پەشتىڭ قاراۋسىز قالۋى: قوستاناي وبلىسىندا 5 بالا قازا تاپتى

فوتو: اشىق دەرەككوز

قوستاناي وبلىسى جىتىقارا قالاسىندا تاڭعى 5-تەر شاماسىندا جەكە تۇرعىن ۇيدەن ءورت شىقتى, دەپ حابارلادى Qandastar.kz. قۇتقارۋشىلار شاقىرتۋ العاننان كەيىن ءورت بولعان جەرگە 7 مينۋتتا كەلگەن. الايدا ءورت سوندىرۋشىلەردىڭ مالىمەتىنشە, ءۇي تولىعىمەن وتقا ورانعان. سونىمەن قاتار شاتىرى وپىرىلعان.

وقيعا ورنىندا ۇلكەندەردىڭ قاراۋىنسىز كامەلەت جاسىنا تولماعان 2011, 2016, 2018, 2019, 2022, 2023 جىلدارى تۋعان التى بالا بولعان. وكىنىشكە وراي, ۇيىندىلەردى تازارتۋ بارىسىندا بەس بالانىڭ دەنەسى تابىلدى. 2011 تۋعان ۇلكەن بالا عانا ءدىن امان, زارداپ شەكپەگەن.

«الدىن الا مالىمەت بويىنشا, بالالاردىڭ اناسى كەشكىسىن تانىسىنا كەتكەن, ال اكەلەرى تۇرمەدە. قازىر وقيعانىڭ سەبەپتەرى انىقتالۋدا. ءورت-تەحنيكالىق زەرتتەۋ جۇمىستارى جۇرگىزىلمەك. ال اپاتتار مەديتسينا ورتالىعىنىڭ پسيحولوگتارى تۋىستارىنا قاجەتتى پسيوحولوگيالىق كومەك كولسەتىپ جاتىر», – دەلىنگەن جەرگىلىكتى اكىمشىلىك حابارلاماسىندا.

قوستاناي وبلىسىنىڭ اكىمدىگى وتباسى مەن جاقىندارىنا كوڭىل ايتا وتىرىپ, بارلىق قاجەتتى كومەكتى, سونىڭ ىشىندە ماتەريالدىق كومەك كورسەتۋگە ۋادە ەتتى.

سوتقا دەيىنگى تەرگەپ-تەكسەرۋ جۇمىستارى باستالدى, ءورتتىڭ الدىن الا سەبەبى – پەشتىڭ قاراۋسىز قالۋى. وقيعا ورنىندا وبلىس پروكۋرورىنىڭ ءبىرىنشى ورىنباسارى ب.بەكبوسىنوۆ بار. قىلمىستىق ءىستى تەرگەۋدىڭ بارىسى باس پروكۋروردىڭ باقىلاۋىنا الىندى.