پرەمەر-مينيستر قازاقستانداعى ەڭ ۇزىن كوپىردىڭ قۇرىلىسىمەن تانىستى

فوتو: اشىق دەرەككوز

ولجاس بەكتەنوۆ بۇقتىرما سۋ قويماسى ارقىلى وتەتىن قازاقستانداعى ەڭ ۇزىن كوپىر قۇرىلىسىنىڭ بارىسىمەن تانىستى.

 ۇكىمەت باسشىسى ولجاس بەكتەنوۆ شىعىس قازاقستان وبلىسىنا جۇمىس ساپارى بارىسىندا جول-كولىك سالاسىن دامىتۋ جوسپارلارىمەن تانىسىپ, بۇقتىرما سۋ قويماسىنداعى كۇرشىم كوپىر وتكەلىنىڭ قۇرىلىس قارقىنىن تەكسەردى. جوبا پرەزيدەنتتىڭ تاپسىرماسى بويىنشا بىرنەشە اۋداننىڭ ءوڭىردىڭ ورتالىعىمەن كولىك قاتىناسىنا بايلانىستى تۇرعىنداردىڭ وتىنىشتەرىن ەسكەرە وتىرىپ ىسكە اسىرىلۋدا.

50 جىل بويى شىعىس قازاقستان وبلىسىنىڭ مارقاكول, كۇرشىم, كوكپەكتى جانە قاتون-قاراعاي اۋداندارى اراسىنداعى كولىك قاتىناسى جازعى ۋاقىتتا پاروم ارقىلى, قىس مەزگىلىندە مۇز ۇستىمەن جۇزەگە اسىرىلىپ كەلدى. 2019 جىلى اۋقىمدى الەۋمەتتىك ماڭىزى بار جوبانى – اۆتوكوپىر وتكەلىن سالۋ مىندەتى قويىلعان بولاتىن. اتالعان جۇمىس 2021 جىلى باستالدى.

ۇكىمەت باسشىسىنا بۇگىندە كوپىردىڭ بارلىق تىرەكتەرى ورناتىلىپ, ارالىق قۇرىلىستاردىڭ 20 مەتالل كونسترۋكتسياسى دايىندالدى, ونىڭ 19-ى ورناتىلعان, دەپ حابارلادى كولىك ۆيتسە-ءمينيسترى ساتجان ابلاليەۆ. ەكى جولاقتى اۆتوكولىك كوپىرى قازاقستانداعى سۋ ۇستىنە سالىنعان ەڭ ۇزىن قۇرىلىم بولادى – ونىڭ ۇزىندىعى 1316 مەتر, ال وتكىزۋ مۇمكىندىگى تاۋلىگىنە 80 مىڭ كولىككە دەيىن جەتەدى. بۇگىنگى تاڭدا نىسان 80%-عا دايىن. كوپىردى جىل سوڭىندا پايدالانۋعا بەرۋ جوسپارلانعان. سونىمەن قاتار جوبا اياسىندا ۇزىندىعى 18,6 شاقىرىم بولاتىن كوپىرگە قوسىلاتىن جاڭا اۆتوجول قۇرىلىسى قاراستىرىلعان. بۇگىندە 7,7 شاقىرىم تومەنگى جابىن قاباتى توسەلدى.

پرەمەر-مينيستر جۇمىستى تەزىرەك اياقتاۋدىڭ ماڭىزدى ەكەنىنە توقتالىپ, كوپىر قۇرىلىسى جوباسىن ىسكە اسىرۋ شەكارا ماڭىنداعى اۋدانداردىڭ الەۋمەتتىك-ەكونوميكالىق دامۋىنا سەرپىن بەرەتىنىن اتاپ ءوتتى. ۇكىمەت باسشىسى كولىك مينيسترلىگىنە وبلىس اكىمدىگىمەن بىرلەسىپ, قۇرىلىستىڭ ۋاقتىلى ىسكە قوسىلۋىن جانە جوعارى ساپاسىن قامتاماسىز ەتۋدى تاپسىردى.

«قازىر كوپىردەگى كولىك قوزعالىسىن ىسكە قوسۋ ءۇشىن جۇمىستاردى تەزىرەك اياقتاپ, بارلىق كۇشتى جۇمىلدىرۋ كەرەك. تۇرعىنداردىڭ ءجۇرىپ-تۇرۋىنا قولايلى جاعداي جاساپ, اۋدانداردىڭ ءوزارا كولىك قاتىناسىن قامتاماسىز ەتۋ – بۇگىندە اكىمدىك ءۇشىن نەگىزگى باسىمدىقتاردىڭ ءبىرى سانالادى. سونىمەن قاتار كولىك-لوگيستيكا سالاسى ەلىمىزدىڭ ەكونوميكالىق دامۋىنىڭ قوزعاۋشى كۇشتەرىنىڭ بىرىنە اينالۋى ءتيىس. سوندىقتان ءبىز وسىنداي ينفراقۇرىلىمدىق جوبالاردى جەدەل ىسكە اسىرۋىمىز كەرەك», — دەپ اتاپ ءوتتى ولجاس بەكتەنوۆ.

ۇكىمەت باسشىسىنا ءوڭىردىڭ جول-كولىك سالاسىن دامىتۋ جوسپارلارى تۋرالى باياندالدى. ماسەلەن, 325 شاقىرىم رەسپۋبليكالىق ماگيسترالداردى رەكونسترۋكتسيالاۋ جوسپارلانعان, جەرگىلىكتى ماڭىزى بار جولداردى ورتاشا جوندەۋمەن قامتۋ 600 شاقىرىمعا جەتەدى.