Prezıdent arýlardy kóktem merekesi – Halyqaralyq áıelder kúnimen quttyqtady

Foto: Aqorda

Memleket basshysy Qasym-Jomart Toqaevtyń qatysýymen 8 naýryz – Halyqaralyq áıelder kúnine arnalǵan saltanatty jıyn bastaldy, dep jazdy qandastar.kz

«Búgin men barshańyzdy kóktem merekesi – Halyqaralyq áıelder kúnimen shyn júrekten quttyqtaımyn! Bul meıramdy shyn máninde sulýlyqtyń kórinisi deýge bolady. Sebebi áıel jany qashanda ádemilikke jaqyn.

Arýlarymyz álemge súıispenshilikpen qarap, jan-jaǵyna jaqsylyq sharapatyn syılap júredi. «Áıel bir qolymen besikti terbetse, bir qolymen álemdi terbetedi» degen sóz beker aıtylmaǵan.

Áıel – shańyraqtyń shyraǵy, ulttyń uıytqysy. Ana – tirshilik pen berekeniń bastaýy, adamzat boıyndaǵy bar izgiliktiń qaınar kózi. Ananyń aıaly alaqany men sheksiz meıirimi ár úıge jylylyq beredi. Salt-dástúrimiz ben ana tilimizdiń búgingi kúnge jetýi de – eń aldymen, analardyń arqasy.

О́mirdiń máni de, tirshiliktiń sáni de – sizder! Sondyqtan búgingi meıramda barsha er-azamattar ózderińizge aq tilegin arnap, yqylas-iltıpatyn bildirip jatyr. Solardyń ishinde men de Memleket basshysy retinde áıelderge tilegimdi, lebizimdi aıtyp turmyn».

Qasym-Jomart Toqaev Qazaqstannyń san túrli salada jetistikke jetýine qyz-kelinshekter mol eńbek sińirgenin aıtty. 

«Halqymyzda erlik pen eldiktiń týyn bıik ustaǵan arýlar az emes. Olardyń esimi el shejiresine altyn árippen jazylǵan.

Tumar men Bopaı hanymdardyń, Domalaq ana, Zere jáne Ulpan analardyń, Álııa, Mánshúk, Hıýaz sekildi batyr qyzdarymyzdyń aty el jadynda.

Sizderdi aqyly men ajary, danalyǵy men daralyǵy kelisken qazaq áıeliniń izbasary deýge bolady. Áıelder qaýymy kúrdeli kezeńderde aıanbaı eńbek etti, Otanymyzdyń ósip-órkendeýine belsene atsalysty.

Urpaq tárbıesi – ult tárbıesi. Búginde Sizder sanasy sergek, oıy azat urpaq ósirip, Otanymyzdyń órken jaıýyna aıryqsha úles qosyp kelesizder.

Qazaqstannyń san túrli salada jetistikke jetýine qyz-kelinshekterimiz mol eńbek sińirýde. Búgin Aqordaǵa shaqyrylǵan áıelder arasynda Otanymyzǵa ár salada eńbek sińirgen bilikti mamandar bar. Men barshańyzǵa zor alǵys aıtamyn!».

Memleket basshysy: Analary alańsyz qoǵamda balalar da baqytty ómir súredi. 

«Qymbatty hanymdar, Sizder, álemge ádemilik pen úılesim, shańyraqqa jylylyq pen jaılylyq syılap kelesizder. Sizderge óskeleń urpaqty tárbıeleý, otbasylyq qundylyqtardy ilgeriletý sekildi aıryqsha jaýapkershilik júktelgen.

Barlyq salada adal eńbek etip, tabandy da tıimdi jumystaryńyzben memleketimizdiń áleýeti men bedelin nyǵaıtyp júrsizder.

Analary alańsyz qoǵamda balalar da baqytty ómir súredi. Ana men balanyń jaǵdaıy durys bolsa, áleýmettiń jaǵdaıy da durys bolady. Sondyqtan bolashaǵyn oılaǵan el, eń aldymen, áıelderdiń jaǵdaıyn jaqsartýdy oılaıdy».