Prezıdent AES týraly: Daýys berý nátıjesi qandaı bolsa da, bul – aıtýly oqıǵa

Foto: Aqorda

Memleket basshysy Qasym-Jomart Toqaev elordada máslıhat depýtattarynyń II respýblıkalyq forýmynda AES qurylysy týraly jalpyulttyq referendým jóninde pikir bildirdi.

«Oraıly sátti paıdalanyp, birqatar ózekti máselege toqtalǵym keledi. Birneshe kúnnen keıin ótetin jalpyulttyq referendýmda halqymyz Qazaqstanda atom elektr stanııasyn salý qajet pe, álde qajet emes pe degen máseleni sheshedi. Daýys berý nátıjesi qandaı bolsa da, bul – aıtýly ýaqıǵa. Aldaǵy referendým – Qazaqstanda sońǵy bes jylda bolǵan aýqymdy ózgeristerdiń taǵy bir mysaly, «Halyq únine qulaq asatyn memleket» tujyrymdamasynyń jarqyn kórinisi. AES qurylysyna qatysty óz ustanymymdy buǵan deıin birneshe ret aıttym. Álemdegi progresten shet qalmaý úshin biz básekelestikte óz artyqshylyqtarymyzdy paıdalanýymyz kerek, – dedi ol.

Azamattar qoldap daýys bergen jaǵdaıda, Táýelsiz Qazaqstannyń búkil tarıhyndaǵy eń iri jobaǵa aınalatynyn aıtyp ótti.

– Atom elektr stanııasyn salý – uzaqmerzimdi joba. Alaıda bul bastama elimizdiń ornyqty damýyn onjyldyqtarǵa ilgeriletedi, energetıkalyq derbestigimizdi nyǵaıtady, ekonomıkanyń, ǵylym men bilimniń túrli salasyn órkendetýge tyń serpin beredi, sondaı-aq ınjenerler shoǵyry men ártúrli beıindegi mamandar legin qalyptastyrýǵa yqpal etedi. Zamannyń talaby osy. Demek, onyń paıdasyn qazirgi jastarymyz ben bolashaq urpaq kóredi. Osy rette AES qurylysyna qoldaý bildirip jatqan Halyqtyq shtabtyń jumysyn erekshe atap ótkim keledi. Shtab saıası partııalar men túrli qoǵamdyq uıymdardyń ókilderin, sondaı-aq ǵalymdardy, sarapshylardy, óndiris mamandary men kásipkerlerdi biriktirdi. Azamattardyń uıysyp, ortaq iske jumyla kirise alatynyn kórsetedi. Damýǵa umtylys – ultymyzdyń eń jaqsy qasıetteriniń biri. Sondyqtan biz eshqandaı qıyndyqqa qaramastan, alǵa qaraı batyl qadam basýymyz kerek. Taǵy da qaıtalaımyn. Aldaǵy referendým táýelsizdik jyldaryndaǵy eń mańyzdy ýaqıǵa bolady jáne elimizdiń odan ári damýyna tikeleı áser etedi», – dedi Memleket basshysy.