پرەمەر-مينيستر كوممۋنالدىق شارۋاشىلىعىن جاڭعىرتۋ جۇمىستارى بويىنشا كەڭەس وتكىزدى

فوتو: primeministr.kz

پرەمەر-مينيستر ولجاس بەكتەنوۆ مەملەكەت باسشىسىنىڭ ەلىمىزدىڭ تۇرعىن ءۇي-كوممۋنالدىق شارۋاشىلىعىن جاڭعىرتۋ جونىندەگى تاپسىرماسىنىڭ ورىندالۋى بويىنشا كەڭەس وتكىزدى, دەپ جازدى qandastar.kz

«ەنەرگەتيكالىق جانە كوممۋنالدىق سەكتورلاردى جاڭعىرتۋ» ۇلتتىق جوباسى ينجەنەرلىك جەلىلەردىڭ اپاتتى مەن توزۋ دەڭگەيىن تومەندەتۋگە, كوممۋنالدىق قىزمەتتەردىڭ ساپاسى مەن سەنىمدىلىگىن ارتتىرۋعا باعىتتالعان. ەلەكتر ەنەرگياسىن ءوندىرۋ ءۇشىن 5 259 مۆت-قا دەيىن جاڭا قۋاتتاردى ىسكە قوسۋ بويىنشا 15 جوبانى ىسكە اسىرۋ, سونداي-اق جۇمىس ىستەپ تۇرعان 14 نىساندى جوندەۋ جانە رەكونسترۋكتسيالاۋ جوسپارلانىپ وتىر. جۇرگىزىلگەن جۇمىستار ناتيجەسى بويىنشا قۋاتتىلىق 7,3 گۆت-قا ارتادى دەپ بولجانۋدا, قولدانىستاعى اكتيۆتەردى جاڭارتۋ توزۋدىڭ ورتا ەسەپپەن 15%-عا تومەندەۋىنە اكەلەدى. جاڭعىرتۋ بارىسىندا 86 مىڭ شاقىرىم كوممۋنالدىق جەلىلەردى قامتۋ جوسپارلانىپ وتىر.

پرەمەر-ءمينيستردىڭ ورىنباسارى قانات بوزىمباەۆ ەنەرگەتيكالىق جانە كوممۋنالدىق سەكتورلارداعى وزەكتى ماسەلەلەر رەسپۋبليكا بويىنشا جوندەۋ قۋاتىن ارتتىرۋ جانە جەلىلەردىڭ توزۋ دەڭگەيى 65-70%-دان اساتىن وڭىرلەرگە باسا نازار اۋدارۋ ارقىلى شەشىلەتىنىن باياندادى.

توزۋ دەڭگەيىن تومەندەتۋ بويىنشا: جىلۋمەن جابدىقتاۋدا – 53%-دان 40%-عا دەيىن, ەلەكترمەن جابدىقتاۋدا – 62%-دان 45%-عا دەيىن, سۋمەن جابدىقتاۋدا – 39%-دان 34%-عا دەيىن, سۋ بۇرۋدا – 54%-دان 40%-عا دەيىن جوسپارلى كورسەتكىشتەر قاراستىرىلعان. 2029 جىلعا دەيىن بۇل ماقساتتارعا 6,8 ترلن تەڭگە باعىتتالادى. قارجى جۇمسالۋىنىڭ اشىقتىعىن قامتاماسىز ەتۋ ءۇشىن تسيفرلىق تەڭگەنى پايدالانۋ ماسەلەسى تالقىلاندى

پرەمەر-مينيستر ولجاس بەكتەنوۆ ازىرلەنگەن ۇلتتىق جوبانىڭ وتاندىق تاۋار وندىرۋشىلەردى قولداۋ مەن مەملەكەتتىك ساتىپ الۋلارداعى قازاقستاندىق قامتۋ ۇلەسىن ارتتىرۋدى ەسكەرە وتىرىپ, ەلىمىزدىڭ تۇرعىن ءۇي-كوممۋنالدىق سەكتورى مەن جالپى ەكونوميكانى دامىتۋ ءۇشىن ماڭىزدى ەكەنىن اتاپ ءوتتى.

ۇلتتىق جوبادا يمپورتقا تاۋەلدىلىكتى تومەندەتۋ جانە جاڭا جۇمىس ورىندارىن اشۋ ءۇشىن وتاندىق ونەركاسىپتى قولداۋعا ەرەكشە نازار اۋدارىلدى. ەكونوميكانىڭ ارالاس سالالارىن, سونىڭ ىشىندە مەتاللۋرگيانى, وڭدەۋ ونەركاسىبىن جانە باسقا دا سالانى دامىتۋدى ىنتالاندىراتىن 27 جاڭا ءوندىرىس سالۋ جوسپارلانۋدا.

«ومىرلىك ماڭىزدى سەكتورلار – جىلۋدىڭ, ەنەرگيانىڭ جانە سۋمەن جابدىقتاۋدىڭ ۇزدىكسىز جۇمىس ىستەۋىن قامتاماسىز ەتۋ ۇكىمەتتىڭ ءبىرىنشى كەزەكتەگى مىندەتى سانالادى. ۇلتتىق جوبانى ورىنداۋ توزعان, كەيبىر جەرلەردە اپاتتى جاعدايداعى ينفراقۇرىلىمدى اۋقىمدى جاڭارتۋعا مۇمكىندىك بەرەدى. بارلىق جوبالار 3,5 مىڭ جۇمىس ورنىن اشۋدى كوزدەيدى. بىزگە وتاندىق بيزنەستى بارىنشا تارتىپ, وتاندىق تاۋارلار مەن قىزمەتتەردى ساتىپ الۋ قاجەت», — دەپ اتاپ ءوتتى ولجاس بەكتەنوۆ.

پرەمەر-مينيستر ۇلتتىق ەكونوميكا مينيسترلىگىنە مۇددەلى مەملەكەتتىك ورگاندارمەن جانە ۇيىمدارمەن بىرلەسىپ, ۇلتتىق جوبا بەكىتىلگەننەن كەيىن ونىڭ ساپالى ىسكە اسىرىلۋىن قامتاماسىز ەتۋدى تاپسىردى. ونەركاسىپ جانە قۇرىلىس مينيسترلىگىنىڭ الدىنا تكش ونىمدەرىن وندىرەتىن وتاندىق كاسىپورىنداردىڭ تولىق جۇكتەمەمەن جۇمىس ىستەۋىنە جاعداي جاساۋ مىندەتى قويىلدى.

ۇلتتىق جوبانى ىسكە اسىرۋ جوسپارلارى تۋرالى ونەركاسىپ جانە قۇرىلىس ءمينيسترى قانات شارلاپاەۆ, ەنەرگەتيكا ۆيتسە-ءمينيسترى الىبەك جاماۋوۆ, ۇلتتىق ەكونوميكا مينيسترلىگى تابيعي مونوپوليالاردى رەتتەۋ كوميتەتىنىڭ توراعاسى اسان دارباەۆ باياندادى. سونداي-اق پرەمەر-ءمينيستردىڭ ورىنباسارى تامارا دۇيسەنوۆا, ۇلتتىق بانك توراعاسى تيمۋر سۇلەيمەنوۆ تە پىكىر ءبىلدىردى.

كەڭەس قورىتىندىسى بويىنشا ەنەرگەتيكالىق جانە كوممۋنالدىق سەكتورلاردى جاڭعىرتۋ جونىندەگى ۇلتتىق جوبا تاسىلدەرى ماقۇلداندى.