پوليتسەيدى كولىك كاپوتىندا سۇيرەگەن: اقتوبەلىك كاسىپكەردىڭ كەلىنىنە سوت جازا تاعايىندادى

فوتو: اشىق دەرەككوز

اقتوبەدە پوليتسەيدى  “Lexus” كولىگىنىڭ كاپوتىندا سۇيرەگەن ەكس-دەپۋتات مەيىرجان وندىرگەنوۆتىڭ كەلىنىنە قاتىستى ۇكىم شىقتى. بۇل تۋرالى qandastar.kz اقپارات اگەنتتىگى حابارلايدى.

سوتتا پوترۋلدىك پوليتسيانى “بانديت دەپ ويلادىم” دەپ العاشىندا وزىنە تاعىلعان ايىپپەن كەلىسپەگەن كەلىنشەك سوڭعى سوزىندە ارەكەتى ءۇشىن وكىنەتىنىن ايتتى.

سوتتالۋشى قىلمىستىق كودەكستىڭ “ بيلىك وكىلىنە قاتىستى قورقىتۋ نەمەسە كۇش كورسەتۋ ارەكەتتەرى” بابىمەن ايىپتالدى.

“جاڭاگۇل وتەپبەرگەنوۆا قىلمىستىق كودەكستىڭ 380 بابى 3 بولىگى بويىنشا ايىپتى دەپ تانىلىپ, 2 جىلعا باس بوستاندىعىنان شەكتەۋ جازاسى تاعايىندالسىن. پروباتسيالىق باقىلاۋعا الىنسىن. تۇندە ءدامحانا, مەيرامحاناعا بارۋعا شەكتەۋ قويىلادى. پروباتسيالىق باقىلاۋ ءتاربىتىن بۇزسا, باس بوستاندىعىنان ايىرىلادى”, – دەدى سۋديا.

سونىمەن قاتار, سۋديا باستى دالەلدىڭ وقيعا تۇسىرىلگەن ۆيدەو بولعانىن ايتتى. سەبەبى سوتتالۋشى العاشىندا وزىنە تاعىلعان ايىپپەن كەلىسپەگەن. توقتاتۋعا تىرىسقان پوليتسيا قىزمەتكەرىن “بانديت دەپ ويلادىم” دەدى. بىراق سوڭعى سوزىندە وكىنەتىنىن ايتىپ كەشىرىم سۇرادى.

سوتتالۋشىنىڭ كىناسى سوتتالۋشىنىڭ مويىنداۋىمەن, جابىرلەنۋشىنىڭ جاۋابىمەن, بەينەجازبالارمەن, اۆتوكولىكتى تەكسەرۋ حاتتاماسىمەن جانە قىلمىستىق ءىس بويىنشا باسقا دا دالەلدەمەلەرمەن تولىق راستالدى.

ىستە جابىرلەنۋشى اقتوبە قالالىق باسقارماسى پاترۋلدىك پوليتسياسىندا روتا كومانديرى دانيار ايماعامبەتوۆ. ۇيلەنگەن, ءبىر بالاسى بار. جوعارى ءبىلىمدى. قۇقىق قورعاۋ سالاسىندا 10 جىلدان اسا تاجىريبەسى بار.

ەستەرىڭىزگە سالسا, وقيعا بيىل قىركۇيەك ايىندا بولعان. اۋەلى اكىمشىلىك قۇقىق بۇزۋشىلىق جاساعانى ءۇشىن ماس كۇيىندەگى ەر ادام ۇستالعان. ەر ادام قولىنداعى اقشاسىن ايەلىنە بەرۋى كەرەك ەكەنىن ايتىپ, پوليتسيانى كوندىرگەن. وقيعا ورنىنا ونىڭ ازاماتتىق نەكەدەگى ايەلى باسقا كولىكپەن كەلگەن كەزدە, ەر ادام قاشىپ كەتۋ ماقساتىندا ايەلدىڭ كولىگىنە مىنگەن. پوليتسەي كولىكتىڭ كاپوتىنا سەكىرۋ ارقىلى قۇقىق بۇزۋشىلاردى توقتاتۋعا تىرىسقان. بىرنەشە مەتر قوزعالعاننان كەيىن كولىكتى  پاترۋلدىك پوليتسيا بوگەپ توقتاتقان.

سوتتالۋشى 1994 جىلى تۋعان. اقتوبە وبلىسىنىڭ تۋماسى. جوعارى ءبىلىمدى, ءۇش بالانىڭ اناسى. الايدا كەلىنشەكتىڭ رەسمي نەكەگە تۇرماعانى انىقتالدى.