Polıgondardyń jumysyn baqylamaǵan sheneýnikterge 9 mln teńge aıyppul salyndy

Túrkistan oblysynyń Mamandandyrylǵan tabıǵat qorǵaý prokýratýrasy oblystaǵy  turmystyq qatty qaldyqtardy saqtaıtyn polıgondardy tekserdi, dep habarlaıdy qandastar.kz aqparattyq portaly turkystan.kz saıtyna silteme jasap.  

Tekseris barysynda, polıgondardyń 70 paıyzy sanıtarııalyq-ekologııalyq talaptarǵa sáıkes kelmeıtindigi anyqtaldy.

Máselen, oblys aýmaǵyndaǵy 135 polıgon ınfraqurylymmen qamtamasyz etilmegen (jaryq, qorshaý, arnaıy qurylǵylarmen qarjylandyrýǵa baılanysty jabdyqtalmaǵan), 81-i sanıtarııalyq-epıdemıologııalyq qorytyndysyz (jan-jaqty qaraý jáne tıisti ákimshilik jaýaptylyqqa tartý boıynsha materıaldar sotqa joldanǵan), 11-i ekologııalyq ruqsat qujattarynsyz jumys isteýde.

Bul rette, oryn alǵan zań buzýshylyqtar boıynsha prokýratýra tarapynan qadaǵalaý aktisi engizilip (Túrkistan oblysy boıynsha Ekologııa departamenti men sanıtarııalyq- epıdemıologııalyq baqylaý departamentine), tıisti basshylaryna  9 mln teńgeden astam aıyppul salyndy jáne 11 polıgonnyń qyzmeti ekologııalyq ruqsat alǵansha toqtatyldy.