پرەمەر-مينيستر قوستاناي وبلىسىنا جۇمىس ساپارمەن باردى

فوتو: ۇكىمەت

پرەمەر-مينيستر ولجاس بەكتەنوۆ قوستاناي وبلىسىنا جۇمىس ساپارى بارىسىندا پرەزيدەنتتىڭ ۇلتتىق قۇرىلتاي مەن قاۋىپسىزدىك كەڭەسىنىڭ IV وتىرىسىندا ايتىلعان اۆتوجول جەلىسىن دامىتۋ, ارقالىقتاعى اۋەجايدى قالپىنا كەلتىرۋ, ەنەرگيامەن جابدىقتاۋ جۇيەسىن جاڭعىرتۋ جانە جاڭارتىلاتىن ەنەرگيا كوزدەرىن دامىتۋ بويىنشا تاپسىرمالارىنىڭ ورىندالۋ بارىسىن تەكسەردى, دەپ جازدى qandastar.kz

ارقالىق قالاسىندا پرەمەر–مينيستر وڭىرلەر اراسىنداعى كولىك قاتىناسىن جاقسارتۋعا باعىتتالعان «ورتالىق – باتىس» كۇرە جولىن سالۋ جونىندەگى جوبانىڭ جاعدايىمەن تانىستى. جاڭا اۆتوماگيسترال استانانى ارقالىق, تورعاي جانە ىرعىز ارقىلى ترانسكاسپي حالىقارالىق كولىك باعىتىمەن بايلانىستىرادى. جوبا حالىقارالىق ستاندارتتارعا ساي زاماناۋي جول سالۋدى كوزدەيدى. كولىك ۆيتسە-ءمينيسترى ساتجان ابلاليەۆ ءۇش جول ايرىعىن, 20 كوپىردى, تەمىرجول ارقىلى وتەتىن ءبىر جول وتكەلىن, ەلدى مەكەندەرگە كىرمە جولدار سالۋ جوسپارلانىپ وتىرعانىن باياندادى. ناتيجەسىندە, استانادان باتىس وبلىستارعا قاتىنايتىن باعىت 560 شاقىرىمعا قىسقارىپ, 5 ساعاتقا جىلدام جەتۋگە مۇمكىندىك بەرەدى.

كولىك مينيسترلىگىنىڭ مالىمەتىنشە, تراسسانىڭ تەحنيكالىق ساناتى III دەڭگەيدەن II دەڭگەيگە كوتەرىلەدى. جاڭا باعىت 70 مىڭ تۇرعىنى بار 13 ەلدى مەكەندى قامتيدى. وتكىزۋ قابىلەتى تاۋلىگىنە 3 مىڭ اۆتوكولىككە جەتەدى. جالپى, جوبانى ىسكە اسىرۋ قالانى ەلىمىزدىڭ سولتۇستىگى مەن وڭتۇستىگى, سونداي-اق ورتالىق ازيا مەن رەسەي اراسىنداعى نەگىزگى لوگيستيكالىق توراپقا اينالدىرادى. بۇل سەنىمدى كولىك قاتىناسىن قامتاماسىز ەتىپ, ءوڭىردىڭ بيزنەسى مەن ەكونوميكاسىن دامىتۋعا سەرپىن بەرەدى.

پرەمەر-مينيستر اۆتوجول قۇرىلىسىن ءبىر اي ىشىندە باستاۋدى تاپسىردى.

«بۇل – تىكەلەي پرەزيدەنتتىڭ تاپسىرماسى بويىنشا جۇزەگە اسىرىلىپ جاتقان جوبا. بۇكىل ەلىمىز ءۇشىن, تورعاي ءوڭىرى ءۇشىن ماڭىزدى جول. سوندىقتان بۇل ىسكە اسا جاۋاپكەرشىلىكپەن قاراۋ ماڭىزدى. بىر اي ىشىندە جوبا بويىنشا جۇمىستى باستاپ, ونى جىلدام ءارى ساپالى جۇرگىزۋ كەرەك. جاڭا جول بويىندا بيزنەسكە مۇمكىندىكتەر اشىلادى. بۇل – وڭىرگە جاڭاشا سەرپىن بەرەتىن جوبا. سوندىقتان مينيسترلىكپەن بىرلەسىپ ءتيىستى جۇمىستار جۇرگىزۋ قاجەت», — دەپ اتاپ ءوتتى ولجاس بەكتەنوۆ.

