«Premer-mınıstr bolǵan kezde nege bul máselemen aınalyspadyńyz»: Smaıylov depýtattyń QTJ-ǵa qatysty synyna jaýap berdi

Búgin májilis otyrysynda Álıhan Smaıylov QTJ bankrot bolýy múmkin ekenin málimdedi. Osyǵan baılanysty depýtat Erlan Saırov eks-premerden bul máseleni nege erterek sheshpegenin surady,-dep habarlaıdy Qandastar.kz

«JAP tóraǵasyna qoıar suraǵym: qurmetti Álıhan Ashanuly, siz «QTJ» AQ-nyń («Qazaqstan temir joly» – red. eskertpesi) qarjylyq jaǵdaıy óte nashar dedińiz. Shynymdy aıtsam, negizi onyń jaǵdaıy siz premer-mınıstr bolǵan kezde nasharlap ketken bolatyn. Sol kezde nege bul máseleni qarastyrmadyńyz dep suraǵym keledi», – dedi depýtat Saırov Smaıylovqa joldaǵan saýalynda. Eks-premer mınıstr depýtatqa bergen jaýabynda buǵan deıin QTJ-ǵa qatysty bul máseleler kóterilgenin aıtty. «Bir kezderi biz bul máselelerdi birneshe ret kóterip, salalyq mınıstrlikterge de júgingen edik. Sondaı-aq tipti QTJ kompanııalaryna tapsyrmalar berip, jumys júrgizilýin talap ettik, biraq qabyldanyp jatqan sharalar jetkiliksiz ári tıimsiz, sondyqtan biz bul máseleni qaıtadan kóterýge májbúrmiz», – dedi Joǵarǵy aýdıtorlyq palatanyń basshysy.