارىنا گۋمانيتارلىق كومەك كورسەتۋ ءۇشىن قاراجات جيناپ, ونىڭ 200 ميلليونىن قالتاسىنا باسقان دەگەن كۇدىككە ءىلىندى. قما دەرەگىنشە, 2023 جىلعى جەلتوقساندا وسى اقشا ەسەبىنەن پەريزات قايرات Sensata Plaza ەليتالىق كەشەنىنەن 49 ميلليون تەڭگەگە ءۇش بولمەلى پاتەر جانە 30 ميلليون تەڭگەگە Mercedes-Benz EQE 500 4 Matic جاڭا كولىگىن ساتىپ العان.
2024 جىلى 16 قاراشادا استانا قالاسىنىڭ تەرگەۋ سوتى پەريزات قايرات 2 ايعا قاماۋعا الىنعانىن حابارلادى. جۋىردا پەريزات قايراتقا قاتىستى ءىستى تەرگەۋ اياقتالدى.
