پودەزدە تۇنەيتىن بالا: «قوناق» كەلگەندە اناسى ۇيگە كىرگىزبەيدى

فوتو: اشىق دەرەككوز

الەۋمەتتىك جەلىدە پودەزدە تۇنەپ جۇرگەن بالانىڭ سۋرەتى تارادى, دەپ حابارلايدى Skifnews.kz اقپارات پورتالى.

جەلى قولدانۋشىسى وقىرماندارىنا وسىنداي شىن مۇقتاجدارعا ءۇي الىپ بەرسە عوي دەگەن ۇسىنىس جاسادى. سونداي-اق تاڭنان كەشكە دەيىن جۇمىس ىستەيتىن بالانىڭ اناسى ۇيىنە «قوناق» كەلگەندە بالانى سىرتقا شىعارىپ جىبەرەتىنىن جازدى.

بۇل ءبالا_بىزدىڭ پودەزدىڭ «تۇرعىنى». ەستۋىمشە, شەشەسى ۇيىنە «قوناق» كەلگەندە, سىرتقا شىعارىپ جىبەرەدى. مۇمكىن, بىردەڭەگە كوڭىلى تولماي, بالانىڭ ءوزى ۇيدەن شىعىپ كەتەتىن شىعار… وزدەرى شەشەسى جۇمىس ىستەيتىن دۇكەندە تۇرادى. ۇيلەرى جوق. اكەسى جوق. بالا ازداپ ۇركەكتەۋ, جاسىق. ەكى كۇننىڭ بىرىندە پودەزگە تۇنەيدى. ءوزىن كورگەن سايىن ۇيگە شاقىرامىن. بىراق, قانشا شاقىرسام دا ۇيگە كىرمەيدى. قايتپەك كەرەك?

اشەيىندە, «ەل قامىن جەپ ءجۇر» دەپ, تەپسە تەمىر ۇزەتىن جىگىتتەرگە پاتەر كولىك تاراتىپ, كوپ الدىندا ۇپاي جينايتىن مەتسەناتتار وسىنداي شىن مۇقتاج جاندارعا كومەكتەسسە عوي! مىنا بالاعا ءبىر بولمەلى بولسا دا پاتەر الىپ بەرەتىن, تىم قۇرىسا, جالداپ بەرەتىن قايىرىمدى جان بولسا, نەمەسە, ەل_جۇرت بوپ, وسى بالاعا پاتەر الىپ بەرسەك_بالا بۇلاي سۋىق ەدەندە جاتپاس ەدى.

ءتيىستى ورگاندارعا حابارلاپ, اناسىن انالىق قۇقىقتان ايىرۋعا ءداتىم بارمايدى. سەبەبى, مەن ادام تانىسام, شەشەسى سونداي جامان ادام ەمەس. شەشەسى مومىندىعىنان جۇرتتى باسىنا شىعارىپ الادى. ءارى, كۇيىكتەن ازداپ ىشەدى. باسقا تۇرعىندار دا, اناسىنىڭ بالاعا ءزابىر كورسەتپەيتىنىن بىلگەندىكتەن, پوليتسيا شاقىرمايدى. مەنىڭشە, پوليتسيا شاقىرىپ, بالانى اناسىنان ايىرعاننان مىنا بالانىڭ جاعدايى وڭالىپ كەتپەيدى. جۇرەگىنە جارا تۇسەدى. ودان دا, وسىنداي تاعدىرى قيىن بالالارعا ەل_جۇرت بوپ قاراسىپ جۇرسەك, ەڭ دۇرىس شەشىم بولار ەدى دەپ ويلايمىن.

ارينە, بالا بولسا دا فوتو ۆيدەوعا ءتۇسىرىپ, ەل تالقىسىنا سالىپ, جاپپاي «مۇسىركەۋ» ادەپتى ءىس ەمەس. سوندىقتان, بەت_جۇزىن كورسەتپەي, بالكىم جاعدايى بار قايىرىمدى جاندار كومەكتەسەر دەگەن ۇمىتپەن ەتكەن ارەكەتىم ەدى بۇل. كومەكتەسكىسى كەلگەن جان بولسا, ماعان حابارلاسىڭىز, – دەپ جازدى Facebook جەلىسىنىڭ قولدانۋشىسى.

وقىرماندار اراسىندا بالاعا شىنايى جانى اشىعاندار دا, اناسىنا ءتىل تيگىزىپ, سوككەندەر دە بار.
سوندىقتان جازبا اۆتورى اناسى بالاسىن جاقسى كورەتىنىن ايتىپ, قوسىمشا تۇسىندىرمە بەرىپتى.

اناسى بالاسىن جاكسى كورەدى. ەكەۋىن بىرگە تالاي رەت كورگەنمىن. مۇمكىن, ەلدىڭ ايتىپ جۇرگەنى وسەك شىعار. شەشەلى بالالى ەكەۋىنىڭ اراسىندا تۇسىنبەۋشىلىك بولۋى دا مۇمكىن. اناسىنا دا وڭاي ەمەس, تاڭعى 8_دەن ءتۇن ورتاسىنا دەيىن جۇمىس ىستەيدى. زورىعىپ, شارشاپ جۇرەدى. ادامدار, باس ساپ كىنالاعانشا نەگە كومەك بەرمەيدى ەكەن? بىرەۋدى جامانداپ, جاقسى ادام بولۋ_ەڭ وڭاي تىرلىك قوي! – دەدى ول.