جاڭالىقتار
پرەمەر-مينيستر ساپارى: ۇلىتاۋ وبلىسى قالاي دامىپ جاتىر?
فوتو: primeminister.kz
ۇلىتاۋ وبلىسىنا جۇمىس ساپارى بارىسىندا پرەمەر-مينيستر ولجاس بەكتەنوۆ پرەزيدەنتتىڭ الەۋمەتتىك ينفراقۇرىلىمدى جاڭعىرتۋ, تۇرعىن ءۇي مەن كوممۋنالدىق جەلىلەر سالۋ, سونداي-اق الداعى وقۋ جىلىنا ءبىلىم بەرۋ نىساندارىن دايىنداۋ جونىندەگى تاپسىرمالارىنىڭ ورىندالۋ بارىسىمەن تانىستى, – دەپ حابارلايدى qandastar.kz
جەزقازعاندا جاڭا اۋدان مەن ينجەنەرلىك كوممۋنيكاتسيالاردىڭ قۇرىلىسى جۇرگىزىلىپ جاتقان اۋماق قارالدى, سونداي-اق وبلىستى سۋمەن قامتاماسىز ەتۋ جاعدايى مەن جوسپارلارى تۋرالى باياندالدى. بۇعان قوسا, ۇكىمەت باسشىسى اباي اتىنداعى مامانداندىرىلعان مەكتەپ-گيمنازيا ينتەرناتىنىڭ وقۋشىلارىنا ارنالعان جاتاقحاناعا بارىپ, ءبىلىم بەرۋ ينفراقۇرىلىمىنىڭ دامۋىمەن تانىستى.
وتكەن 7 ايدىڭ قورىتىندىسى بويىنشا وبلىستا پايدالانۋعا بەرىلگەن تۇرعىن ءۇي كولەمى 34,5 مىڭ م2 قۇرادى, بۇل وتكەن جىلدىڭ سايكەس كەزەڭىندەگى كورسەتكىشتەن 4,8%-عا ارتىق. جەزقازعاندا وبلىس ورتالىعىن دامىتۋدىڭ بەكىتىلگەن باس جوسپارى اياسىندا قارقىندى قۇرىلىس جۇمىستارى جۇرگىزىلۋدە.
ءبىرىنشى كەزەڭگە سايكەس, 2030 جىلعا دەيىن جەزقازعاننىڭ باتىس اۋدانىنىڭ 44 گەكتارىن يگەرۋ كوزدەلگەن. قالا اكىمى قايرات شايجانوۆ جەر تەلىمىندە جالپى اۋدانى 982,6 مىڭ شارشى مەتر 88 كوپقاباتتى تۇرعىن ءۇي جانە 67 الەۋمەتتىك, مادەني, تۇرمىستىق نىسان, ونىڭ ىشىندە مەكتەپتەر, بالاباقشالار, دراما تەاترى, تەحنيكالىق جوو, مەديتسينا مەكەمەلەرى, وقۋشىلار سارايى جانە ت. ب. سالۋ جوسپارلانىپ وتىرعانىن باياندادى.
بۇگىنگى تاڭدا 360 وتباسى پاتەرلەرمەن قامتاماسىز ەتىلگەن, ولاردىڭ 240-ى حالىقتىڭ الەۋمەتتىك جاعىنان از قامتىلعان توپتارىنا جالعا بەرىلەدى.
پرەمەر-مينيستر جەزقازعاننىڭ باس جوسپارىن ىسكە اسىرۋ اياسىندا ۇكىمەت ماگيسترالدىق جىلۋ, سۋ قۇبىرى جانە كارىز جەلىلەرىن سالۋعا 4,8 ملرد تەڭگە بولگەنىن اتاپ ءوتتى. جالپى ۇزىندىعى 10,5 كم كوممۋنيكاتسيالاردىڭ ءبىر بولىگى وسى جىلدىڭ سوڭىنا دەيىن تولىق سالىناتىن بولادى, جىلۋ جەلىلەرىن سالۋ جوباسى 2025 جىلى دا جالعاسادى. سونداي-اق وبلىس اكىمدىگى مەن «قازاقمىس كورپوراتسياسى» اراسىنداعى مەموراندۋم اياسىندا بيىل قالانىڭ كارىز تازارتۋ قۇرىلىستارىن رەكونسترۋكتسيالاۋ جوباسى ازىرلەندى, قازىرگى ۋاقىتتا مەملەكەتتىك ساراپتامانىڭ وڭ قورىتىندىسى الىندى.