سونداي-اق پرەمەر-مينيسترگە «جەزقازعان – پەتروپاۆل» رەسپۋبليكالىق اۆتوجولىنداعى جوندەۋ جۇمىستارىنىڭ بارىسى تۋرالى باياندالدى. جوبادا جولدىڭ 71 شاقىرىمىندا جول جابىنىن جاڭارتۋ, 54 سۋ وتكىزۋ قۇبىرىن ورناتۋ كوزدەلگەن. جۇمىستار ۇلىتاۋ وبلىسىنىڭ شەكاراسىنان ارقالىق قالاسىنا دەيىنگى جالپى ۇزىندىعى 87 شاقىرىمدى قۇرايتىن ۋچاسكەنى قامتيدى. جوبانى جۇزەگە اسىرۋ وڭتۇستىك وڭىرلەردەن ەلورداعا دەيىنگى قاشىقتىقتى 600 شاقىرىمعا, قوستاناي مەن پەتروپاۆلعا دەيىنگى قاشىقتىقتى 450 شاقىرىمعا قىسقارتۋعا مۇمكىندىك بەرەدى. جولدىڭ وتكىزۋ مۇمكىندىگى تاۋلىگىنە 2,5 مىڭ اۆتوكولىككە دەيىن ارتادى.

سونىمەن قاتار ارقالىق قالاسىنداعى اۋەجايدى قالپىنا كەلتىرۋ جۇمىستارى دا تەكسەرىلدى. قوستاناي وبلىسى اكىمىنىڭ ورىنباسارى بەرىك تاڭجارىقوۆ نىساننىڭ ۇزىندىعى 2,5 مىڭ مەتر جانە ەنى 50 مەتر ۇشۋ-قونۋ جولاعى, سونداي-اق ولشەمى 200X300 م پەررون بار ەكەنىن باياندادى, بۇل ان-24, Q400, CRJ 200 سياقتى اۋە كەمەلەرى تۇرلەرىن قابىلداۋعا مۇمكىندىك بەرەدى. جوبا اياسىندا جاڭا تەرمينال سالۋ, سونداي-اق ۇشۋ-قونۋ جولاعىن, تاكسي جولىن جانە پەرروندى قايتا جاڭارتۋ جوسپارلانىپ وتىر. جۇمىس اياقتالعاننان كەيىن وتكىزۋ مۇمكىندىگى ساعاتىنا 70 جولاۋشىنى قۇرايدى.

ولجاس بەكتەنوۆ اۋەجايدى قالپىنا كەلتىرۋ جۇمىستارىن بيىل اياقتاۋدى تاپسىردى. ىسكە اسىرىلىپ جاتقان جوبالاردىڭ ستراتەگيالىق ماڭىزى, سونداي-اق كولىك ينفراقۇرىلىمىن دامىتۋ مەن تۇرعىنداردىڭ قاتىناۋىن ەداۋىر جەڭىلدەتۋدىىڭ ماڭىزدىلىعىن اتاپ ءوتتى.

«قازاقستاننىڭ كولىك سالاسىنداعى الەۋەتى زور جانە وڭىردەگى نەگىزگى ترانزيتتىك حابقا اينالۋى ءتيىس. ءبىز ءتيىستى ينفراقۇرىلىمدى تۇبەگەيلى دامىتىپ جاتىرمىز – بۇل ستراتەگيالىق مىندەت. بىزدە بارلىق قاجەتتى رەسۋرستار مەن مۇمكىندىكتەر بار. جوبالاردى قىسقا مەرزىمدە, ساپاسىن جوعالتپاي جۇزەگە اسىرۋ ماڭىزدى. بۇل وڭىرلەردىڭ دامۋىنا ايتارلىقتاي سەرپىن بەرەدى جانە ەكونوميكانى ءارتاراپتاندىرۋدىڭ ماڭىزدى قۇرالىنا اينالادى», — دەپ اتاپ ءوتتى ولجاس بەكتەنوۆ.

