پرەزيدەنت اەس سالۋدىڭ جايىن ايتتى

فوتو: اقوردا

مەملەكەت باسشىسى ەكونوميكانى دامىتۋ ءۇشىن تۇراقتى ەنەرگيا كوزى كەرەك ەكەنىن ايتتى. بيىل حالىق كوپتەن كۇتكەن ءىرى اۆتوجول جوبالارى ىسكە قوسىلماق. بۇل جوبالار ەلىمىزدىڭ كولىك قۇرىلىمىن نىعايتىپ, ىسكەرلىك بەلسەندىلىكتىڭ ارتۋىنا ىقپال ەتەدى, — دەپ حابارلايدى qandastar.kz

اتاپ ايتقاندا, «استانا – الماتى», «الماتى – وسكەمەن», «اقتوبە – قاندىاعاش», «اتىراۋ – استراحان» جولدارى پايدالانۋعا بەرىلەدى. سونىمەن قاتار «جەزقازعان – قاراعاندى» ماگيسترالىن جوبالاۋ جۇمىستارى باستالادى. مۇنىڭ ءبارى – جۇزەگە اسىرىلىپ جاتقان جانە جوسپارلانعان اۋقىمدى جوبالاردىڭ ءبىر بولىگى عانا – دەدى مەملەكەت باسشىسى. سوڭعى جىلدارى ەلىمىزدىڭ بارلىق وڭىرىندە تۇراقتى تۇردە جاڭا كاسىپورىندار اشىلىپ, جاڭا جولدار مەن كوپىرلەر سالىنىپ جاتىر. ينجەنەرلىك جەلىلەر مەن تۇرعىن ءۇي-كوممۋنالدىق شارۋاشىلىق نىساندارى جاڭارتىلۋدا. بىراق كوبىنە مۇنداي جاعىمدى اقپارات لايىقتى دەڭگەيدە تارالماي جاتادى. جاقسىنى جاقسى دەپ ايتۋ كەرەك. ەل دامۋىنداعى وڭ وزگەرىستەرگە كوبىرەك نازار اۋدارۋ بۇقارالىق اقپارات قۇرالدارىنىڭ, اسىرەسە, مەملەكەتتىك باق-تىڭ مىندەتى دەپ سانايمىن – دەدى ول.

ەكونوميكانى دامىتۋ ءۇشىن تۇراقتى ەنەرگيا كوزى كەرەك. سوندىقتان مەن اتوم ەلەكتر ستانساسىن سالۋ ماسەلەسىن پىسىقتاۋ تۋرالى ناقتى تاپسىرما بەردىم. قازىر جان-جاقتى تالقىلاۋ بولىپ جاتىر. ءارتۇرلى پىكىر ايتىلۋدا. بۇل ۇدەرىسكە بۇقارالىق اقپارات قۇرالدارى دا بەلسەنە اتسالىسۋى كەرەك. شىن مانىندە, ەلىمىزدە اتوم ەنەرگەتيكاسىن دامىتۋعا زور مۇمكىندىك بار. ونى دۇرىس, ياعني ءتيىمدى پايدالانعان ءجون. وسى ماسەلەگە قاتىستى سوڭعى شەشىمدى حالىق قابىلدايدى. رەفەرەندۋم بيىل كۇزدە وتەدى. ۇكىمەت ناقتى داتانى ايقىندايدى – دەدى توقاەۆ.