جەزقازعان حالقىن ساپالى اۋىز سۋمەن قامتاماسىز ەتۋ ماسەلەسىنە ەرەكشە نازار اۋدارىلدى. قالانى سۋمەن جابدىقتاۋ كوزدەرى – كەڭگىر سۋ قويماسى جانە ءۇيتاس-ايدوس جەراستى سۋ قابىلداعىشى, ول 70%-عا توزعان.
اتالعان ماسەلەنى شەشۋ ماقساتىندا وبلىستا شارۋاشىلىق اۋىزسۋ تازارتۋ قۇرىلىستارىن جانە II كوتەرگىش سورعى ستانساسىن قايتا جاڭارتۋ جوبالارى ىسكە اسىرىلۋدا. جۇمىستاردى 2025 جىلدىڭ سوڭىندا اياقتاۋ جوسپارلانعان. جوبانى ىسكە اسىرۋ ناتيجەسىندە 89,2 مىڭعا جۋىق تۇرعىنعا ساپالى اۋىزسۋ قولجەتىمدى بولادى. سونداي-اق ساتباەۆ جانە جەزقازعان قالالارىنىڭ, سونىمەن قاتار جاقىن ماڭداعى ەلدى مەكەندەردىڭ تۇرعىندارىن شارۋاشىلىق اۋىزسۋمەن قامتاماسىز ەتەتىن ەسقۇلا سۋ قۇبىرىنىڭ قۇرىلىسى جۇرگىزىلىپ جاتىر.
ولجاس بەكتەنوۆ اتالعان جوبالاردى ىسكە اسىرۋدىڭ باسىمدىعىن اتاپ ءوتتى. سۋ رەسۋرستارى جانە يرريگاتسيا, ونەركاسىپ جانە قۇرىلىس, قارجى مينيسترلىكتەرىنە جۇمىستاردى ۋاقتىلى اياقتاۋ ءۇشىن قاجەتتى قاراجاتتىڭ ءبولىنۋىن قامتاماسىز ەتۋ تاپسىرىلدى.
«مەملەكەت باسشىسىنىڭ تاپسىرماسى بويىنشا 2025 جىلدىڭ سوڭىنا دەيىن حالىقتى ساپالى اۋىزسۋمەن 100% قامتاماسىز ەتۋ قاجەت. بۇل – الەۋمەتتىك ماڭىزدى مىندەتتەردىڭ ءبىرى», — دەپ اتاپ ءوتتى ولجاس بەكتەنوۆ.
ۇكىمەت باسشىسى ساپار بارىسىندا پرەزيدەنت تاپسىرماسىن ورىنداۋ اياسىندا سالىنعان اباي اتىنداعى مامانداندىرىلعان مەكتەپ-گيمنازيا ينتەرناتىنىڭ وقۋشىلارىنا ارنالعان جاتاقحانا عيماراتىن ارالاپ كوردى. ءتيىستى جۇمىستار تولىعىمەن اياقتالىپ, 1 قىركۇيەكتە بالالاردى قابىلداۋ جانە ورنالاستىرۋ جۇمىستارى باستالادى. 3 قاباتتى جاڭا عيمارات 200 بالاعا ارنالعان. تۇرعىندارعا ىڭعايلى بولۋى ءۇشىن اس ءۇي, تۇرمىستىق بولمەلەر, قۇرال-جابدىقتار قوياتىن جانە كىر جۋاتىن بولمەلەر, وقۋ بولمەسى قاراستىرىلعان.
پرەمەر-مينيستر اباي اتىنداعى مەكتەپ-گيمنازيا شالعاي اۋداندار مەن اۋىلداردىڭ بالالارى تىكەلەي قالادا ءبىلىم الاتىن ساناۋلى ورتا ءبىلىم بەرۋ مەكەمەلەرىنىڭ ءبىرى ەكەنىن باسا ايتتى.
ۇكىمەت ءبىلىم ساپاسىن ارتتىرۋعا, ونىڭ ىشىندە ينفراقۇرىلىمدى دامىتۋعا ۇلكەن كوڭىل ءبولىپ كەلەدى. ماسەلەن, بيىل جەزقازعاندا 300 ورىندىق «جايلى مەكتەپ» قۇرىلىسىن اياقتاۋ جوسپارلانىپ وتىر, بىرقاتار مەكتەپ 2025 جىلى پايدالانۋعا بەرىلەدى.
