الەم جاڭالىقتارى
پرەزيدەنت 9 مەملەكەتتىڭ ەلشىسىنەن سەنىم گراموتالارىن قابىلدادى
فوتو: اقوردا
توعىز ەلدىڭ توتەنشە جانە وكىلەتتى ەلشىلەرىنىڭ قازاقستان پرەزيدەنتىنە سەنىم گراموتالارىن تاپسىرۋ ءراسىمى ءوتتى, – دەپ حابارلايدى qandastar.kz اقورداعا سىلتەمە جاساپ.
سەنىم گراموتالارىن كيپر رەسپۋبليكاسىنىڭ ەلشىسى پەتروس ناكۋزيس, جاپونيا ەلشىسى ياسۋماسا يدجيما, قىتاي حالىق رەسپۋبليكاسىنىڭ ەلشىسى حان چۋنلين, اۋستريا رەسپۋبليكاسىنىڭ ەلشىسى اندرەا باحەر, بۋركينا-فاسو ەلشىسى اريستيد راپۋگدوندبا ليۋدوۆيك تاپسوبا, لاوس حالىق دەموكراتيالىق رەسپۋبليكاسىنىڭ ەلشىسى سيپحاندون ويبۋابۋددي, جاڭا زەلانديا ەلشىسى مارك دجۋليان ترەينور, دانيا كورولدىگىنىڭ ەلشىسى يەسپەر ۆار, سلوۆەنيا رەسپۋبليكاسىنىڭ ەلشىسى الەنكا سۋحادولنيك تابىستادى.
پرەزيدەنت ەلىمىز جاھاندىق جانە وڭىرلىك دەڭگەيدەگى تىنىشتىق پەن قاۋىپسىزدىكتى قولداۋعا باعىتتالعان بەيبىتسۇيگىش ساياسات ۇستاناتىنىن جەتكىزدى. بۇل – قازاقستاننىڭ سىرتقى ساياساتتاعى باستى باعدارى.
قاسىم-جومارت توقاەۆتىڭ ايتۋىنشا, قازاقستان الەمدىك اۋقىمداعى ءىس-شارالار مەن كەزدەسۋلەرگە ۇيىتقى بولا وتىرىپ, حالىقارالىق ارەناداعى بەلسەندى ويىنشىعا اينالدى. وڭىردەگى ءىرى ەكونوميكاسى بار ەل رەتىندە ءتۇرلى مەملەكەتتەردەن ينۆەستيتسيانى كوپتەپ تارتىپ وتىر. سونداي-اق قازاقستان نارىعى ەكونوميكالىق ىنتىماقتاستىققا اشىق.
كەزدەسۋ سوڭىندا پرەزيدەنت ەلشىلەردىڭ رەسمي تۇردە ديپلوماتيالىق ميسسيالارىنىڭ باستالۋىمەن قۇتتىقتاپ, ولاردىڭ مەملەكەتتەر باسشىلارىنا ىستىق ىقىلاسىن جەتكىزدى.
