پرەزيدەنت اقتاۋداعى ۇشاق اپاتىنا بايلانىستى كەڭەس وتكىزدى

فوتو: اقوردا

مەملەكەت باسشىسى قاسىم-جومارت توقاەۆتىڭ توراعالىعىمەن اقتاۋ قالاسى ماڭىنداعى ۇشاق اپاتىنا بايلانىستى كەڭەس ءوتتى, دەپ جازدى qandastar.kz

پرەزيدەنت ماڭعىستاۋ وبلىسىندا بولعان ۇشاق اپاتىنان قازاقستان ازاماتتارى دا قازا تاپقانىنا توقتالىپ, مارقۇمداردىڭ وتباسى مەن جاقىندارىنا تاعى دا كوڭىل ايتتى.

قاسىم-جومارت توقاەۆ جەدەل كومەك كورسەتۋ قۇرىلىمدارى اپات كەزىندە شۇعىل ءارى ۇيلەسىمدى ارەكەت ەتكەنىنە نازار اۋداردى.

– اپاتتىڭ سالدارى بۇدان دا اۋىر بولۋى مۇمكىن ەدى. ءبىز بۇعان جول بەرگەن جوقپىز. ادام ءومىرىن ساقتاپ قالدىق. قۇتقارۋ جۇمىستارى جوعارى دەڭگەيدە جۇرگىزىلدى. قاجەتتى اقپاراتتىڭ بارلىعى جۇرتشىلىققا ۋاقىتىلى بەرىلىپ تۇردى. ياعني وقيعا بويىنشا تولىققاندى مالىمەت بارىنە بىردەي ۇسىنىلدى. ازاماتتارىمىز العاشقى مينۋتتان باستاپ زارداپ شەككەندەرگە كومەك قولىن سوزدى. حالقىمىز جاناشىرلىق, ۇيىمشىلدىق  جانە شىنايى تىلەۋلەستىك قاسيەتىن كورسەتتى. جۇرت كەزەككە تۇرىپ, قان تاپسىردى. ازەربايجان ەلشىلىگى عيماراتىنا گۇل شوقتارىن قويدى. بۇل تۋرالى ەلىمىزدىڭ جانە شەتەلدىڭ بۇقارالىق اقپارات قۇرالدارى جان-جاقتى مالىمەت تاراتتى. قۇتقارۋشىلاردىڭ, دارىگەرلەردىڭ جانە ۆولونتەرلەردىڭ ادال قىزمەتىنە كۇللى الەم كۋا بولدى. اسىرەسە, كورشىلەس ءارى سەرىكتەس ەلدەر – ازەربايجان, رەسەي, قىرعىزستان ازاماتتارى ايرىقشا العىس ءبىلدىرىپ جاتىر, – دەدى مەملەكەت باسشىسى.

پرەزيدەنت ۇكىمەتكە اپات سالدارىن جويۋعا اتسالىسقان ادامداردىڭ ەرلىگى مەن ەڭبەگىن لايىقتى اتاپ ءوتۋ, ەرەكشە كوزگە تۇسكەن ازاماتتاردى مەملەكەتتىك ناگراداعا ۇسىنۋ جونىندە تاپسىرما بەردى.