پىكىر-پايىم: دەپۋتات ۇكىمەت وتىرىسىنان نە ءتۇيدى?

فوتو: اشىق دەرەككوز

ۇكىمەتتىڭ كەڭەيتىلگەن وتىرىسىندا پرەزيدەنت قاسىم-جومارت توقاەۆ «زاڭ جانە ءتارتىپ» ءپرينتسيپىنىڭ قوعامدىق سانادا تەرەڭ تامىر جايۋىنىڭ ماڭىزىن اتاپ ءوتتى. مەملەكەت باسشىسى ءتارتىپتى قامتاماسىز ەتۋ ءۇشىن «قۇقىق بۇزۋشىلىققا جول جوق» ءپرينتسيپىن ەنگىزۋ قاجەتتىگىن, بۇل شارالار بيلىك ورگاندارىن, ونىڭ ىشىندە ءوڭىر اكىمدەرىن قامتۋى ءتيىس ەكەنىن ايتتى. بۇل رەتتە دەپۋتات مارات ءباشىموۆ مۇنى جۇزەگە اسىرۋدا قوعامنىڭ قولداۋى ماڭىزدى ەكەنىن مەڭزەپ وتىر, دەپ جازادى qandastar.kz

«پرەزيدەنت ايتقانداي, ازاماتتاردىڭ قۇقىعىن قورعاۋ مەملەكەتتىڭ نەگىزگى مىندەتتەرىنىڭ ءبىرى بولىپ قالا بەرەدى, سوندىقتان حالىقپەن تۇراقتى بايلانىس ورناتۋ قاجەتتىگى كۇن تارتىبىندە تۇر. وتكەن جىلى پرەزيدەنت اكىمشىلىگىنە 50 مىڭنان استام ءوتىنىش ءتۇستى, بۇل قوعامنىڭ «ەستيتىن مەملەكەت» كونتسەپتسياسىنا دەگەن سەنىمىن كورسەتەدى. الايدا, پرەزيدەنتتىڭ ايتۋىنشا, ناقتى وزگەرىستەرگە قول جەتكىزۋ ءۇشىن مەملەكەتتىك ورگانداردىڭ جۇمىسىن جاقسارتىپ, بارلىق ۋاكىلەتتى قۇرىلىمداردى ازاماتتاردىڭ ماسەلەلەرىن شەشۋگە بەلسەندى تۇردە تارتۋ قاجەت.

ۇلتتىق قۇرىلتايدا ايتىلعان «زاڭ جانە ءتارتىپ» ءپرينتسيپى ەل ازاماتتارىنىڭ كونستيتۋتسيالىق قۇقىقتارىن قورعاۋدىڭ نەگىزى بولىپ قالاتىنى, ەلدىڭ تۇراقتىلىعى مەن قاۋىپسىزدىگىن قامتاماسىز ەتەتىنى بەلگىلى», – دەدى دەپۋتات.

سونىمەن قاتار ءباشىموۆ ادام قۇقىقتارى ماسەلەلەرى كيبەرقىلمىسپەن كۇرەسكە, ازاماتتاردىڭ جەكە ومىرگە جانە جەكە باس بوستاندىعىنا كونستيتۋتسيالىق قۇقىقتارىن بۇزۋعا قاتىستى ەكەنىن العا تارتتى. ونىڭ ايتۋىنشا, قوعامدا ايلا-شارعى جاساۋعا, بيلىكتىڭ بەدەلىن تۇسىرۋگە, الاۋىزدىقتى قوزدىرۋعا باعىتتالعان جالعان اقپارات ءجيى تارايدى. بۇل ەلدەگى ازاماتتاردىڭ قاۋىپسىزدىگى مەن تۇراقتىلىعىنا ۇلكەن قاۋىپ توندىرەدى. بىراق كيبەرقاۋىپسىزدىكتى نىعايتۋ ەشقانداي جاعدايدا تسيفرلاندىرۋ پروتسەسىن باسەڭدەتپەۋى كەرەك.

بۇعان قوسا دەپۋتات شەكتەۋلەر مەن ايىپپۇلداردى ەنگىزۋ كەزىندە مەملەكەت تە, قوعام بەلسەندىلەرى دە اقىلعا قونىمدى شەشىمدەر ۇسىنۋ قاجەتتىگىن اتاپ ءوتتى.