Premer-Mınıstrdiń keńesshisi sý tasqynyna daıyndyqty tekserdi

Foto: úkimet

QR Premer-Mınıstriniń keńesshisi Eraly Toǵjanov Úkimet basshysynyń tapsyrmasy aıasynda Batys Qazaqstan oblysynda jumys saparymen bolyp, óńirdiń sý tasqyny kezeńine daıyndyǵyn tekserdi. Ol jergilikti atqarýshy organdar men tótenshe qyzmet ókilderiniń qatysýymen keńes ótkizip, sý tasqynynyń aldyn alý jáne halyqtyń qaýipsizdigin qamtamasyz etý sharalaryn talqylady, dep jazdy qandastar.kz

Ol eń aldymen, Oral qalasyndaǵy sý basý qaýpi bar aýmaqtardy aralady.

Oral qalasy aýmaǵynan 480-myńnan astam tekshe metr qar, 55 148 tekshe metr erigen qar sýy soryldy. Bul jumysty júrgizýge 300-ge jýyq tehnıka jáne 350-den astam jumysshy jumyldyryldy. Qazirgi jaǵdaı turaqty, táýlik boıy kezekshilik uıymdastyrylǵan.

Sonymen qatar Premer-Mınıstrdiń keńesshisi Qaratóbe, Syrym, Bórli, Terekti jáne Shyńǵyrlaý aýdandarynyń aýmaǵyn áýeden tikushaq arqyly qarady.

Syrym aýdanynyń aýmaǵy arqyly ushý kezinde Araltóbe aýylynyń mańynda sý buzǵan kópirdi qaıta qalpyna keltirý jumystarymen tanysty. Syrym aýdanynda О́leńti ózeniniń boıynda 8,1 shaqyrym sýdan qorǵaý bógeti turǵyzylǵan, onyń ishinde 42 sýdy ótkizý shlıýzi bar.

Budan soń, Premer-Mınıstrdiń keńesshisi Qaratóbe aýdany  Qorjyn aýyly Jaqsybaı ózeniniń aýmaǵyn qarap ótti. Byltyr Memleket basshysynyń tapsyrmasy aıasynda sý tasqynynan zardap shekken turǵyndarǵa Qorjyn aýylynda 90 úı salynǵan bolatyn.

Budan soń Eraly Toǵjanov Qaratóbe aýdanynyń ortalyǵyndaǵy Qaldyǵaıty ózenine baryp, sý tasqynyń aldyn alýǵa baǵyttalǵan jumystarmen tanysty. Qar sýynyń erýine baılanysty, Qaldyǵaıty ózeniniń sýy kóterilip, óz arnasy arqyly ótip, jaqyn mańdaǵy joldy buzǵan bolatyn. Osyǵan baılanysty 32 tehnıka tartylyp, tótenshe jaǵdaılar qyzmetiniń 60 mamany jáne 23 aýmaqtyq qorǵanys qyzmetiniń sarbazdary  tótenshe jaǵdaıdy joıý jumystaryn júrgizdi. Olar ózen jaǵasyn qum toltyrylǵan qapshyqtarmen qorǵaý, sýdy bógeý, joldy qalpyna keltirý jumystaryn júrgizdi. Búginde ózen boıynda 3,7 shaqyrym bóget salynǵan. Jalpy Qaratóbe aýdany boıynsha 10,8 shaqyrym bóget turǵyzylǵan.

Osydan keıin, Eraly Toǵjanov Shyńǵyrlaý ózeniniń boıymen ushyp, Shyńǵyrlaý, Bórli aýdandarynda atqarylyp jatqan jumystarmen tanysty.

Shyńǵyrlaý aýdanynda –3,5 shaqyrym bóget, al Bórli aýdanyndaǵy ózender boıyndaǵy eldi mekenderde 40 shaqyrym bóget turǵyzylǵan. Sondaı-aq, Shyńǵyrlaý ózeninde jalpy sany 9,5 myń sharshy metr muz jarylǵan.

О́tken jyly Memleket basshysy Qasym-Jomart Toqaev sý tasqyny kezeńinde Batys Qazaqstan oblysyna kelgen ýaqytta Qaratóbe aýdanynyń turǵyndary Qaldyǵaıty ózeni arqyly ótetin 9 eldi mekendi jalǵaıtyn kópir salý máselesin kótergen edi. Qazirgi ýaqytta kópirdiń jobalyq-smetalyq qujattamalary ázirlenip, memlekettik saraptamadan ótip jatyr. Osy rette, aýyl aqsaqaldarynyń aldynda Eraly Toǵjanov atalǵan sheshimge qoldaý bildiretinin jáne tıisti mınıstrlikke júginip, máseleni sheshý boıynsha járdemdesetinin jetkizdi. Sondaı-aq  Eraly Toǵjanov jergilikti atqarýshy organdar halyqtyń qaýipsizdigin qamtamasyz etý úshin qajetti sharalardy jedel qabyldaı otyryp, jaǵdaıdy tolyq baqylap otyrǵanyn atap ótti.

Mamandardyń málimetinshe, Batys Qazaqstan oblysyndaǵy ózenderde sý deńgeıi túsken. Endigi kezekte Eraly Toǵjanov Reseı tarapymen transshekaralyq ózenderdegi jaǵdaıdy baqylaýda ustap, kúndelikti aqparat almasýdy tapsyrdy.

Jalpy alǵanda, BQO-da sý tasqyny kezeńinde eldi mekenderdi qorǵaý úshin «Demeý Qazaqstan qorynyń» jáne jergilikti bıýdjettiń qarajatymen 4,5 mlrd teńgege uzyndyǵy 143 shaqyrym qorǵanys bógeti ornatyldy, 9 shaqyrym sý burý kanaly, 93 shaqyrym aryq salyndy, 74 shaqyrym magıstraldy  kanal tazartyldy. Oblys aýmaǵynan 937,1 myń tekshe metr qar shyǵaryldy.

О́zenderde monıtorıng júrgizý úshin oblysta 29 gıdrobeket jumys istep jatyr. Sondaı-aq 32 myń adamdy qabyldaı alatyn 317 ýaqytsha ornalastyrý pýnkti daıyn jáne maldy qaýipsiz aımaqtarǵa aıdap aparýǵa arnalǵan 195 oryn bekitildi.

Qazirgi tańda BQO-daǵy barlyq kúsh pen quraldar kúsheıtilgen rejımde táýlik boıy kezekshilikte jumys atqaryp jatyr.