پەتروپاۆلدا كوزىنە پىشاق كىرىپ كەتكەن ءسابيدىڭ جاعدايى بەلگىلى بولدى

فوتو: Pixabay

دارىگەرلەر پەتروپاۆلدا كوزىنە پىشاق كىرىپ كەتكەن ءۇش جاسار ءسابيدىڭ جاعدايى اۋىر ەكەنىن, بالانىڭ جانساقتاۋ بولىمىندە جاتقانىن مالىمدەدى. اۋرۋحاناعا دەرەۋ جەتكىزىلگەن بالانى امان الىپ قالۋ ءۇشىن دارىگەرلەر بار كۇشىن سالىپ جاتىر, دەپ حابارلايدىqandastar.kz اقپارات پورتالى كتك ارناسىنا سىلتەمە جاساپ.

«جاعدايى اۋىر. جەدەل تۇردە جانساقتاۋ بولىمشەسىنە ورنالاستىرىلدى. كەرەكتى بارلىق ەمدەۋ جۇرگىزىلدى. دارىگەرلەر كونسيليۋم جاساپ, ماماندارمەن كەلىسىم جاساپ, وپەراتسياعا كورسەتكىشى جوق. بۇگىنگى تاڭدا التى ساعات سايىن نەيروحيرۋرگتار مەن وفتالمولوگتارمەن كونسۋلتاتسيا الىپ قاجەت جاتىرمىز. بۇكىل قاجەت ەم-شارا جۇرگىزىلەدى», – دەدى سقو كوپبەيىندى بالالار اۋرۋحاناسىنىڭ ديرەكتورى نۇرلان ايمانوۆ.

ويىن بالاسى اس ۇيدە ءجۇرىپ پىشاققا قۇلاپتى. وسى ساتتە جانىندا اناسى دا بولعان. بىردەن جەدەل جاردەم شاقىرىپ اۋرۋحاناعا جەتكىزگەنشە, ءسابيدىڭ جاعدايى ناشارلاپ, جانساقتاۋ بولىمىنە جاتقىزىلعان. دارىگەرلەر بالانىڭ كوزى زاقىمدانباعان دەيدى. پىشاق جانارىنىڭ ۇستىنەن ءوتىپ, ميىنىڭ ورتاسىنا دەيىن جەتكەن. قازىر ءسابيدىڭ ءومىرى ءۇشىن ارپالىسىپ جاتقان دارىگەرلەر بولاشاقتا بۇل جاراقاتىنىڭ دەنساۋلىققا قانداي اسەرى بولاتىنىن ايتا الماي وتىر. ال پوليتسيا بالانىڭ نەدەن جاراقات العانىن انىقتاۋعا كىرىستى.

«پوليتسيا بولىمىشەسىنە ءۇش جاسار بالانىڭ اۋرۋحاناعا اۋىر جاعدايدا جەتكىزىلگەنى تۋرالى اقپارات ءتۇستى. پەتروپاۆل قالاسىنىڭ پوليتسياسى بالانىڭ جاراقات الۋ سەبەبىن انىقتاۋدا. الدىن الا بولجام بويىنشا, بۇل جاعداي وقىستان بولعان», – دەيدى سقو پوليتسيا دەپارتامەنتىنىڭ ءباسپاسوز حاتشىسى ادەماۋ مەڭدىباەۆا.