پرەمەر-ءمينيستردىڭ كەڭەسشىسى سۋ تاسقىنىنا دايىندىقتى تەكسەردى

فوتو: ۇكىمەت

قر پرەمەر-ءمينيسترىنىڭ كەڭەسشىسى ەرالى توعجانوۆ ۇكىمەت باسشىسىنىڭ تاپسىرماسى اياسىندا باتىس قازاقستان وبلىسىندا جۇمىس ساپارىمەن بولىپ, ءوڭىردىڭ سۋ تاسقىنى كەزەڭىنە دايىندىعىن تەكسەردى. ول جەرگىلىكتى اتقارۋشى ورگاندار مەن توتەنشە قىزمەت وكىلدەرىنىڭ قاتىسۋىمەن كەڭەس وتكىزىپ, سۋ تاسقىنىنىڭ الدىن الۋ جانە حالىقتىڭ قاۋىپسىزدىگىن قامتاماسىز ەتۋ شارالارىن تالقىلادى, دەپ جازدى qandastar.kz

ول ەڭ الدىمەن, ورال قالاسىنداعى سۋ باسۋ قاۋپى بار اۋماقتاردى ارالادى.

ورال قالاسى اۋماعىنان 480-مىڭنان استام تەكشە مەتر قار, 55 148 تەكشە مەتر ەرىگەن قار سۋى سورىلدى. بۇل جۇمىستى جۇرگىزۋگە 300-گە جۋىق تەحنيكا جانە 350-دەن استام جۇمىسشى جۇمىلدىرىلدى. قازىرگى جاعداي تۇراقتى, تاۋلىك بويى كەزەكشىلىك ۇيىمداستىرىلعان.

سونىمەن قاتار پرەمەر-ءمينيستردىڭ كەڭەسشىسى قاراتوبە, سىرىم, ءبورلى, تەرەكتى جانە شىڭعىرلاۋ اۋداندارىنىڭ اۋماعىن اۋەدەن تىكۇشاق ارقىلى قارادى.

سىرىم اۋدانىنىڭ اۋماعى ارقىلى ۇشۋ كەزىندە ارالتوبە اۋىلىنىڭ ماڭىندا سۋ بۇزعان كوپىردى قايتا قالپىنا كەلتىرۋ جۇمىستارىمەن تانىستى. سىرىم اۋدانىندا ولەڭتى وزەنىنىڭ بويىندا 8,1 شاقىرىم سۋدان قورعاۋ بوگەتى تۇرعىزىلعان, ونىڭ ىشىندە 42 سۋدى وتكىزۋ ءشليۋزى بار.

بۇدان سوڭ, پرەمەر-ءمينيستردىڭ كەڭەسشىسى قاراتوبە اۋدانى  قورجىن اۋىلى جاقسىباي وزەنىنىڭ اۋماعىن قاراپ ءوتتى. بىلتىر مەملەكەت باسشىسىنىڭ تاپسىرماسى اياسىندا سۋ تاسقىنىنان زارداپ شەككەن تۇرعىندارعا قورجىن اۋىلىندا 90 ءۇي سالىنعان بولاتىن.

بۇدان سوڭ ەرالى توعجانوۆ قاراتوبە اۋدانىنىڭ ورتالىعىنداعى قالدىعايتى وزەنىنە بارىپ, سۋ تاسقىنىڭ الدىن الۋعا باعىتتالعان جۇمىستارمەن تانىستى. قار سۋىنىڭ ەرۋىنە بايلانىستى, قالدىعايتى وزەنىنىڭ سۋى كوتەرىلىپ, ءوز ارناسى ارقىلى ءوتىپ, جاقىن ماڭداعى جولدى بۇزعان بولاتىن. وسىعان بايلانىستى 32 تەحنيكا تارتىلىپ, توتەنشە جاعدايلار قىزمەتىنىڭ 60 مامانى جانە 23 اۋماقتىق قورعانىس قىزمەتىنىڭ ساربازدارى  توتەنشە جاعدايدى جويۋ جۇمىستارىن جۇرگىزدى. ولار وزەن جاعاسىن قۇم تولتىرىلعان قاپشىقتارمەن قورعاۋ, سۋدى بوگەۋ, جولدى قالپىنا كەلتىرۋ جۇمىستارىن جۇرگىزدى. بۇگىندە وزەن بويىندا 3,7 شاقىرىم بوگەت سالىنعان. جالپى قاراتوبە اۋدانى بويىنشا 10,8 شاقىرىم بوگەت تۇرعىزىلعان.

