پوليتسيا مەن بانك قىزمەتكەرى قاراعاندى تۇرعىنىنىڭ 3 ملن تەڭگەسىن الاياقتاردان ساقتاپ قالدى

ول ايەل قازىرگى ۋاقىتتا بەلەڭ العان ينتەرتەن-الاياقتىق تۋرالى جاقسى بىلەدى, الايدا قالا تۇرعىنى ولاردىڭ قۇرىعىنا تۇسەمىن دەپ مۇلدەم ويلاماعان.

– ماعان WhatsApp جەلىسىندە مەكەمە باسشىسىنىڭ تاپسىرماسى بويىنشا قۇقىق قورعاۋ ورگاندارى قارجىلىق زاڭ بۇزۋشىلىقتاردىڭ الدىن الۋ ءۇشىن قىزمەتكەرلەرىمىزدىڭ ەسەپشوتىن تەكسەرىپ جاتىر دەگەن حابارلاما كەلدى. ارادا ون بەس مينۋت وتكەن سوڭ تەلەفونىما بەلگىسىز بىرەۋ قوڭىراۋ شالىپ, ءوزىن قۇقىق قورعاۋ ورگانىنىڭ قىزمەتكەرىمىن دەپ تانىستىرىپ, مەنىڭ ەسەپ-شوتىم ارقىلى ەسىرتكى قىلمىسىنان تۇسكەن اقشا ءوتىپ جاتقانىن ايتتى. ول مەنىڭ جەكە سايكەستەندىرۋ ءنومىرىمدى ەشكىمگە بەرمەۋ تۋرالى سۇرادى. وسىدان كەيىن ماعان باسقا ءبىر ادام قوڭىراۋ سوعىپ, ءوزىن بانك قىزمەتكەرىمىن دەپ تانىستىرىپ, مەنىڭ اتىما سەگىز نەسيە راسىمدەلگەنىن ايتتى. ءسويتىپ ول ماعان باسقا بانكتەن نەسيە الىپ, جينالعان قارىزدى جابۋعا كەڭەس بەردى. الايدا ءبىرىنشى جانە ەكىنشى رەت قوڭىراۋ سوققان ادامدار مەنىڭ جاساپ جاتقان ارەكەتىمدى ەشكىمگە ايتپاۋعا كەڭەس بەردى. وسىدان كەيىن ولار تەلەفون ارقىلى مەنىڭ ءاربىر باسقان قادامىم بويىنشا نۇسقاۋ بەرىپ وتىردى. مەن قالاداعى بانكتەردىڭ بىرىنە بارىپ, 3 ميلليون تەڭگە نەسيە راسىمدەپ, ونى قولما قول اقشامەن الىپ كەتتىم. سودان كەيىن ولار باسقا بانككە بارىپ, ماعان WhatsApp جەلىسىنە جىبەرىلگەن ەسەپ-شوتقا الدىندا العان اقشانى جىبەرۋدى تالاپ ەتتى. سول جەرگە بارعاندا بانك وپەراتورىنىڭ جىبەرىلگەن ەسەپ-شوتتىڭ شەتەلدە تىركەلگەنىن ايتقاننان كەيىن مەندە كۇدىك تۋدى. سول كەزدە ماعان بانكتىڭ ءبولىم باستىعى كەلىپ بولىپ جاتقان جاعدايدى ايتۋىن سۇراپ, مەن بارلىق ارەكەتىمدى ايتىپ بەردىم. كەيىن ول پوليتسيا قىزمەتكەرلەرىن شاقىردى, – دەدى قاراعاندىلىق تۇرعىن.

بانككە كەلگەن وبلىستىق پوليتسيا دەپارتامەنتى كريمينالدىق پوليتسيا باسقارماسىنا قاراستى كيبەرقىلمىسقا قارسى كۇرەس ءبولىمىنىڭ قىزمەتكەرلەرى وقيعانىڭ جاي-جاپسارىن زەردەلەگەن سوڭ, ازاماتشانىڭ بانكتەن العان نەسيەسىن جانە ەسەپ-شوتتارىن قايتادان جاپقىزىپ, قالا تۇرعىنىن الاياقتاردىڭ ارباۋىنان امان الىپ قالدى.

قاراعاندى وبلىسى پوليتسيا دەپارتامەنتى قالا تۇرعىندارىنان بانك نەمەسە قۇقىق قورعاۋ ورگانىنان دەپ بەلگىسىز ادامدار قوڭىراۋ شالسا, بىردەن تەلەفون تۇتقاسىن قويىپ, پوليتسياعا حابارلاسۋدى سۇرايدى.