پرەزيدەنت: الاتاۋ قالاسى يننوۆاتسيالىق ورتالىققا اينالۋى ءتيىس

مەملەكەت باسشىسى قاسىم-جومارت توقاەۆ جولداۋدا الاتاۋعا جاڭا مارتەبە بەرىلەتىنىن ايتتى, دەپ جازدى qandastar.kz

توقاەۆ 10 كۇننىڭ ىشىندە الاتاۋ قالاسىنا ارنايى مارتەبە بەرۋ تۋرالى جارلىق جوباسىن ازىرلەۋدى تاپسىردى. پرەزيدەنتتىڭ ايتۋىنشا, التى ايدان كەشىكتىرمەي قالانى باسقارۋ ءتارتىبى, قارجىلىق مودەلى جانە باسقا دا ماڭىزدى تۇستارىن رەتتەيتىن جەكە زاڭ قابىلدانۋى ءتيىس.

مەملەكەت باسشىسى ارنايى مارتەبە ارتىقشىلىق ەمەس, كوزدەلگەن جوسپارلاردى جۇزەگە اسىرۋعا قاجەتتى ءماجبۇرلى شارا ەكەنىن اتاپ ءوتتى.

“Alatau City وڭىردەگى العاشقى تولىقتاي تسيفرلىق قالاعا اينالۋى ءتيىس. اتاپ ايتقاندا, Smart City تەحنولوگيالارىن قولدانۋدان باستاپ, تاۋارلار مەن قىزمەتتەرگە كريپتوۆاليۋتامەن تولەۋ مۇمكىندىگىنە دەيىن. بۇل قالا قازاقستان بولاشاعىنىڭ بەينەسىن كورسەتىپ, تەحنولوگيالىق پروگرەستى بارىنشا جايلى ءومىر ءسۇرۋ ورتاسىمەن ۇشتاستىرۋى قاجەت”, – دەدى توقاەۆ.

مەملەكەت باسشىسى جالپىۇلتتىق مانگە يە جوبانى ىسكە اسىرۋ ءۇشىن ارنايى اۋماق ءبولىنىپ, باستاپقى جوسپارلاۋ اياقتالعانىن جانە نەگىزگى ينفراقۇرىلىمدىق جەلىلەر قوسىلعانىن ايتتى.

ء“بىزدىڭ جاڭا ىسكەرلىك بەلسەندىلىك پەن يننوۆاتسيا ورتالىعىمىز الاتاۋ قالاسى بولۋى ءتيىس. جۋىرداعى قىتايعا ساپارىم بارىسىندا الەمدىك دەڭگەيدەگى كومپانيالارمەن كوپتەگەن ميللياردتىق كەلىسىمدەرگە قول قويىلدى. سول كومپانيالاردىڭ ءبىرى – جاھاندىق تەحنوپوليس شەنچجەندى سالۋعا اتسالىسقان. سونداي-اق ول تىكەلەي Alatau City جوباسىن جۇزەگە اسىرۋعا قاتىسادى”, – دەدى پرەزيدەنت.