پرەزيدەنت اسكەري شەرۋدە ءسوز سويلەدى

توقاەۆ حالىقتى جەڭىس كۇنىمەن قۇتتىقتادى.

« ۇلى جەڭىس – تاريحىمىزدىڭ اجىراماس بولىگى جانە كۇللى الەم ءۇشىن ۇلكەن ساباق. ءبىز وسى اقيقاتتى ءاردايىم ەستە ساقتاۋىمىز كەرەك. زۇلمات كەزەڭدى باستان وتكەرگەن مايدانگەرلەر قازىر ورتامىزدا وتىر. قۇرمەتتى ارداگەرلەر, بارشا حالىقتىڭ اتىنان سىزدەرگە شىن جۇرەكتەن العىس ايتامىن! اعا بۋىننىڭ وشپەس ەرلىگى – ۇرپاققا ۇلاعات. وتانشىلدىعى مەن جانقيارلىعى – ۇلگى-ونەگە. ءبىز ۇلى وتان سوعىسىنىڭ ارداگەرلەرىن ەشقاشان ۇمىتپايمىز! بارشاڭىزعا باس يەمىز!”, – دەدى پرەزيدەنت.

سونداي-اق مەملەكەت باسشىسى حالقىمىزدىڭ  ۇلى جەڭىسكە ولشەۋسىز ۇلەس قوسقانىن اتاپ ءوتتى.

« ۇلى وتان سوعىسى جىلدارىندا مايدانعا 1 ميلليون 200 مىڭنان استام قازاقستاندىق اتتاندى. ولاردىڭ تەڭ جارتىسى ەرلىكپەن قازا تاپتى. 500-دەن استام جاۋىنگەرىمىز كەڭەس وداعىنىڭ باتىرى اتاندى. تالعات بيگەلدينوۆ, سەرگەي لۋگانسكي, ساعادات نۇرماعامبەتوۆ, يۆان پانفيلوۆ, باۋىرجان مومىش ۇلى, نۇركەن ءابدىروۆ, مالىك عابدۋللين, سابىر راحيموۆ, مانشۇك مامەتوۆا, ءاليا مولداعۇلوۆا, راقىمجان قوشقارباەۆ, حيۋاز دوسپانوۆا جانە باسقا دا كوپتەگەن قاھارماندارىمىز وشپەس ءىز قالدىردى. تىل ەڭبەككەرلەرى سوعىس جىلدارى جانكەشتىلىك پەن تاباندىلىق تانىتتى”, – دەدى پرەزيدەنت.

توقاەۆ قازاقستاندا جەڭىستىڭ 80 جىلدىعىن تويلاۋعا ەرەكشە نازار اۋدارىلعانىن ايتتى.

ء«بىز جەڭىستىڭ 80 جىلدىعىن اتاپ وتۋگە باسا نازار اۋداردىق, ەلىمىز بويىنشا مىڭداعان ماڭىزدى, اۋقىمى كەڭ ءىس-شارا وتكىزىلىپ جاتىر. 500-گە جۋىق كوشەگە قازاقستان قاھارماندارىنىڭ ەسىمى بەرىلەتىن بولدى. ەلىمىزدە قازاقستاندىق مايدانگەرلەرگە ارنالعان «باتىرلارعا تاعزىم» اتتى شەرۋ وتەدى. ادامزات تاريحىنداعى ەڭ سۇراپىل سوعىسقا قاتىسۋشىلاردىڭ ۇرپاعى اتالارىنىڭ سۋرەتتەرىن كوشەلەرمەن الىپ جۇرەدى. بۇگىنگىدەي جاھاندىق ساياساتقا اگرەسسيا مەن قاتىگەزدىكتىڭ جەگى قۇرتى دەندەپ ەنگەن كەزەڭدە سوعىستىڭ قاسىرەتىن ەلىمىزدىڭ بارشا ازاماتىنا ءتۇسىندىرۋ اسا ماڭىزدى”, – دەدى توقاەۆ.