قوستاناي وبلىسىندا پرەمەر-مينيستر سونداي-اق جىلۋمەن ۇزدىكسىز قامتاماسىز ەتۋ جانە ءوڭىردى جاڭا جىلىتۋ ماۋسىمىنا دايىنداۋ جونىندەگى شارالاردىڭ ىسكە اسىرىلۋ بارىسىن تەكسەردى. اتاپ ايتقاندا, ارقالىق جەو قىزمەتىمەن جانە جىلۋ جەلىلەرىن جاڭعىرتۋ جوسپارلارىمەن تانىستى. ستانسا 375 عيماراتقا قىزمەت كورسەتەدى. جەو كوممۋنيكاتسيالاردىڭ توزۋ دەڭگەيىنىڭ جوعارىلىعىنا بايلانىستى تاۋەكەلى جوعارى قىزىل ايماقتاعى جىلۋ كوزدەرىنىڭ تىزىمىنە كىرەدى. اكىمدىكتىڭ مالىمەتىنشە, سوڭعى ەكى جىلدا 17 شاقىرىمنان استام جىلۋ جەلىلەرى اۋىستىرىلدى, بۇل 2024-2025 جىلىتۋ ماۋسىمىن اپاتتى جاعدايدا توقتاپ قالۋىنسىز وتكىزۋگە مۇمكىندىك بەردى. بيىل تاعى 9,9 شاقىرىم جىلۋ تراسساسىن جوندەۋ جوسپارلانىپ وتىر. جاڭعىرتۋ جوباسىن ىسكە اسىرۋ قورىتىندىسى بويىنشا ارقالىقتاعى جىلۋ جەلىلەرىنىڭ توزۋى 12%-عا تومەندەيدى دەپ كۇتىلۋدە. «ارقالىق جىلۋ ەنەرگەتيكالىق كومپانياسى» مكك ديرەكتورى جاسۇلان ءابدىراحمانوۆ سۇيىق وتىن رەتىندە پايدالانىلعان مازۋتتان كومىرگە كوشۋدىڭ ارقاسىندا كاسىپورىن شىعىندارىن 2,2 ملرد تەڭگەگە ازايتۋعا قول جەتكىزىلگەنىن باياندادى.

جالپى وبلىس بويىنشا 2024-2025 جىلىتۋ كەزەڭىنە دايىندىق شەڭبەرىندە جابدىققا, جىلۋ جەلىلەرىنە جانە ەلەكتر بەرۋ جەلىلەرىنە كۇردەلى جوندەۋ جۇرگىزىلدى. وڭىردە توزۋ كورسەتكىشىن ءارى قاراي تومەندەتۋ ماقساتىندا بيىل جالپى ۇزىندىعى 27,9 شاقىرىم جىلۋ تراسساسىن قايتا جاڭارتۋ بويىنشا 22 جوبا ىسكە اسىرىلۋدا.

سونىمەن قاتار پرەمەر-مينيسترگە وڭىردەگى «جاسىل» ەنەرگەتيكانى دامىتۋ بويىنشا جوسپارلار تانىستىرىلدى. قوستاناي وبلىسىندا ەنەرگيا جيناقتاۋ جۇيەسى بار قۋاتى 1 گۆت جەل ەلەكتر ستانساسىن سالۋ جونىندەگى باستاماعا نازار اۋدارىلدى. 2025–2028 جىلدارى 165 جەل گەنەراتورىن ورناتۋ قاراستىرىلۋدا. جەل ەلەكتر ستانساسىنىڭ قۇرىلىسى كومىرتەگى قالدىقتارىن جىلىنا 3,3 ملن تونناعا ازايتۋعا مۇمكىندىك بەرەدى.

بۇدان بولەك, ارقالىق قالاسى مەن قوستاناي اۋدانىندا قۋاتتىلىعى 150 مۆت بولاتىن ءۇش جەل ەلەكتر ستانساسىنىڭ قۇرىلىسى كوزدەلگەن. جالپى, الداعى ەكى جىلدا جەك سالاسىندا جيىنتىق قۋاتى 1,2 گۆت بولاتىن 6 جاڭا جوبا ىسكە اسىرىلادى. باستامالاردى جۇزەگە اسىرۋ قورىتىندىسى بويىنشا وڭىردە ەلەكتر ەنەرگياسىن ءوندىرۋ 10 ەسەگە ارتادى. ەلەكتر ەنەرگياسىن قوسىمشا ءوندىرۋ ونەركاسىپتى دامىتۋ جونىندەگى جوسپارلاردى ەسكەرە وتىرىپ, ءوڭىردىڭ ءوسىپ كەلە جاتقان قاجەتتىلىكتەرىن جابۋعا مۇمكىندىك بەرەدى. 2028 جىلعا قاراي قوستاناي وبلىسىنىڭ بالامالى ەنەرگيا كوزدەرىنىڭ جالپى ونىمدىلىگىن 1,3 گۆت-قا دەيىن جەتكىزۋ جوسپارلانۋدا.