پوليتسەيلەر حالىققا جاڭا الاياقتىق سحەما شىققانىن ەسكەرتتى

فوتو: pixabay

پوليتسيا قازاقستاندىقتارعا الاياقتىق شابۋىل جاساۋدىڭ جاڭا سحەماسى شىققانىن ەسكەرتەدى – شابۋىلداۋشىلار تۋىستارى مەن دوستارىنىڭ داۋىسىمەن اقشا بوپسالايدى, دەپ حابارلايدى Skifnews.kz اقپارات پورتالى.

ىشكى ىستەر مينيسترلىگى مەديا پورتالىنداعى مالىمەت بويىنشا, الاياقتار مەسسەندجەرلەر مەن الەۋمەتتىك جەلىلەردەگى اككاۋنتتاردى بۇزىپ, حات-حابارلارداعى قولجەتىمدى دىبىستىق ۇلگىلەردى پايدالانىپ اككاۋنت يەسىنىڭ داۋىسىن جاسايدى جانە بارلىق چاتقا اقشا جىبەرۋدى سۇرايتىن قىسقاشا دىبىستىق حابارلاما جىبەرەدى.

“بۇل قاۋىپتى, ويتكەنى الاياقتار جابىرلەنۋشىنى انىقتاۋدىڭ بىرنەشە ءتاسىلىن پايدالانادى, ياعني اككاۋنت, داۋىس جانە بانك كارتاسى. بۇل كوبىرەك سەنىم تۋدىرادى. بۇل جاعدايدا ەكى ادام – دىبىستىق حابارلامانى العان جانە اتىنان جىبەرىلگەن ادام قۇربان بولادى», – دەپ حابارلادى ۆەدومستۆو وكىلى.

وسى جىلدىڭ باسىنان باستاپ جامبىل وبلىسى پوليتسيا دەپارتامەنتىنىڭ قىزمەتكەرلەرى شوتتاردى بۇزىپ, جابىرلەنۋشىنىڭ تۋىستارى مەن دوستارىنا اقشا سۇراپ حابارلاما جىبەرگەن الاياقتىقتىڭ 13 دەرەگىن انىقتاعان.

الاياقتاردىڭ قۇربانى بولماۋ ءۇشىن پوليتسەيلەر مىنانداي كەڭەس بەرەدى:

• دىبىستىق حابارلامالاردى تىڭداعاننان كەيىن بىردەن ءوشىرۋ;
• بارلىق حات-حاباردى اۆتوماتتى تۇردە جويۋ;
• ينتەرنەت جەلىسىنە دىبىسپەن بەينە جىبەرمەۋ;
• وسىنداي جاعدايلاردىڭ الدىن الۋ ءۇشىن جاقىن ادامدارىڭىزبەن قۇپيا سوزدەر ويلاپ تابۋ.

“ەگەر ءسىز وسىنداي دىبىستىق نەمەسە ادەتتەگى حابارلامالاردى تۋىستارىڭىز بەن جاقىندارىڭىزدان الساڭىز, پوليتسيا قىزمەتكەرلەرى الدىمەن باسقا دا بايلانىس قۇرالدارى ارقىلى حابارلاسۋدى ۇسىنادى. ۋاقىتتى جىبەرىپ الامىن دەپ قورىقپاڭىز, ءسال كىدىرىپ, ساقتانعانىڭىز دۇرىس. الەۋمەتتىك جەلىلەردەگى دەرەكتەردى جاسىرىپ ۇستاڭىز, داۋىس ۇلگىلەرىنە جانە دوستار تىزىمىنە بوگدە ادامداردىڭ كىرۋىن شەكتەڭىز. مۇنداي ساقتىق ارەكەتتەرىڭىز الاياقتاردىڭ قۋلىقتارىنا ءتۇسىپ قالۋ قاۋپىنىڭ الدىن الۋعا كومەكتەسەدى», – دەيدى پوليتسەيلەر.