جاڭالىقتار
پرەزيدەنت الماتى اۋەجايىندا كەپىلگە الىنعان قىزدى قۇتقارعان ازاماتتى ناگراداعا ۇسىنۋدى تاپسىردى
فوتو: instagram.com/kris_p_almata
مەملەكەت باسشىسى قاسىم-جومارت توقاەۆ الماتى اۋەجايىندا ادامدى كەپىلگە الۋ جاعدايى جونىندە حاباردار. بۇل تۋرالى اقوردا حابارلايدى.
«پرەزيدەنت قىلمىسكەردىڭ سۋىق قارۋىن تارتىپ الىپ, ۇستاۋعا كومەكتەسكەن ەر ادامنىڭ باتىلدىعىن ەرەكشە اتاپ ءوتىپ, اتالعان ازاماتتى مەملەكەتتىك ناگراداعا ۇسىنۋدى تاپسىردى», — دەلىنگەن حابارلامادا.
ەسكە سالساق, الەۋمەتتىك جەلىدە قولىنا پىشاق ۇستاعان ەر ادامنىڭ جەردە وتىرعان قىزدى شاشىنان ۇستاپ, قورقىتىپ جاتقان ۆيدەوسى تاراعان ەدى.
وقيعا بۇگىن, 7 ناۋرىزدا الماتى اۋەجايىنىڭ ۇشۋ الدىنداعى تەكسەرۋ ايماعىندا بولعان.
«ەر ادامدى اۋەجاي اۋماعىنداعى جەلىلىك پوليتسيا ءبولىمىنىڭ قىزمەتكەرلەرى مەن اۆياتسيالىق قاۋىپسىزدىك قىزمەتىنىڭ قىزمەتكەرلەرى ۇستادى. قازىرگى ۋاقىتتا ەر ادام جەلىلىك پوليتسيا بولىمىندە جانە بۇل وقيعامەن قورعاۋ ورگاندارىنىڭ قىزمەتكەرلەرى اينالىسىپ جاتىر», — دەپ حاباردار ەتتى اۋەجايدىڭ ءباسپاسوز قىزمەتىندەگىلەر.
