الەم جاڭالىقتارى
پيتون جىلانى قازاقستاننان وزبەكستانعا قالاي ءوتىپ كەتكەن?
فوتو: تاشكەنت وبلىسى كەدەن باسقارماسىنىڭ ءباسپاسوز قىزمەتى
قازاقستان شەكاراسىنان ءوتىپ, وزبەكستان شەكاراسىنداعى تەكسەرۋ كەزىندە بەلگىسىز ازاماتتىڭ سومكەسىنەن قىزىل كىتاپقا ەنگەن البينوس جولبارىس پيتون جىلانى تابىلعان ۆيدەو جەلىدە تاراپ كەتتى, دەپ حابارلايدى qandastar.kz madeniportal.kz سىلتەمە جاساپ.
قازاقستاننان وزبەكستانعا الىپ وتپەك بولعان بۇل باۋىرىمەن جورعالاۋشى وڭتۇستىك, وڭتۇستىك-شىعىس ازيانى مەكەن ەتەتىن سيرەك كەزدەسەتىن جىلان ەكەن.
تاشكەنت وبلىسى كەدەن دەپارتامەنتىنىڭ ءباسپاسوز قىزمەتى قازىرگى ۋاقىتتا تەرگەۋالدى تەكسەرۋ جۇمىستارى جۇرگىزىلىپ جاتقانىن حابارلادى:
«گيشت-كۋپريك» شەكارالىق كەدەن بەكەتىندە قازاقستاننان كىرگەن ەر ادامنىڭ سومكەسىن باقىلاۋ-رەنتگەندىك جابدىقتىڭ كومەگىمەن تەكسەرۋ كەزىندە جىلان تابىلدى, بۇل تۋرالى اۋىزشا حابارلامادا ايتىلعان. كەدەندىك دەكلاراتسيادا باۋىرىمەن جورعالاۋشىلار دا كورسەتىلمەگەن».
بۇل جىلان حالىقارالىق قىزىل كىتاپقا ەنگىزىلگەندىكتەن, ونى وزبەكستانعا اكەلۋ ءۇشىن حالىقارالىق رۇقسات قاجەت ەكەن. بىراق تاسىمالداۋشى ازاماتتا ول جوق بولىپ شىقتى.
البينوس ءتۇستى جىلان تاشكەنتتەگى حايۋاناتتار باعىنا تاپسىرىلدى. ال ونداعى ماماندار ونىڭ جاعدايىن تۇراقتى دەپ باعالاپتى.
ال بۇل الىپ جىلاننىڭ قازاقستانعا قالاي كەلگەنى, ونى الگى ازاماتتىڭ قازاقستان شەكاراسىنان قالاي الىپ وتكەنى تۇسىنىكسىز كۇيدە قالدى.
ويتكەنى قازاقستاندىق قۇزىرلى ورگاندار بۇل وقيعاعا قاتىستى ازىرگە تۇسىنىك بەرگەن جوق.
