«پوليتسەيلەر شارا قولدانباعان»: تۇركىستان وبلىسىندا ءبۇتىن ءبىر وتباسىنى كورشىلەرى اياۋسىز ۇرىپ كەتكەن

تۇركىستان وبلىسى سايرام اۋدانىنىڭ تۇرعىنى وتباسىن سەگىز ادام جابىلىپ ۇرىپ كەتكەنىن مالىمدەدى. ايتۋىنشا, الگى ادامداردى كورشىسى باستاپ كەلگەن, دەپ حابارلايدى Qandastar.kz

Telegram-داعى Egov.Press ارناسىنىڭ جازۋىنشا, سەگىز شاقتى ادام بوتەننىڭ ۇيىنە باسىپ كىرىپ, بۇكىل وتباسىن سوققىعا جىققان. ولاردى اۋىل تۇرعىندارى اراشالاپ العان. ارنادا ءبىر جابىرلەنۋشىنىڭ ۆيدەوۇندەۋى جاريالاندى, ۆيدەوۇندەۋدە ءوزى, اناسى, اكەسى جانە دوسى دا زارداپ شەككەنىن ايتادى.

ونىڭ ايتۋىنشا, شابۋىلداۋشىلار ولاردى ءبىر ساعات بويى ۇرىپ-سوققان, زارداپ شەككەندەر كوپتەگەن جاراقات العان (ميى شايقالعان, باسيا جارىلعان, قولى سىنعان). اتا-اناسى, ءوزى جانە دوسى جەرگىلىكتى اۋرۋحاناعا بارعان كەزدە, جابىرلەنۋشىنىڭ مالىمدەۋىنشە, ولارعا ءتيىستى مەديتسينالىق كومەك كورسەتىلمەگەن, ويتكەنى سول مەديتسينالىق مەكەمەدە ولارعا شابۋىل جاساعان كورشىسىنىڭ قارىنداسى جۇمىس ىستەيتىن بولىپ شىققان. سوندىقتان ولار قالاداعى اۋرۋحانادا ەمدەلۋگە ءماجبۇر بولعان.

زارداپ شەككەن تۇرعىن جەرگىلىكتى پوليتسياعا ارىز جازعانىن, بىراق پوليتسەيلەر شابۋىل جاساعاندارعا شارا قولدانعىسى كەلمەي وتىرعانىن العا تارتتى. ال كۇدىكتىلەر قوقان-لوقى كورسەتۋىن توقتاتپاعان.

وبلىستىق پوليتسيا دەپارتامەنتى دەنساۋلىققا زيان كەلتىرۋ فاكتىسى بويىنشا قىلمىستىق ءىس قوزعالعانىن حابارلادى.

«وقيعاعا قاتىسۋشىلاردىڭ بارلىعى پوليتسياعا جەتكىزىلىپ, جاۋاپ الىندى. كورشىلەر اراسىنداعى كيكىلجىڭگە تۇرمىستىق جاعداي سەبەپ بولعان. قازىرگى ۋاقىتتا تاراپتاردىڭ ۋاجدەرى زەردەلەنىپ, بارلىق ءمان-جايدى انىقتاۋعا قاجەت شارالار قابىلدانۋدا. تەرگەۋ قورىتىندىسى بويىنشا ولاردىڭ ءىس-ارەكەتىنە زاڭدى باعا بەرىلىپ, ءىس ماتەريالدارى سوتقا جولدانادى», – دەلىنگەن پوليتسيا حابارلاماسىندا.