وسىدان كەيىن, ەرالى توعجانوۆ شىڭعىرلاۋ وزەنىنىڭ بويىمەن ۇشىپ, شىڭعىرلاۋ, ءبورلى اۋداندارىندا اتقارىلىپ جاتقان جۇمىستارمەن تانىستى.

شىڭعىرلاۋ اۋدانىندا –3,5 شاقىرىم بوگەت, ال ءبورلى اۋدانىنداعى وزەندەر بويىنداعى ەلدى مەكەندەردە 40 شاقىرىم بوگەت تۇرعىزىلعان. سونداي-اق, شىڭعىرلاۋ وزەنىندە جالپى سانى 9,5 مىڭ شارشى مەتر مۇز جارىلعان.

وتكەن جىلى مەملەكەت باسشىسى قاسىم-جومارت توقاەۆ سۋ تاسقىنى كەزەڭىندە باتىس قازاقستان وبلىسىنا كەلگەن ۋاقىتتا قاراتوبە اۋدانىنىڭ تۇرعىندارى قالدىعايتى وزەنى ارقىلى وتەتىن 9 ەلدى مەكەندى جالعايتىن كوپىر سالۋ ماسەلەسىن كوتەرگەن ەدى. قازىرگى ۋاقىتتا كوپىردىڭ جوبالىق-سمەتالىق قۇجاتتامالارى ازىرلەنىپ, مەملەكەتتىك ساراپتامادان ءوتىپ جاتىر. وسى رەتتە, اۋىل اقساقالدارىنىڭ الدىندا ەرالى توعجانوۆ اتالعان شەشىمگە قولداۋ بىلدىرەتىنىن جانە ءتيىستى مينيسترلىككە جۇگىنىپ, ماسەلەنى شەشۋ بويىنشا جاردەمدەسەتىنىن جەتكىزدى. سونداي-اق  ەرالى توعجانوۆ جەرگىلىكتى اتقارۋشى ورگاندار حالىقتىڭ قاۋىپسىزدىگىن قامتاماسىز ەتۋ ءۇشىن قاجەتتى شارالاردى جەدەل قابىلداي وتىرىپ, جاعدايدى تولىق باقىلاپ وتىرعانىن اتاپ ءوتتى.

مامانداردىڭ مالىمەتىنشە, باتىس قازاقستان وبلىسىنداعى وزەندەردە سۋ دەڭگەيى تۇسكەن. ەندىگى كەزەكتە ەرالى توعجانوۆ رەسەي تاراپىمەن ترانسشەكارالىق وزەندەردەگى جاعدايدى باقىلاۋدا ۇستاپ, كۇندەلىكتى اقپارات الماسۋدى تاپسىردى.

جالپى العاندا, بقو-دا سۋ تاسقىنى كەزەڭىندە ەلدى مەكەندەردى قورعاۋ ءۇشىن «دەمەۋ قازاقستان قورىنىڭ» جانە جەرگىلىكتى بيۋدجەتتىڭ قاراجاتىمەن 4,5 ملرد تەڭگەگە ۇزىندىعى 143 شاقىرىم قورعانىس بوگەتى ورناتىلدى, 9 شاقىرىم سۋ بۇرۋ كانالى, 93 شاقىرىم ارىق سالىندى, 74 شاقىرىم ماگيسترالدى  كانال تازارتىلدى. وبلىس اۋماعىنان 937,1 مىڭ تەكشە مەتر قار شىعارىلدى.

وزەندەردە مونيتورينگ جۇرگىزۋ ءۇشىن وبلىستا 29 گيدروبەكەت جۇمىس ىستەپ جاتىر. سونداي-اق 32 مىڭ ادامدى قابىلداي الاتىن 317 ۋاقىتشا ورنالاستىرۋ پۋنكتى دايىن جانە مالدى قاۋىپسىز ايماقتارعا ايداپ اپارۋعا ارنالعان 195 ورىن بەكىتىلدى.

قازىرگى تاڭدا بقو-داعى بارلىق كۇش پەن قۇرالدار كۇشەيتىلگەن رەجيمدە تاۋلىك بويى كەزەكشىلىكتە جۇمىس اتقارىپ جاتىر.